Read Tzeltal Levítico 25 Bible Online

Levítico 25 - Tzeltal bible

Levítico 25

¹Te Jehová la yalbe te Moisés ta wits Sinaí:

²Halbeya te snich'nab Israel: Te c'alal ochemexix ta q'uinal a te ya ca'beyex, ya me scux yo'tan te lumq'uinal ta scuenta Jehová.

³Waqueb ha'bil yac awa'iy ts'umbajel ta aq'uinal, soc waqueb ha'bil yac achahpan te ts'usubil awu'un soc yac atulbe te site.

⁴Pero ta shuquebal ha'bil ya me scux yo'tan te lumq'uinal, ha cux-o'tan ta scuenta Jehová; ma me xawa'iy ts'umbajel ta aq'uinal soc ma me xaloq'uesbe staquin c'ab te ats'usubile.

⁵Te bin stuquel nax ya xcol ta aq'uinal banti la awa'iy c'ajoj, ma me xac'aj; soc ma me xatulbe sit ats'usubil. Ha me ha'bil scuenta cux-o'tan yu'un te lumq'uinale.

⁶Te sit ya yac' ta stuquel nax te lumq'uinal te c'alal ay ta cux-o'tan, tic' ya xwe'at a soc awa'bat, acriada, te j'a'tel awu'un soc te jyanlum sjoquinejat ta nahinel,

⁷soc nix te achanabahlam soc te yantic chambahlametic ayic ta aq'uinal, spisil te sit ha ya swe'ic.

⁸Ya me awahtay huqueb semana yu'un ha'biletic, huqueb buelta te huqueb ha'bil, hich ya xloc' baluneb yoxwinic (49) ha'bil ta spisil.

⁹Ya me awac' ta tulan oq'uesinel xulubil ta slajunebal c'ahc'alil yu'un te shuquebal u; ta Sc'ahc'alel Stojel Mulil yac awoq'uesinic xulubil ta spahmal aq'uinal.

¹⁰Ya me ach'ultesic te slajunebal yoxwinic (50) ha'bil, yac awalic ta bayuc te libre ay spisil mach'atic nahinemic tey a. Ha te ha'bil ya xhilex ta libre; jujutuhl ya suht bahel ta sq'uinal, jujutuhl ya suht bahel ta yohlil mach'atic ay yu'un.

¹¹Te lajuneb yoxwinic (50) ha'bil ha te ha'bil yu'un te ya xhilex ta libre. Ma xawa'iyic ts'umbajel, ma xac'ajic te bin stuquel nax ya xcol ta aq'uinal, soc ma xatulbeyic sit ats'usubilic,

¹²como ha yorahil hilel ta libre; ch'ultesbil ya me xc'oht awu'unic. Yac awe'ic te bin ya yac' te lumq'uinale.

¹³Ta ha'bil yu'un hilel ta libre apisilic ya me suhtex xan ta aq'uinalic.

¹⁴Teme ay yac achombe o yac amambe q'uinal te apat-axuhc, ma me xalo'loy abahic.

¹⁵Teme yac amambe sq'uinal te apat-axuhc yac awich' ta cuenta jayebix ha'bil sc'axel a te ha'bil yu'un hilel ta libre; ha ya sc'ambat stojol te jayeb xan ha'bil te ya sitine.

¹⁶Teme bayel to xan ha'bil, bayel stojol ya xloc', teme mayuquix bayel ha'bil, mayuc bayel stojol; como ha ya schombat te jayeb xan buelta ya sitin.

¹⁷Ma me ayuc mach'a ya slo'loy te spat-xuhc, ya me axi'ic te Dios awu'unique; como ho'on, Jehovahon, te Dioson awu'unique.

¹⁸Ch'uhunahic spasel te mandariletic cu'un, c'ohtuc me ta pasel awu'unic te bintic caloj ta mandar, pasahic me, hich jun awo'tanic ya xnahinex ta q'uinal a.

¹⁹Ya me sitin te lumq'uinal, ya xwe'ex ha to c'alal ya xnoj ach'uhtic yu'un, soc jun awo'tanic ya xnahinex tey a.

²⁰Hich wan yac awalic: ¿Bin ya jwe'tic ta shuquebal ha'bil? Ma ba ya ca'iytic ts'umbajel soc ma ba ya jtsobtic te sit awal-ts'unubil, xchihex.

²¹Ya ca'beyex bendición ta swaquebal ha'bil, te jayeb ya yac' tic' ya xtuhun awu'unic scuenta oxeb ha'bil.

²²C'alal yac awa'iyic ts'umbajel ta swaxaquebal ha'bil, yac awe'ic te bin q'uejbil, ha to bin ora ya yac' sit ta sbalunebal ha'bil.

²³Te q'uinal ma xhu' ta chonel ta jc'axel, como ho'on cu'un te q'uinale; te ha'exe jbehyom soc jyanlum c'ohemex ta jtojol.

²⁴Ha yu'un, ta spisil te q'uinal awu'untayejic ya me awaq'uic te ya xhu' ya suht te q'uinale.

²⁵Teme ay ya xhil ta pobrehil jtuhl alumal, teme ay ya schon j'ohlil te sq'uinale, ya me xtal te smohlol sts'ahquil, ya sman suhtel te bin la schon te yermanohe.

²⁶Teme ay winic te mayuc mach'a ya xcoltayot ta smanel te sq'uinale, pero teme ya xhu' slehbel bin ut'il ya sman xan suhtele,

²⁷ya me yahtay te jayebix ha'bil te la schon, ya stojbe te mach'a la sman te jayeb xan ha'bil ya xhil, hich ya suht xan ta sq'uinal.

²⁸Pero teme ma ba hu' yu'un stahel te hich yipal ya sc'an yu'un ya sutbot a te sq'uinale, ya xhil ta stojol te mach'a la sman ha to c'alal ya xtal te ha'bil yu'un hilel ta libre, ha yorahil a te ya xhil ta libre, hich ya suht xan ta sq'uinal te winique.

²⁹Te mach'a ya schon sna te ay ta pueblo te ay sts'ahcul, ya xhu' ya sman xan suhtel c'alal to ta jun ha'bil te la schone; jun ha'bil ya xhu' ya sman xan suhtel.

³⁰Pero teme ma ba hu' ta manel xan ta sjunal ha'bil, te na te ay ta pueblo te ay sts'ahcul jc'axel ya xhil ta scuenta te mach'a la sman soc te sts'umbale; ma ba ya xhil ta libre ta ha'bil yu'un hilel ta libre.

³¹Yan te nahetic ayic ta pueblohetic te mayuc sts'ahcul, ha nix hich sc'oblal ya xhil te bin ut'il te q'uinale; ya xhu' ya yich' xan manel suhtel, soc ya xhil ta libre ta ha'bil yu'un hilel ta libre.

³²Pero te pueblohetic yu'un te levitahetic biluc ora ya xhu' ya smanic xan te nahnatic ayic ta yutil te pueblohetic yu'unique.

³³Te mach'a la smambe sna te levita ya me xloc' ta na te la yich' chonel ta pueblo yu'un te levitahetic ta yorahil te ha'bil yu'un hilel ta libre, como te nahetic ay ta pueblohetic yu'un te levitahetic ha me yu'unic ta yohlil te snich'nab Israel.

³⁴Yan te aquiltic yu'un te pueblohetic yu'unic, ma xhu' ta chonel, como stalel yu'un stuquelic.

³⁵Teme ay ya x'och ta pobrehil jtuhl alumal, teme ya xtal ta atojol, ya me acoltay; ha ya sjoquinat ta nahinel hich te bin ut'il jbehyomal o jyanlum.

³⁶Ma xac'ambe sjol te ataq'uin soc ma xapas ganar ta scuenta, ya me axi' te Dios awu'un, scuenta yu'un ya xhil ta nahinel ta awohlil te awermanohe.

³⁷Ma xawac' te ya stojbe sjol te ataq'uin yac awa'be ta majanel, soc ma xatoybe stojol te we'elil yac achombe.

³⁸Ho'on, Jehovahon, te Dioson awu'unic te la jloq'uesex tal ta sq'uinal Egipto yu'un ya ca'beyex te sq'uinal Canaán scuenta yu'un ho'on Dioson awu'unic ya xc'ohon.

³⁹Teme ay och ta pobrehil jtuhl alumal te sjoquinejat, teme ya schon sba ta atojol, ma hichuc xawac' ta a'tel te bin ut'il amoso.

⁴⁰Hichuc me ya sjoquinat te bin ut'il jle-a'tel o jyanlum. Ya x'a'tej ta atojol ha to c'alal yorahil te ha'bil yu'un hilel ta libre.

⁴¹Ta hich ora libre ya xloc' bahel ta ana soc snich'nab, ya suht bahel ta stojol te mach'atic ay yu'un soc ta sq'uinal te me'iltatiletic yu'une,

⁴²como ha a'batetic cu'un te la jloq'ues tal ta sq'uinal Egipto; ma me xyich'ic chonel hich bin ut'il moso.

⁴³Ma me toyoluc xawac' aba ta scuentahinel, ya me axi' te Dios awu'une.

⁴⁴Te moso-winic soc te moso-ants awu'un ha ya xtalic ta yantic nacionetic te ayic ta ajoyobal; tey ya xhu' yac aman a te mosohetic awu'une.

⁴⁵Soc ya xhu' yac amambe yal-snich'nab soc te mach'atic ay yu'un te jbehyomal te ayinemic ta aq'uinalic soc te ya xnahinic ta awohlilic, ya xhu' te ha awu'unic ya xc'ohtic.

⁴⁶Ya xhu' yac awa'beyic hilel te mosohetic ta scuenta awal-anich'nabic te c'alal ya xchamex, scuenta yu'unic ya xhilic; spisil ora ya xhu' yac awa'batinic; pero ma me xawa'batin te awermanotac ta Israel, ma me toyoluc xawac' aba ta scuentahinel.

⁴⁷Teme ay jbehyom o jyanlum ta awohlilic te ya xc'ulejub, pero teme ay alumal te nopol ay sna soc te ya xhil ta pobre, teme ya schon sba ta stojol te jbehyom o jyanlum ay ta awohlilic, o ta stojol mach'atic ay yu'un te jyanlume,

⁴⁸ya xhu' ya yich' xan manel loq'uel c'alal schonoj sba a. Te jtuhl yermano ya xhu' ya sman yu'un ya xhil ta libre,

⁴⁹o te stajun, snich'an stajun o yan smohlol sts'ahquil ya xhu' ya sman yu'un ya xhil ta libre; o teme ay bin ya sta, ya xhu' ya scoltay sba a.

⁵⁰Ya me yahtay soc te mach'a manot yu'un, ya xhahch ta bin ora la schon sba ha to c'alal ta yorahil te ha'bil hilel ta libre; hich ya xc'oht te stojol te bin ut'il jayeb habil la sjoquin soc hich te bin ut'il jayeb ya yich' tojel jtuhl jle-a'tel.

⁵¹Teme bayel to ha'bil ya sc'an, hich yipal ya suht te taq'uin te schonoj sba a, yu'un hich ya xhil ta libre.

⁵²Teme nopolix te ha'bil yu'un hilel ta libre, ya spas cuenta soc, hich yipal ya suht scuenta scolel te jayeb xan ha'bil ay to sc'an.

⁵³Hich ya xc'oht awu'un te bin ut'il jtuhl jle-a'tel te yaloj te ta ha'bil ya x'a'teje. Ya me awil te ma ba ya x'uts'inot yu'un te yajwale.

⁵⁴Teme ma ba mambot loq'uel ta hich ora, ya me xhil ta libre soc snich'nab ta yorahil te ha'bil yu'un hilel ta libre,

⁵⁵como ha a'batetic cu'un te snich'nab Israel; ha a'batetic cu'un te la jloq'ues tal ta sq'uinal Egipto. Ho'on, Jehovahon, te Dioson awu'unic.