Read Tzeltal Levítico 22 Bible Online

Levítico 22 - Tzeltal bible

Levítico 22

¹Te Jehová la yalbe te Moisés:

²Halbeya te Aarón soc te snich'nab te ya me stsahtay sbahic ta lec yu'un te bintic ch'ultesbil te ya ya'bonic te snich'nab Israel, ma me sbohlobtesbonic sc'oblal te jch'ul bihile. Ho'on, Jehovahon.

³Halbeya ya'iyic te mach'ayuc winiquil ta spisil ats'umbal ta cajalcaj awu'unic, teme bohloben sc'oblal a ya xnohpoj tal ta stojol te bin ch'ultesbil ya ya'bonic te snich'nab Israel, ya me yich' loq'uesel ta jtojol. Ho'on, Jehovahon.

⁴Mach'ayuc winiquil te sts'umbal Aarón te yich'oj c'a'el-chamel o ay bin ya xmal loq'uel ta sbaq'uetal, ma me swe' te bin ch'ultesbil ha to c'alal lecubenix a. Te mach'a ya spic te bin chamen, o te winic te mahlem loq'uel snich'an,

⁵o teme la spic chambahlam te staset ya xbehen, te bohloben sc'oblal ya xc'oht yu'une, o te ya xpicot yu'un jtuhl winic te bohloben sc'oblal, chican biluc a te sbohlile;

⁶te mach'a hich ya spic, bohloben sc'oblal ya xhil c'alal ta yihc'ubel q'uinal, ma xhu' ya swe' te bin ch'ultesbil ha to teme atine.

⁷Lecubtesbil sc'oblal ya xc'oht te c'alal ya xmahl c'ahc'al, ta patil ya xhu' ya swe' te bin ch'ultesbil, como ha swe'el stuquel.

⁸Ma me swe' te bin chamen o te yich'oj ixtalanel yu'un ha'mal chambahlam, como ha bohloben sc'oblal ya xc'oht yu'un. Ho'on, Jehovahon.

⁹Ya me sch'uhumbonic spasel te bintic caloj ta mandar scuenta yu'un ma ba ya scuch smul a, yu'un hich ma ba ya xchamic yu'un te la sbohlobtesbe sc'oblale. Ho'on, Jehovahon, te ya jch'ultes.

¹⁰Ma mach'ayuc nax ya xhu' ya swe' te bin ch'ultesbile. Te yula' te sacerdote o te mach'a yac ta stojel ta a'tel ma xhu' ya swe' te bin ch'ultesbil.

¹¹Yan teme ya sman jtuhl ya'bat te sacerdote, ya xhu' ya swe' stuquel, hich nix te bin ut'il te mach'a ayinem ta sna ya xhu' ya swe' te we'elil yu'une.

¹²Te yantsil-nich'an sacerdote teme, ya xnuhpun soc te mach'a ma sacerdotehuc, ma xhu' ya swe' te mahtanil yu'un te bintic ch'ultesbilique.

¹³Yan teme hil ta me'ba' te yantsil-nich'an te sacerdote, o ihquitaybil yu'un smamalal, soc teme mayuc yalatac, teme suht xan tal ta sna stat, hich te bin ut'il c'alal ach'ix to a, ya xhu' ya swe'be te we'elil yu'un te state. Pero ma mach'ayuc nax ya xhu' ya swe'.

¹⁴Te mach'a ch'ayal yo'tan a ya swe' te bintic ch'ultesbile, ya ya'be te sacerdote te bin ch'ultesbil soc jun xan ta yo'ebal ya sutbe sjelol.

¹⁵Ma me sbohlobtesbeyic sc'oblal te bintic ch'ultesbil yu'un te snich'nab Israel, te parte yac'ojic ta stojol Jehová;

¹⁶ya me ya'beyic scuch smulic yu'un te la swe'ic te bintic ch'uhltesbilic. Ho'on, Jehovahon, te ya jch'ultes, xchi.

¹⁷Te Jehová la yalbe xan te Moisés:

¹⁸Halbeya te Aarón soc snich'nab soc spisil te snich'nab Israel: Mach'ayuc winiquil ta Israel o jyanlum ay ta Israel te ya yac' mahtanil scuenta sc'ohtesel ta pasel te bin schapoj, o ta scuenta nax sc'anojel yo'tan ya ya'be scohtol chic'bil smahtan te Jehová,

¹⁹scuenta yu'un ya x'ich'bot ta cuenta a ya sc'an ya yac' stat chambahlam te mayuc bin jihnem yu'un, teme toro, tuminchij, o tentsun.

²⁰Ma me xawac' te ay bin jihnem yu'un, como ma ba ya x'ich'botat ta cuenta.

²¹Ha nix hich, teme ay mach'a ya ya'be milbil mahtanil scuenta lamal q'uinal te Jehová scuenta sc'ohtesel ta pasel te bin schapoj, o mahtanil scuenta nax sc'anojel yo'tan, teme wacax, tuminchij o tentsun, scuenta yu'un ya x'ich'bot ta cuenta a ma me ayuc bin jihnem yu'un te bin ya yaq'ue.

²²Ma me xawa'beyic Jehová chambahlam te ts'o'sit, te waq'uem yoc, ay bin jihnem, ay sch'ohquil, ay salul o te ay schinul, ma me xawaq'uic ta chic'bil mahtanil ta scajtajib ta chiq'uel mahtanil yu'un Jehová.

²³Te toro o tuminchij te stalel ay sobra o ma ts'acaluc ta sbaq'uetal, ya xhu' yac awac' scuenta mahtanil yu'un sc'anojel awo'tan. Yan teme ha mahtanil scuenta sc'ohtesel ta pasel te bin achapoje, ma x'ich'botat ta cuenta.

²⁴Ma xawa'beyic smahtanin Jehová chambahlam te ehchenajem te sbac', o te t'usbil, jot'bil o set'bil. Ma me hichuc xapasic ta aq'uinalic.

²⁵Soc ma xawich'beyic ta sc'ab jyanlum te hich yilel chambahlametic, yu'un yac awaq'uic scuenta we'el yu'un te Dios awu'unic, como yich'oj sbohlilic, ay bin jihnem yu'unic, ma x'ich'botat ta cuenta, xchi.

²⁶Te Jehová la yalbe te Moisés:

²⁷Te c'alal ya xtohc jcoht wacax, tuminchij o tentsun, huqueb c'ahc'al ya sjoquin sme', pero ta swaxaquebal c'ahc'al stohquel a, ya xhu' ya yich' aq'uel scuenta chic'bil smahtan Jehová.

²⁸Ma me junuc nax sc'ahc'alel yac amil soc yal te me' wacax, tuminchij o tentsun.

²⁹Te c'alal yac awa'be smahtan Jehová ta scuenta yalbeyel wocol, stojil me xawac' scuenta yu'un ich'bil ta cuenta ya xc'oht a.

³⁰Ta yorahil nix ya me yich' we'el, ma me ayuc bin ya xhil ta yan c'ahc'al. Ho'on, Jehovahon.

³¹Ac'a c'ohtuc ta pasel awu'unic te mandariletic cu'un, ch'uhunahic me spasel. Ho'on, Jehovahon.

³²Ma me xabohlobtesbonic sc'oblal te jch'ul bihil, scuenta yu'un ch'ul Dioson ya xc'ohon ta yohlil te snich'nab Israel. Ho'on, Jehovahon, te ya jch'ultesex,

³³soc te la jloq'uesex tal ta sq'uinal Egipto scuenta yu'un Dioson ya xc'ohon awu'unic. Ho'on, Jehovahon, xchi.