Read Tzeltal Levítico 27 Bible Online

Levítico 27 - Tzeltal bible

Levítico 27

¹Te Jehová la yalbe te Moisés:

²Halbeya te snich'nab Israel: Teme ay mach'a ay bin muc' sc'oblal ya schap ta stojol Jehová, ha te ya sman loq'uel mach'a a'botix te Diose, hich me yac awal te jayeb ya stoj:

³Teme winic te ay jtahb (20) ya'bilal c'alal ta oxwinic (60) ya'bilal, yac awa'be stoj lajuneb yoxwinic (50) siclo plata, ha te siclo yu'un te ch'ul awilal.

⁴Teme ants, ha lajuneb scha'winic (30) siclo plata.

⁵Teme ay ho'eb ya'bilal c'alal ta jtahb ya'bilal, yac awa'be stoj jtahb (20) siclo plata teme querem, lajuneb (10) siclo teme ach'ix.

⁶Teme ay jun yuhil c'alal ta ho'eb ya'bilal, ho'eb siclo plata yac awa'be stoj teme querem, oxeb siclo plata teme ach'ixe.

⁷Teme c'axem ta oxwinic (60) ya'bilal, teme winic, ha ho'lajuneb (15) siclo plata, teme ants, ha lajuneb (10) siclo plata.

⁸Yan teme c'ax pobre te ma xhu' yu'un stojel hich yipal te yac awale, ya me yich' iq'uel bahel ta stojol te sacerdote, ha ya yal jayeb ya stoj; chican te jayeb ya xhu' yu'un te mach'a ay bin schapoj, hich ya yal te sacerdote te stojele.

⁹Teme chambahlam te ya yich' a'beyel smahtanin Jehová, spisil te hich ya yich' a'beyel te Jehová ch'ultesbil ya xc'oht.

¹⁰Ma xhu' ya yich' jelel ta bin ma lecuc te bin lec, o ta bin lec te bin ma lecuque. Teme ya yich' jelel, te chambahlam soc te sjelol ch'ultesbil schebal.

¹¹Teme chambahlam te bohloben sc'oblal, te ma xhu' ya yich' a'beyel smahtanin te Jehová, ya me yich' iq'uel tal ta stojol sacerdote te chambahlam,

¹²te sacerdote ya yal jayeb stojol, chican teme lec o ma lecuc te chambahlam. Te jayeb stojol ya yal te sacerdote, hich nix ya xc'oht.

¹³Teme ya sc'an ya smambe scolel, ya me yac' jun xan ta yo'ebal a te stojole.

¹⁴Teme ay mach'a ya ya'be Jehová te sna te hich ch'ultesbil ya xc'oht, te sacerdote ya yal jayeb stojol, teme lec o ma lecuc. Te jayeb stojol ya yal te sacerdote, hich nix ya xhil a.

¹⁵Pero te mach'a la yac' te sna, teme ya sc'an ya sman xane, ya me yac' jun xan ta yo'ebal a te stojole, hich yu'un ya xc'oht.

¹⁶Teme ay mach'a ya ya'be Jehová j'ohlil te sq'uinale, te stojole ha chican jayeb ya yich' ts'unel tey a: te jun homer[23] cebada ts'unubil, ha lajuneb yoxwinic (50) siclo plata.

¹⁷Teme ha ya yac' ta yorahil te ha'bil yu'un hilel ta libre, hich nix stojol ya xhil te bin ut'il awalojixe.

¹⁸Yan teme c'axemix a te ha'bil yu'un hilel ta libre te ya yac' te sq'uinale, te sacerdote ya spas cuenta te jayeb xan ha'bil ma sta te ha'bil yu'un hilel ta libre, hich ya xpehc'aj te jayeb stojol yac awale.

¹⁹Te mach'a la yac' te q'uinal, teme ya sc'an ya sman xane, ya me stoj jun xan ta yo'ebal a te jayeb stojol awalojix, hich yu'un ya xhil.

²⁰Yan teme ma ba ya sman xan te q'uinal, teme la yich' chombeyel yan winic, ma xhu' ya yich'ix manel xan loq'uel.

²¹Te c'alal ya xhil ta libre ta yorahil te ha'bil yu'un hilel ta libre, ch'ultesbil ya xc'oht te q'uinal ta stojol Jehová, hich te bin ut'il q'uinal te jc'axel ac'bil; ha yu'un te sacerdotehetic ya xc'oht.

²²Teme ay mach'a ya ya'be Jehová te smambil q'uinal, te ma ha'uc a'bibil yu'untay,

²³te sacerdote ya spas cuenta soc te jayeb stojol te q'uinal ha to c'alal ta yorahil te ha'bil yu'un hilel ta libre, ha ya stoj ta yorahil nix, scuenta bin ch'ultesbil ta stojol Jehová.

²⁴Ta ha'bil yu'un hilel ta libre, te q'uinal ya me suht xan ta stojol te mach'a la schon, ha te mach'a smelelil a'bibil yu'untay.

²⁵Spisil te cuentahetic yac apas, ha yac atuhun te siclo yu'un te ch'ul awilal; te siclo ha jtahb gera.[24]

²⁶Pero te sba-al te chambahlametic, te ha nix yu'un Jehová ta scaj te sba-al, ma me ayuc mach'a te ya ya'be Jehová, teme toro o tuminchij, como yu'unix Jehová a.

²⁷Yan teme chambahlam te bohloben sc'oblal, ya xhu' ya xmanot loq'uel, chican jayeb stojol yac awal, soc jun xan ta yo'ebal a yac atoj. Yan teme ma ba ya xmanot loq'uel, ya yich' chonel, chican jayeb stojol te yac awale.

²⁸Pero ma xhu' ya yich' chonel soc ma xhu' ya yich' manel loq'uel te bin ch'ultesbil, te jc'axel ac'bil ta stojol Jehová; ta spisil te bintic ay yu'un, teme ants-winic, chambahlam, sq'uinal te a'bibil yu'untay, spisil te bin jc'axel ac'bil ta stojol Jehová mero ch'ultesbil ta stojol Jehová.

²⁹Mayuc mach'a te parte ac'bil scuenta lajel te ya xhu' ya xmanot loq'uel, ya me yich' milel.

³⁰Te jun ta slajunebal te bin ya xloc' ta lumq'uinal, chican teme sit ts'unub awalil o sit te'etic, ha yu'un Jehová stuquel, ha te bin ac'bil ta stojol Jehová.

³¹Teme ay mach'a ya sc'an ya sman loq'uel te jun ta slajunebal, ya me yac' jun xan ta yo'ebal te stojole.

³²Spisil te jun ta slajunebal, teme wacaxetic, tuminchijetic o tentsunetic, spisil te ya xc'ax ta ye'tal te nahbate'el, ch'ultesbil me ta stojol Jehová.

³³Ma ba ya yil teme lec o ma lecuc, soc ma ba ya sjel. Teme ya sjel te chambahlam, pajal ch'ultesbil schebal; ma xhu' ya yich'ic manel loq'uel, xchi te Jehová.

³⁴Ha te mandariletic ini te halbot yu'un Jehová te Moisés yu'un te snich'nab Israel ta wits Sinaí.