Read Tzeltal Levítico 6 Bible Online

Levítico 6 - Tzeltal bible

Levítico 6

¹Te Jehová la yalbe te Moisés:

²Teme ay mach'a ya sta smul, te ha ya sta falta ta stojol Jehová te bin ut'il ma ba ya ya'beyix te bin ay yu'un te spat-xuhc te a'bibil scuentahin o a'bibil hilel ta sc'ab, o te ya yelc'ambe o ya sbohlobtesbe sc'oblal te spat-xuhc,

³o ya smuc ta yo'tan te la sta te bin ch'ayem yu'un te spat-xuhc, o ya yal ta jamal ta lot te bin ay ta pasel te ya sta mulil a te winique,

⁴te bin ut'il stahoj smul soc stahoj falta, ya me suht te bin la yelc'an o te la suj ta yaq'uel, te bin a'bibil ta scuenta o te bin ch'ayem te la sta,

⁵o biluc a te la yal ta jamal ta lot. Ya me sutbe spisil ta stojol te yajwal, soc ya me yac' jun xan ta yo'ebal te bin ora ya yac' te mahtanil yu'un smul.

⁶Scuenta mahtanil yu'un stojel smul te sfalta stahoj ya me yic' tal ta stojol Jehová jcoht tat tuminchij o tentsun te mayuc bin jihnem yu'un, te hich stojol te yac awale, ya me ya'be ta stojol te sacerdote scuenta mahtanil yu'un stojel mulil.

⁷Te sacerdote hich ya spasbe te stojel mulil yu'un ta stojol Jehová, hich ya sta perdón yu'un te biluc mulil te la sta falta yu'une, xchi te Jehová.

⁸Te Jehová la yalbe xan te Moisés:

⁹Halbeya te Aarón soc te snich'nab: Hich ay sc'oblal te scohtol chic'bil mahtanil: Te scohtol chic'bil mahtanil ya me xhil sjunal ahc'abal ta c'ahc' te ay ta scajtajib ta chiq'uel mahtanil ha to c'alal ya sacub q'uinal, te hich ya xlaj ta chiq'uel.

¹⁰Te sacerdote ya slap sc'u' soc scomil wex pasbilic ta lino. C'alal lajix ta c'ahq'uel a te scohtol chic'bil mahtanil ya stsobe te stanul ay ta sba te scajtajib, ya yac' hilel ta xuhc te scajtajib ta chiq'uel mahtanil.

¹¹Patil ya sjeltay te sc'u' spac', ya yich' bahel te stanul ta fuera yu'un te campamento ta lugar te ma ba bohloben sc'oblal.

¹²Te c'ahc' ya xtihl ta scajtajib ta chiq'uel mahtanil, ma me ayuc bin ora ya xtup', te sacerdote ya me ya'be si'il ta jujun sab, ya scajan ta sba si' te chambahlam ya yich' chiq'uel, soc tey ya schic'be a te sjuhp'el te milbil mahtanil scuenta lamal q'uinal.

¹³Spisil ora ya me xtihl te c'ahc' ta scajtajib ta chiq'uel mahtanil; ma me ayuc bin ora ya xtup'.

¹⁴Hich ay te mandaril yu'un te mahtanil harina: Te snich'nab Aarón ya ya'beyic te mahtanil harina ta stojol Jehová ta scajtajib ta chiq'uel mahtanil.

¹⁵Ya sjohp ta sc'ab te lequil harina yu'un te mahtanil soc te aceite, soc spisil te pom ay ta sba te mahtanil, ya schic' ta scajtajib ta chiq'uel mahtanil scuenta sna'ojibal te sumet yic' ta stojol Jehová.

¹⁶Te jayeb ya xhil, ha ya swe' te Aarón soc te snich'nabe. Mayuc slevadurahil ya swe'ic ta lugar te ch'ultesbil; ha ya swe'ic ta yamaq'uil te Nahilpac' Templo yu'un tahojibal.

¹⁷Ma ba ya yich' ta'ajtesel soc levadura. Ha ca'beyej te Aarón soc te snich'nab te jayeb hilem yu'un te chic'bil mahtanil cu'une; ha mero ch'ultesbil, hich te bin ut'il te milbil mahtanil yu'un mulil soc te milbil mahtanil yu'un stahel falta.

¹⁸Spisil te winiquetic te ha snich'nab Aarón ya xhu' ya swe'ic. Ha mandaril sc'oblal te chic'bil mahtaniletic yu'un Jehová te ma xlaj sc'oblal ta cajalcaj ats'umbalic. Biluc a te ya xtahot yu'un te mahtanile, ha ch'ultesbil ya xc'oht, xchi.

¹⁹Te Jehová la yalbe te Moisés:

²⁰Hich ay te mahtanil ya yac' te Aarón soc te snich'nab ta stojol Jehová te c'alal ya xmalbot aceite scuenta ch'ultesel: ha jun ta slajunebal[2] efa lequil harina, j'ohlil ya yac' ta sab, j'ohlil ta tibiltic, ha mahtanil te ma xlaj sc'oblal ta aq'uel.

²¹Ya yich' pasel ta sartén soc aceite; wots'bil a yac awich' tal soc ta'ajemix xet'ticlambil yac awac' scuenta mahtanil te sumet yic' ta stojol Jehová.

²²Hich nix ya sc'an ya spas te sacerdote te tsahbil ta yohlil te snich'nab Aarón soc te yich'oj malel ta aceite scuenta ch'ultesel te ha sjelol Aarón. Yu'un Jehová te mahtanile, spisil me ya yich' chiq'uel.

²³Spisil te mahtaniletic ya yac' te sacerdote, scohtol me ya yich' chiq'uel, ma ba ya yich' we'el, xchi.

²⁴Te Jehová la yalbe te Moisés:

²⁵Halbeya te Aarón soc te snich'nab te hich ay te mandaril yu'un te milbil mahtanil yu'un stojel mulil: Ta banti ya yich' milel te scohtol chic'bil mahtanil tey me ya yich' milel a te mahtanil yu'un mulil ta stojol Jehová; ha mero ch'ultesbil.

²⁶Te sacerdote te ya yac' te mahtanil yu'un mulil, ha nix ya swe'; ya me swe' ta lugar te ch'ultesbil, ta yamaq'uil te Nahilpac' Templo yu'un tahojibal.

²⁷Spisil te bin ya xtahot yu'un te ti'bale, ch'ultesbil ya xc'oht, soc teme ay c'oht ch'ich' ta sc'u' spac', ya me asac' ta lugar te ch'ultesbil.

²⁸Te pac'bil oxom banti ya yich' payel ya me yich' top'el; teme ya yich' payel ta oxom pasbil ta bronce, ya me yich' huxel soc suq'uel ta ha'.

²⁹Spisil winiquetic te ayic ta sacerdotehil ya xhu' ya swe'ic; ha mero ch'ultesbil.

³⁰Pero ma xhu' ta we'el te mahtanil te yich'oj ich'beyel ochel sch'ich'el ta yutil te Nahilpac' Templo yu'un tahojibal scuenta stojel mulil ta ch'ul awilal; ya me yich' chiq'uel.