Read Tzeltal Levítico 23 Bible Online

Levítico 23 - Tzeltal bible

Levítico 23

¹Te Jehová la yalbe te Moisés:

²Halbeya te snich'nab Israel: Te q'uinetic yu'un Jehová, te yac apuquic ta halel te ha ch'ul tsoblejetic, hich ayic:

³Waqueb c'ahc'al ay a'tel, yan te shuquebal c'ahc'al ha sc'ahc'alel cux-o'tan, ha sc'ahc'alel ch'ul tsoblej; ma me x'a'tejex a. Ha sc'ahc'alel cux-o'tan ta scuenta Jehová ta bayuc te ya xnahinex.

⁴Hich ay te q'uinetic yu'un Jehová, ha te ch'ul tsoblejetic te yac apasic ta mero yorahil:

⁵Ta schanlajunebal c'ahc'al ta shahchel u, ta yihc'ubel q'uinal, ha te Pascua yu'un Jehová.

⁶Ta yo'lajunebal c'ahc'al ta u ini ha te q'uin yu'un Jehová scuenta Pan te ma ba yich'oj levadura; huqueb c'ahc'al yac awe'ic pan te ma ba yich'oj levadura.

⁷Ta sba c'ahc'alil ay ch'ul tsoblej awu'unic; ma me xapas awa'telic a.

⁸Huqueb c'ahc'al yac awa'beyic chic'bil mahtanil te Jehová. Ta shuquebal c'ahc'al ay ch'ul tsoblej, ma me xapas awa'telic a, xchi.

⁹Te Jehová la yalbe te Moisés:

¹⁰Halbeya te snich'nab Israel: Te c'alal ya x'ochex bahel ta q'uinal te ya ca'beyex, te c'alal yac awa'iyic c'ajoj, ya me awich'be tal ta stojol sacerdote te sba tohmol yu'un te ac'ajoje.

¹¹Te sacerdote ya stuchilan te sba tohmol ta stojol Jehová scuenta yu'un hich ay ta cuenta ya xc'ohex a; ya stuchilan ta schebal c'ahc'al te sc'ahc'alel cux-o'tan.

¹²Te bin c'ahc'alil yac awac' te jtohm, ya me awac' jcoht jcolel tuminchij te ay jun ya'bilal, te mayuc bin jihnem yu'un, scuenta scohtol chic'bil mahtanil ta stojol Jehová.

¹³Yac awac' scuenta mahtanil harina cheb ta slajunebal[18] efa lequil harina wots'bil ta aceite, ha mahtanil te ya yich' chiq'uel ta stojol Jehová te buen sumet yic'. Te mahtanil te ya yich' malel, ha jun ta schanebal hin[19] vino.

¹⁴Ma me xawe'ic pan, ch'ilbil sit o yach'il sit ha to ta c'ahc'alil ini, ha to teme awac'ojix a te mahtanil yu'un te Dios awu'une. Ha mandaril te ma xlaj sc'oblal ta cajalcaj ats'umbalic ta bayuc te ya xnahinexe.

¹⁵Ta schebal c'ahc'al te sc'ahc'alel cux-o'tan, te bin c'ahc'alil la awaq'uic te jtohm scuenta tuchilambil mahtanil, yac awahtayic ts'acal huqueb semana.

¹⁶Yac awahtayic lajuneb yoxwinic (50) c'ahc'al ha to c'alal ta schebal c'ahc'al sc'axel a te shuquebal sc'ahc'alel cux-o'tan; ta hich ora ya me awa'beyic smahtanin yach'il harina te Jehová.

¹⁷Ta banti anahic yac awich'ic tal cha'pehch pan pasbil ta cheb ta slajunebal efa lequil harina, ta'ajtesbil soc levadura, scuenta mahtanil sba sit ta stojol Jehová.

¹⁸Yac awa'be sjoquin sba soc te pan huqueb jcolel tat tuminchij te jujun ya'bilal, te mayuc bin jihnem yu'unic, soc jcoht jcolel toro soc cha'coht tat tuminchij; ha scohtol chic'bil mahtanil yu'un Jehová, soc te mahtanil harina soc te malbil mahtaniletic, ha mahtanil te sumet yic' te ya yich' chiq'uel ta stojol Jehová.

¹⁹Soc ya me awaq'uic jcoht tat tentsun scuenta mahtanil yu'un mulil, soc cha'coht jcolel tat tuminchij te jujun ya'bilal yu'un milbil mahtanil scuenta lamal q'uinal.

²⁰Te sacerdote ya yac' scuenta tuchilambil mahtanil ta stojol Jehová, soc ya yac' te pan yu'un sba sit soc te cha'coht tuminchijetic. Ha te bin ch'ultesbil ta stojol Jehová te ha yu'un te sacerdote.

²¹Ha nix ta sc'ahc'alel a ya me apasic ch'ul tsoblej, ma me xapas awa'telic a. Ha mandaril te ma xlaj sc'oblal ta cajalcaj ats'umbalic ta bayuc te ya xnahinex.

²²Te c'alal yac awa'iyic c'ajoj ta aq'uinalic, ma xac'aj c'alal ta mero sti'il, soc ma xatamic te banti hileme; ihquitaya hilel yu'un te pobre soc te jyanlum. Ho'on, Jehovahon, te Dioson awu'unique, xchi.

²³Te Jehová la yalbe te Moisés:

²⁴Halbeya te snich'nab Israel: Ta sba c'ahc'alil ta shuquebal u ay me sc'ahc'alel cux-o'tan awu'unic, ha ch'ul tsoblej awu'unic te c'alal ya x'oc' xulubiletic.

²⁵Ma me xapas awa'telic a, soc ya me awa'beyic chic'bil mahtanil te Jehová, xchi.

²⁶Te Jehová la yalbe xan te Moisés:

²⁷Ta slajunebal c'ahc'alil ta shuquebal u, ha me te Sc'ahc'alel Stojel Mulil; ay me ch'ul tsoblej awu'unic, ya me acom awe'elic soc ya me awa'beyic chic'bil mahtanil te Jehová.

²⁸Ma me ayuc bin a'telil yac apasic a, como ha Sc'ahc'alel Stojel Mulil, yu'un ya yich' tojel amulic ta stojol Jehová te Dios awu'unique.

²⁹Spisil mach'a ma ba ya scom swe'el a, ya me yich' loq'uesel ta stojol te slumale.

³⁰Soc mach'ayuc a te ya spas biluc a'telil a, ho'on ya jin loq'uel ta yohlil te slumale.

³¹Ma me ayuc bin a'telil yac apasic a; ha mandaril te ma xlaj sc'oblal ta cajalcaj ats'umbal ta bayuc te ya xnahinex.

³²Ha sc'ahc'alel cux-o'tan awu'unic, ya me acom awe'elic; ya xhahch ta stibiltayel q'uinal ta sbalunebal c'ahc'al yu'un te u; ta stibiltayel q'uinal c'alal ta yan stibiltayel q'uinal ya me acux awo'tanic, xchi.

³³Te Jehová la yalbe te Moisés:

³⁴Halbeya te snich'nab Israel: Ta yo'lajunebal c'ahc'al ta shuquebal u, ya me yich' pasel scuenta huqueb c'ahc'al te Q'uin yu'un Yaxnahetic[20] ta stojol Jehová.

³⁵Ta sba c'ahc'alil ay ch'ul tsoblej awu'unic; ma me xapas awa'telic a.

³⁶Huqueb c'ahc'al yac awa'beyic chic'bil mahtanil te Jehová; ta swaxaquebal c'ahc'al ay ch'ul tsoblej awu'unic soc yac awa'beyic chic'bil mahtanil te Jehová. Ha q'uin, ma me xapas awa'telic a.

³⁷Ha te q'uinetic yu'un Jehová ini te yac apuquic ta halel te ha ch'ul tsoblejetic awu'unic yu'un yac awa'beyic chic'bil mahtanil te Jehová, ha te scohtol chic'bil mahtanil, mahtanil harina, milbil mahtanil soc malbil mahtaniletic, te jujuchahp ta mero yorahil;

³⁸soc xan te sc'ahc'alel cux-o'tan yu'un Jehová, te yan mahtaniletic awu'unic, te bin yac awaq'uic yu'un te bin achapojic, soc spisil te mahtaniletic scuenta sc'anojel awo'tanic te c'ahyemex ta ya'beyel te Jehová.

³⁹Ta yo'lajunebal c'ahc'al ta shuquebal u, te c'alal tsobilix awu'unic a te sit ya yac' te lumq'uinal, ya me apasic q'uin huqueb c'ahc'al ta stojol Jehová. Ya me acux awo'tanic ta sba c'ahc'al soc ta swaxaquebal c'ahc'al.

⁴⁰Ta sba c'ahc'al yac awich'ic tal te sit yu'un te mero lequil te'etic, soc ya'binal xahn, sc'ab te'etic te bayel ya'binal soc sauce-te'etic ay ta ti'ti'ha'etic; huqueb c'ahc'al buen tse'eluc me awo'tanic ta stojol Jehová te Dioson awu'unique.

⁴¹Ta jujun ha'bil ya me apasic q'uin ta stojol Jehová huqueb c'ahc'al. Ha mandaril te ma xlaj sc'oblal ta cajalcaj ats'umbalic. Ya me apasic ta shuquebal u.

⁴²Huqueb c'ahc'al ya xnahinex ta yaxnahetic; spisil sts'umbal Israel ya me xnahinic ta yaxnahetic,

⁴³scuenta yu'un ya sna'ic a te ats'umbalic te la jcac' ta nahinel ta yaxnahetic te snich'nab Israel te c'alal la jloq'ues tal ta sq'uinal Egipto. Ho'on, Jehovahon, te Dioson awu'unique, xchi.

⁴⁴Te Moisés hich la yalbe te snich'nab Israel sc'oblal te q'uinetic yu'un Jehová.