Read Tzeltal Levítico 24 Bible Online

Levítico 24 - Tzeltal bible

Levítico 24

¹Te Jehová la yalbe te Moisés:

²Pasa ta mandar te snich'nab Israel te ac'a yich'bat tal lequil aceite yu'un pits'bil olivahetic scuenta yu'un hich ya xtihl spisil ora te tsumbil c'ahq'ue.

³Ta fuera yu'un te tsalul pac' yu'un te Testigo-c'op, ta Nahilpac' Templo yu'un tahojibal, te Aarón ya schahpan te c'ahc' ta stojol Jehová ta yihc'ubel q'uinal c'alal ta sacubel q'uinal; ha mandaril te ma xlaj sc'oblal ta cajalcaj ats'umbalic.

⁴Ya me schahpanlan te tsumbil c'ahc' ta yawilic te ayic ta scajtajib c'ahc' pasbil ta puro oro, scuenta yu'un ya xtihl spisil ora ta stojol Jehová.

⁵Ya me atsac lequil harina soc yac ata'ajtes lahchaypehch pan, cheb ta slajunebal efa[21] te jujupehche.

⁶Yac awac' ta cha'chohl, wacpehch ta jujuchohl, ta ba mesa pasbil ta puro oro ta stojol te Jehová.

⁷Soc yac awa'be lequil pom ta jujuchohl, te ha ya sjoquin te pan scuenta sna'ojibal yu'un mahtanil ya yich' chiq'uel ta stojol Jehová.

⁸Ta jujun sc'ahc'alel cux-o'tan ya me yich' chahpanel ta stojol Jehová, ta scuenta sbihil te snich'nab Israel, scuenta chapbil-c'op te stalel ay.

⁹Ha yu'un Aarón soc snich'nab te pane, ya swe'ic ta lugar te ch'ultesbil, como ha te bin mero ch'ultesbil yu'un te chic'bil mahtaniletic te ha yu'un Aarón soc snich'nab te ya yich' chiq'uel ta stojol Jehová, xchi.

¹⁰Ta hich ora ay jtuhl winic te ha yal jtuhl israel-ants, pero ha egipcio-winic te state, loc' bahel ta yohlil te snich'nab Israel. Te yal israel-ants soc jtuhl israel-winic la stsac sbahic ta campamento.

¹¹Te yal israel-ants la slaban soc la sbohlc'optay te Bihilil;[22] ha yu'un la yiq'uic bahel ta stojol Moisés. (Selomit sbihil te snane, ha yantsil-nich'an Dibri, sts'umbal Dan).

¹²La schuquic ha to c'alal ya xhalbotic yu'un Jehová bin ya spasbeyic.

¹³Te Jehová la yalbe te Moisés:

¹⁴Ic'a loq'uel ta campamento te jbohlc'optaywanej. Spisil te mach'atic la ya'iyic bin la yal ac'a scajan sc'abic ta sjol soc ac'a sch'ojic ta ton spisil te pueblo.

¹⁵Hich yac awalbe te snich'nab Israel: Mach'ayuc a te ya sbohlc'optay te Dios yu'une, ya me scuch smul.

¹⁶Te mach'a ya sbohlc'optaybe sbihil te Jehová ya me xlaj yu'un; spisil te pueblo ya ch'ojic ta ton. Teme jyanlum o slumal nix, teme ya sbohlc'optay te Bihilile, ya me xlaj.

¹⁷Te mach'a ya ya'iy milaw, ya me yich' milel.

¹⁸Te mach'a ya smilbe schansbahlam yan, ya me sjeltay: te chambahlam la smil, chambahlam ya sut.

¹⁹Te mach'a ya yehchentes spat-xuhc, chican bin la spas, ha nix hich ac'a yich' pasbeyel:

²⁰teme la swac'be sbaquel, sbaquel nix ya yich' wac'beyel, teme ta sit, ta sit nix; teme ta ye, ta ye nix; chican bin ehchenil la ya'be te yane, hich nix ya x'a'bot.

²¹Te mach'a ya smil chambahlam, ya me sjeltay, pero te mach'a ya smil ants-winic, ya me yich' milel.

²²Junax mandaril yu'un te jyanlum soc te mach'a slumal nix. Ho'on, Jehovahon, Dioson awu'unic, xchi.

²³Te Moisés la sc'opon te snich'nab Israel, hich la sloq'uesic bahel ta campamento te jbohlc'optaywanej, la sch'ojic ta ton. Te snich'nab Israel la spasic hich te bin ut'il halbot yu'un Jehová te Moisés.