Read Tzeltal Levítico 3 Bible Online

Levítico 3 - Tzeltal bible

Levítico 3

¹Teme ha ya yac' milbil mahtanil scuenta lamal q'uinal, teme ya yac' wacax, teme stat o yantsilel, ya me yac' ta stojol Jehová te mayuc bin jihnem yu'un.

²Ya scajan sc'ab ta sjol te mahtanil yu'une, ya smil ta yochibal Nahilpac' Templo yu'un tahojibal. Te snich'nab Aarón, te sacerdotehetic, ya stsihtsimbeyic sch'ich'el ta sjoyobal ta sba te scajtajib ta chiq'uel mahtanil.

³Ta banti te milbil mahtanil scuenta lamal q'uinal, ya me ya'be Jehová scuenta chic'bil mahtanil te sjuhp'el macal sbiquil a soc te sjuhp'el ta yutil sch'uht,

⁴schebal sriñon soc sjuhp'el te potsol a, soc te sjuhp'el ta sba slomo; pajal ya sloq'uesbe soc sriñon te sjuhp'el te sehcub.

⁵Te snich'nab Aarón ya schiq'uic ta scajtajib ta chiq'uel mahtanil, ta sba te scohtol chic'bil mahtanil ay ta si' te yac ta tihlele. Ha chic'bil mahtanil te sumet yic' ta stojol Jehová.

⁶Yan teme ya ya'be Jehová milbil mahtanil scuenta lamal q'uinal jcoht tuminchij o tentsun, teme stat o yantsilel, ya me yac' te ban mayuc bin jihnem yu'une.

⁷Teme ya yac' jcolel tuminchij scuenta mahtanil, ya me yac' ta stojol Jehová.

⁸Ya scajan sc'ab ta sjol te mahtanil yu'un, ya smil ta stojol te Nahilpac' Templo yu'un tahojibal. Te snich'nab Aarón ya stsihtsimbeyic sch'ich'el ta sjoyobal ta sba te scajtajib ta chiq'uel mahtanil.

⁹Ta banti te milbil mahtanil scuenta lamal q'uinal, ya ya'be Jehová scuenta chic'bil mahtanil te sjuhp'el, sch'ixil te sne ya yich' set'el ta banti colem tal, te sjuhp'el macal sbiquil a soc te sjuhp'el yutil sch'uht,

¹⁰schebal sriñon soc sjuhp'el te potsol a, soc te sjuhp'el ta sba slomo. Pajal ya sloq'uesbe soc sriñon te sjuhp'el te sehcub.

¹¹Te sacerdote ya schic'ticlan ta scajtajib scuenta mahtanil we'elil te ya yich' chiq'uel ta stojol Jehová.

¹²Teme tentsun ya yac', ya me ya'be ta stojol Jehová.

¹³Ya scajan sc'ab ta sjol, ya smil ta Nahilpac' Templo yu'un tahojibal. Te snich'nab Aarón ya stsihtsimbeyic sch'ich'el ta sjoyobal ta sba te scajtajib ta chiq'uel mahtanil.

¹⁴Patil ya ya'be scuenta chic'bil mahtanil ta stojol Jehová spisil te sjuhp'el macal sbiquil a soc te sjuhp'el yutil sch'uht,

¹⁵schebal sriñon soc sjuhp'el te potsol a, soc te sjuhp'el ta sba slomo; pajal ya sloq'uesbe soc sriñon te sjuhp'el te sehcub.

¹⁶Te sacerdote ya schic'ticlan ta scajtajib scuenta mahtanil we'elil ya yich' chiq'uel te buen sumet yic'. Spisil te sjuhp'el ha yu'un Jehová.

¹⁷Ha mandaril te ma xlaj sc'oblal ta cajalcaj ats'umbalic ta bayuc ya xnahinex: ma me ayuc bin ora yac awe'beyic te sjuhp'el soc te sch'ich'ele, xchi te Jehová.