Read Tzeltal Levítico 19 Bible Online

Levítico 19 - Tzeltal bible

Levítico 19

¹Te Jehová la yalbe te Moisés:

²Halbeya spisil te pueblo yu'un te snich'nab Israel: Ch'ultesbiluquex me, como ho'on, Jehovahon, te ch'ul Dioson awu'unique.

³Jujutuhl ac'a yich' ta muc' sme'stat. Ya me acanantayic te sc'ahc'alel cux-o'tan cu'une. Ho'on, Jehovahon, te Dioson awu'unique.

⁴Ma me xach'uhuntayiquix loc'ombahetic, soc ma me xapas awahcananic ta uhltesbil taq'uin. Ho'on, Jehovahon, Dioson awu'unic.

⁵Te c'alal yac awa'beyic smahtanin Jehová milbil mahtanil scuenta lamal q'uinal, hich me xapasic te bin ut'il ya sc'an pasel, scuenta yu'un ya stsacbeyex a te Diose.

⁶Ya me yich' we'el te bin c'ahc'alil yac awaq'uic, soc ta schebal c'ahc'al, pero te bin ya xhil ta yoxebal c'ahc'al, ya yich' chiq'uel.

⁷Teme ya yich' we'el ta yoxebal c'ahc'al, ihlaybil ya xc'oht, ma ba tsacbil ya xc'oht.

⁸Te mach'a ya swe', scuchoj smul yu'un la yac' bohlobuc sc'oblal te bin ch'ultesbil yu'un Jehová. Te mach'a hich ya spas ya me yich' loq'uesel ta yohlil te pueblo yu'une.

⁹Te c'alal yac awa'iy c'ajoj ma me xac'aj c'alal ta mero sti'il, soc ma xale xan te banti c'axematix ta sc'ajele.

¹⁰Ma xale xan te sit ats'usub soc ma xatam te sit ats'usub te luhbajem; ihquitaya hilel yu'un te pobre soc te jyanlum. Ho'on, Jehovahon, te Dioson awu'unique.

¹¹Ma xawa'iyic elec'; me xawa'iyic lot, soc ma me talel c'axeluc xalotiy abahic.

¹²Ma me ayuc bin jc'axel yac awalic ta jamal ta lot te yac atahbonic ta halel jbihil a, te hich yac ajimbe sc'oblal a te sbihil te Dios awu'unique. Ho'on, Jehovahon.

¹³Ma xawuts'in apat-axuhc soc ma xawelc'ambe te sbiluque. Ma pajeluc to yac atojbe ya'tel te mach'a ya x'a'tej awu'un.

¹⁴Ma xabohlc'optay te mach'a cohc, soc ma me ayuc bin yac awa'be sc'ohchin ta sbe te ts'o'sit, ya me axi' te Dios awu'une. Ho'on, Jehovahon.

¹⁵Ma xapas te bin ma stojiluc ta chahpanel, ma xana'be yo'bolil sba te mach'a pobre soc ma xacoltay te mach'a muc' sc'oblal; stojil me xachahpan te apat-axuhc.

¹⁶Ma me xbehenat ta yohlil alumal ta le-c'op. Ma me ayuc bin yac apas te ya xlaj scuxlejal apat-axuhc a. Ho'on, Jehovahon.

¹⁷Ma xawil-o'tantay te awermano. Ya me atsits apat-axuhc scuenta yu'un ma pajaluc yac ata amul soc.

¹⁸Ma xapac ac'abal, soc ma xaq'uej ilimba ta awo'tan ta stojol te alumale, c'ux me xawa'iy ta awo'tan apat-axuhc hich te bin ut'il c'ux yac awa'iy aba te ha'ate. Ho'on, Jehovahon.

¹⁹Ya me apas te bintic chapal cu'une. Te chambahlametic awu'un ma xawa'be scuch sba soc yantic chambahlametic te yan sts'umbale. Ma xacap soc yan awalil te awawal ta aq'uinal. Ma xalap c'u'ul te capal snahul jalbil a.

²⁰Teme ay winic ya xway soc jtuhl criada te macbil yu'un yan winic, teme ma to mambiluc loq'uel o ma to ba colem loq'uel, schebal ya me yich'ic castigo;[14] pero ma ba ya xlajic, como ma ba libre ay te ach'ixe.

²¹Te winic ya me yic' tal ta stojol Jehová ta yochibal te Nahilpac' Templo yu'un tahojibal jcoht tat tuminchij scuenta mahtanil yu'un te falta stahoje.

²²Ta scuenta te tat tuminchij yu'un mahtanil yu'un stahel falta, te sacerdote ya spasbe te stojel mulil ta stojol Jehová yu'un te smul stahoje; hich ya xpasbot perdón yu'un te smul stahoje.

²³Te c'alal ya x'ochex bahel ta lumq'uinal soc yac ats'unic bayel ta chahp te'etic te ya yac' sit, hich me ya xc'oht awu'unic te ma ba yich'oj circuncisión te sba sit; oxeb ha'bil hich ya xc'oht awu'unic te ma ba yich'oj circuncisión; ma me xalo'beyic te site.

²⁴Ta schanebal ha'bil spisil te sit ch'ultesbil ya xc'oht scuenta yalbeyel wocol te Jehová.

²⁵Pero ta yo'ebal ha'bil ya xhu' yac alo'beyiquix a te site, hich bayel sit ya ya'beyex a. Ho'on, Jehovahon, te Dioson awu'unique.

²⁶Ma me xawe'ic ti'bal te ay to sch'ich'ele. Ma me x'ochex ta sc'asesel chopol señahetic, soc ma me x'ochex ta jna'ojel.

²⁷Ma me xjoyetuc yac aset' ajolic, soc ma me xaset' te sni'il awisimique.

²⁸Ma me xawehchentes abaq'uetalic ta scaj te ay mach'a cham; soc ma me xapas loc'ombahetic ta anuhculelic.[15] Ho'on, Jehovahon.

²⁹Ma me xawac' ta bohlobtesbeyel sc'oblal te awantsil-nich'an yu'un yac awac' ta antsinel, scuenta yu'un ma ba ya xchicnaj j'antsinel-ants ta q'uinal te hich ya xnoj ta bintic chopol.

³⁰Canantayahic te sc'ahc'alel cux-o'tan cu'une, soc bayeluc me sc'oblal ta awo'tanic te ch'ul templo cu'une. Ho'on, Jehovahon.

³¹Ma me xbahex ta stojol te mach'atic ya sc'oponic ch'uhlelal, o ta stojol te jna'ojeletique; ma me ayuc bin yac ajoc'obeyic, como ya me xbohlob ac'oblalic yu'un. Ho'on, Jehovahon, te Dioson awu'unique.

³²Ya me atehc'an aba ta stojol te mach'a saquix sjol, ya me awich' ta muc' te me'el mamal; soc ya me axi' te Dios awu'une. Ho'on, Jehovahon.

³³C'alal ya sjoquinex ta nahinel ta aq'uinalic te jyanlum, ma xawuts'inic.

³⁴Hichuc me ta awo'tanic te bin ut'il alumal te jyanlum te ya xnahin ta awohlilic, c'ux me xawa'iy ta awo'tanic hich te bin ut'il c'ux yac awa'iy aba, como hich nix jyanlum ayinex ta sq'uinal Egipto. Ho'on, Jehovahon, te Dioson awu'unique.

³⁵Ma me ayuc bin ma stojiluc yac achahpan, o bin ma stojiluc ta sp'isel q'uinal, ta sp'isel yalal, o biluc ay ta p'isel.

³⁶Ya sc'an te stojiluc ta chahpanel te balanza, ts'acal ya xlihcawan, soc ts'acal sp'isol awu'unic. Ho'on, Jehovahon, te Dioson awu'unic te la jloq'uesex tal ta sq'uinal Egipto.

³⁷Canantaya te bintic chapal cu'un soc spisil te bintic caloje, ya me awa'telinic spasel. Ho'on, Jehovahon, xchi.