Read Tzeltal Levítico 26 Bible Online

Levítico 26 - Tzeltal bible

Levítico 26

¹Ma me xapas loc'ombahetic o bin loc'taylambil, ma me xatehc'an ch'ultesbil ton, soc ma me xawac' ta aq'uinalic chahpambil ton yu'un yac aquejan abahic ta stojol; como ho'on, Jehovahon, te Dioson awu'unique.

²Canantayahic te sc'ahc'alel cux-o'tan cu'un, soc ich'ahic ta muc' te ch'ul awilal cu'une. Ho'on, Jehovahon.

³Teme yac at'unic te bintic caloj ta mandar soc teme yac atsahtayic ta pasel te mandariletic cu'une,

⁴ya jticombeyex tal ha'al ta yorahil, soc te awal-ts'unubil soc te te'etic ya me yac'ticlan sit.

⁵Yaquex to ta swuyel trigo a te ya sta yorahil stsobel te ts'usube, soc yaquex to ta stsobel ts'usub a te ya sta yorahil awal; yac awe'ic pan ha to c'alal ya xnoj ach'uhtic, soc jun awo'tan ya xnahinex ta aq'uinalic.

⁶Ya cac' lamal q'uinal, soc mayuc mach'a ya xiwtesex c'alal wayalex a; ya cac' loc'uc ta aq'uinalic te chopol chambahlametic, soc ma xc'ax ta aq'uinalic te espadahe.

⁷Yac anutsic bahel acontrahic, te ya xlajic ta espada ta atojolic.

⁸Ho'tuhlex yac anutsic bahel ho'winic (100) ta tuhl; ho'winiquex (100) yac anutsic bahel lajunmil (10,000) ta tuhl; soc te acontrahic ya me xlajic ta ye espada ta atojolic;

⁹yu'un ho'on ya suhton ta atojolic, ya cac' xp'ohluquex, ya cac' esmajuquex soc ya cac' c'ohtuc ta acuentahic te chapbil-c'op cu'une.

¹⁰Yac awe'ic te bin namey q'uejbilix, yac aloq'uesic te bin q'uejbil scuenta yu'un tey yac awaq'uic a te bin yach'il.

¹¹Ya xnahinon ta awohlilic, soc ma ba ya quihlayex ta co'tan.

¹²Ya xbehenon ta awohlilic, ho'on Dioson awu'unic ya xc'ohon soc ha'ex pueblohex cu'un ya xc'ohex.

¹³Ho'on Jehovahon, te Dioson awu'unic, te la jloq'uesex tal ta sq'uinal Egipto scuenta yu'un ma ba ya smosohinex; la jtuch'be schuhquil te yugo awu'unic soc la jcac' te atoyoj ajolic a ya xbehenex.

¹⁴Pero teme ma ba yac awa'iybonic te jc'op soc teme ma ba yac apasic spisil te mandariletic cu'un,

¹⁵teme yac ap'ajbonic te bintic caloj ta mandar, teme mayuc sc'oblal ta awo'tanic te bintic chapal cu'un, teme ma ba yac awaq'uic c'ohtuc ta pasel te mandariletic cu'un, teme mayuc ta cuenta ya xc'oht awu'unic te chapbil-c'op cu'une,

¹⁶hich me ya jpasbeyex ta atojolic: ya jticombeyex tal ta atojolic tulan xiwel, tulan chamel soc c'ahc' te ya sjin sitil soc te ya yac' pich'il-o'tanil. Tojol yac awa'iyic ts'umbajel, yu'un ha ya swe'ic te acontrahique.

¹⁷Ya jcontrahinex, yac awich'ic ehchentesel yu'un te acontrahique. Ya ya'batinex te mach'atic ya sp'ajex, soc ya xloq'uex ta ahnel aunque mayuc mach'a ya snutsex.

¹⁸Teme ma ba yac awa'iybonic jc'op aunque hich ya jpasbeyex, ya jtoy huqueb xan buelta te castigo yu'un te amulique.

¹⁹Ya jlajimbe te yip atoybahilic, ya cac' te taq'uin ya xc'oht te ch'ulchan soc bronce ya xc'oht te aq'uinale.

²⁰Tojol yac alajin awipic, como te q'uinal awu'unic mayuc bin ya yac' soc ma ba ya yac' sit te te'etic ay ta q'uinale.

²¹Teme ya to acontrahinonic xan, teme ma xac'an yac awa'iybonic te jc'ope, ya jtoybeyex huqueb xan buelta castigo yu'un te amulique.

²²Soc ya jticombeyex tal ta atojolic ti'awal chambahlametic te ya slajimbeyex awal-anich'nabic, te ya smilbeyex awacaxic soc te ya spehc'ambeyex awahtalulic, hich jochol ya xhil te behetic awu'unique.

²³Teme ma ba ya xtojobex yu'un te castigo, teme stalel yac acontrahinonic,

²⁴ha nix hich ya jcontrahinex, ya jtoybeyex huqueb buelta castigo yu'un te amulique.

²⁵Ya cac' taluc espada ta atojolic scuenta spacol sc'axuntayel te chapbil-c'op. Teme yac ale awahnibic ta apueblohic, ya jticon tal jmilawal-chamel ta atojolic soc ya x'ochex ta sc'ab te acontrahique.

²⁶Te c'alal ya jlajimbeyex awe'elic, lajuntuhl antsetic ya spaybeyex spisil awe'elic ta junax horno, p'isbil ya spucbeyex awe'elic, ma ba ya xnoj ach'uhtic yu'un.

²⁷Teme ma to xawa'iybonic te jc'op, teme ya to acontrahinonic,

²⁸ha nix hich ya jcontrahinex soc quilimba soc ya jtoybeyex huqueb buelta castigo yu'un te amulique.

²⁹Yac ati'beyic sbaq'uetal te ach'ix-queremetic awu'unique.

³⁰Ya jlajimbeyex te toyol awilaletic awu'unic, ya jimbeyex te scajtajib ta chiq'uel pom awu'unic soc ya jbusambeyex te chamen-abaq'uetalic ta sba te chamen-sbaq'uetal loc'ombahetic awu'unic; ihlaybil ya xc'ohex ta co'tan.

³¹Jc'axel jochol ya xhil cu'un te pueblohetic awu'unic, ya jimbeyex te ch'ul awilaletic awu'unic soc ma ba ya jsic'be sumumal yic' te lequil perfume awu'unique.

³²Ya jin te lumq'uinal, mero xcham yo'tanic yu'un te acontratac te ya xnahinic tey a.

³³Ya jpuquex bahel ta yantic nacionetic, ya jloq'ues te espada cu'un, ya jnutsex bahel; jc'axel jimbil ya xhil te aq'uinalic soc jc'axel jochol ya xhil te pueblohetic awu'unique.

³⁴Hich te lumq'uinal tse'el yo'tan ya scux yo'tan te jayeb c'ahc'al jimbil ya xhil, te c'alal ayex ta sq'uinal a te acontrahique; hich ya scux yo'tan te lumq'uinal soc buen tse'el yo'tan yu'un te jayeb c'ahc'al ya scux yo'tan.

³⁵Te jayeb tiempo jihnem ya xhil, ya scux yo'tan yu'un te jayeb tiempo ma ba la scux yo'tan te c'alal nahinex tey a.

³⁶Te mach'atic hilem awu'unic, ya cac' taluc xiwel ta yo'tanic tey ta sq'uinalic te scontrahique; nutsbil ya ya'iy yu'un teme ya ya'iybe sc'op ya'binal te' tembil ta ic', ya me xloq'uic ta ahnel hich te bin ut'il tembilic ta espada ya ya'iyic, soc ya xyahlic aunque mayuc mach'a nutsbilic yu'un.

³⁷Ya syahlteslan sbahic hich te bin ut'il yacalic ta ahnel yu'un espada, aunque mayuc mach'a nutsbilic yu'un. Ma xhu' awu'unic te yac atehc'an abahic ta stojol te acontrahique.

³⁸Ya xlajex ta yohlil te nacionetic, soc ya slajinex te sq'uinal te acontrahique.

³⁹Te mach'atic hilem awu'unic ya xlaj bahel yipic ta sq'uinal acontrahic ta scaj smulic; soc pajal ya xlaj bahel yipic soc sme'static ta scaj te smulique.

⁴⁰Yan teme jamal ya yalic te smulic soc te smul sme'static, ha te la stoy sbahic ta jtojol soc te la scontrahinonic,

⁴¹te ha la jcontrahinic yu'un soc te la cac' ochuquic ta sq'uinal te scontrahic, teme ya spehc'an te yo'tanic te ma ba yich'ojic circuncisión, teme ya sna'ic te ay smulique,

⁴²hich ya jna' a te jc'op la jchahp soc Jacob, soc te jc'op la jchahp soc Isaac, soc te jc'op la jchahp soc Abraham, soc ya jna' te lumq'uinale.

⁴³Pero ya xhil yu'unic te q'uinale, bayel me yutsil te jayeb tiempo ya scux yo'tan, te bin ut'il jochol hilel yu'unic. Ya me yich'ic te castigo yu'un smulic, ta scaj te mayuc sc'oblal ta yo'tanic te mandariletic cu'un soc te la yihlayic te bintic chapal cu'une.

⁴⁴Aunque hich ay, te c'alal ayic ta sq'uinal a te scontrahic, ma ba ya jch'ayic hilel soc ma ba ya quihlayic scuenta slajinel, te hich ya xch'ay cu'un te chapbil-c'op cu'un te la jchahp soc, como ho'on, Jehovahon, te Dioson yu'unique.

⁴⁵Ya me jna'ic ta scuenta te namey chapbil-c'op cu'un te c'alal la jloq'ues tal ta sq'uinal Egipto ta stojol sit te nacionetic, yu'un ho'on Dioson ya xc'ohon yu'unic. Ho'on, Jehovahon, xchi.

⁴⁶Ha ini te bintic chapal, te bintic yaloj soc te leyetic te la schap Jehová soc te snich'nab Israel ta wits Sinaí ta scuenta Moisés.