Read Tzeltal Levítico 5 Bible Online

Levítico 5 - Tzeltal bible

Levítico 5

¹Teme ay mach'a ya sta smul ta scuenta te la yich' iq'uel ta testigohil yu'un ay bin la yil o la sna', pero teme ma ba la yal, ha smul ya xc'oht.

²Ha nix hich teme ay mach'a ya spic te bin bohloben sc'oblal, hich te bin ut'il sbaq'uetal chamen ha'mal chambahlam, alaq'uil chambahlam, o chamen chambahlam te staslajan ya xbehen ta lum te bohloben sc'oblal, aunque ma ba la sna' te la spic, bohloben sc'oblal ya xhil soc stahojix smul.

³O teme ya spic biluc a te bohloben sc'oblal yu'un ants-winiquetic te ya xhu' ya sbohlobtesbe sc'oblal, teme ma ba la sna', pero teme patilix la sna', stahojix smul abi.

⁴Teme ay mach'a ora nax ay bin jc'axel ya stojol lom ta halel te ya spas, teme lec o teme ma lecuque, biluc a te jc'axel ya yal ta ora nax, te ma nahiluc ya snop ta lec, teme ma ba ya sna' ta ora, pero teme patilix ya sna'e, stahojix smul, chican biluc a te ya slom ta halele.

⁵Teme ay mach'a ya sta smul ta scuenta te muliletic ini, ya sc'an ya yal ta jamal te smul stahoj,

⁶soc ya me yic' tal ta stojol Jehová jcoht yantsilel tuminchij o tentsun scuenta mahtanil yu'un stojel smul te stahoje. Hich te sacerdote ya spasbe te stojel smul te stahoje.

⁷Teme ma xhu' yu'un jcoht jcolel tuminchij, ya me yic' tal ta stojol Jehová cheb xpuliwoc o cheb jcolel stsuhmut scuenta stojel smul te stahoje, jcoht scuenta stojel mulil, jcoht scuenta scohtol chic'bil mahtanil.

⁸Ya me yic'ticlan tal ta stojol te sacerdote te nahil ya yac' te jcoht mut scuenta stojel mulil. Ya sts'ot ta snuc' pero ma ba ya stuch'be ta jc'axel te sjole.

⁹Ya stsihtsin jtebuc te sch'ich'el te mahtanil yu'un stojel mulil ta spahc'ul te scajtajib ta chiq'uel mahtanil; te ch'ich' ya xhile ya spits'be ta yoc te scajtajib. Ha milbil mahtanil yu'un stojel mulil.

¹⁰Te schebal mut ya yac' scuenta scohtol chic'bil mahtanil hich te bin ut'il ay ta pasele. Te sacerdote hich ya spasbe te stojel mulil yu'un te smul stahoj, hich ya sta perdón a.

¹¹Teme ma xhu' yu'un te cheb xpuliwoc o cheb jcolel stsuhmut, ya me yich' tal scuenta mahtanil yu'un te smul stahoj jun ta slajunebal efa[1] lequil harina; ma ba ya ya'be aceite soc ma ba ya ya'be pom ta sba, como ha milbil mahtanil yu'un stojel mulil.

¹²Ya yich'be tal ta stojol te sacerdote, ha ya sjohp johpuc ta sc'ab scuenta sna'ojibal, ya schic' ta scajtajib ta chiq'uel mahtanil ta sba te mahtaniletic chic'bilic ta stojol Jehová. Ha milbil mahtanil yu'un stojel mulil.

¹³Te sacerdote hich ya spasbe te stojel mulil yu'un te smul stahoj, chican te bin mulil halbil sc'oblal li'i, hich ya sta perdón a. Te ban c'alal ya xhil yu'un te harina ha ya yich' te sacerdote, hich te bin ut'il te mahtanil harina, xchi te Jehová.

¹⁴Te Jehová hich la yalbe xan te Moisés:

¹⁵Teme ay mach'a ya sta falta, te ma snopojuc a ya sta smul ta scuenta te bin ch'ultesbil yu'un Jehová, ya me yic' tal ta stojol Jehová scuenta mahtanil yu'un stahel falta jcoht tat tuminchij o tentsun te mayuc bin jihnem yu'une; te stojol te chambahlam ay ta p'isel ta siclo yu'un plata, ha te siclo yu'un te ch'ul awilal; ha mahtanil yu'un stahel falta.

¹⁶Soc ya me stoj te bin stahoj falta a ta stojol te bin ch'ultesbil, soc ya yac' xan jun ta yo'ebal te stojole, ha ya ya'be te sacerdote. Te sacerdote ya spasbe te stojel mulil ta scuenta te tat tuminchij ya yich' aq'uel scuenta milbil mahtanil yu'un stahel falta, hich ya sta perdón a.

¹⁷Teme ay mach'a ya sta smul o te ya spas te bin yaloj ta mandar te Jehová te ma hichuc ya sc'an pasele, aunque ma ba sna'oj a, ha stahoj falta soc scuchoj smul ya xhil.

¹⁸Ya me yic' tal ta stojol sacerdote scuenta mahtanil yu'un te la sta falta jcoht tat tuminchij o tentsun te mayuc bin jihnem yu'un, te hich ay stojol te yac awale. Te sacerdote ya spasbe te stojel mulil yu'un ma snopojuc la sta falta, hich ya sta perdón a.

¹⁹Ha mahtanil yu'un stahel falta, como ta mero melel stahoj smul ta stojol Jehová, xchi.