Read Tzeltal Levítico 7 Bible Online

Levítico 7 - Tzeltal bible

Levítico 7

¹Hich ay te mandaril yu'un te milbil mahtanil yu'un stahel falta; ha mero ch'ultesbil.

²Ta lugar banti ya yich' milel te scohtol chic'bil mahtanil, tey nix ya yich' milel a te chambahlam yu'un te mahtanil yu'un stahel falta, soc ya yich' tsihtsinel te sch'ich'el ta sjoyobal ta sba te scajtajib ta chiq'uel mahtanil.

³Ya yich' aq'uel ta mahtanil spisil te sjuhp'el sne, te sjuhp'el macal a te sbiquil,

⁴schebal sriñon soc sjuhp'el te potsol a, soc te sjuhp'el ta sba slomo; pajal ya yich' loq'uesbeyel soc sriñon te sjuhp'el te sehcub.

⁵Te sacerdote ya me schic' ta scajtajib ta chiq'uel mahtanil, ha chic'bil mahtanil ta stojol Jehová. Ha milbil mahtanil yu'un stahel falta.

⁶Spisil winiquetic te ayic ta sacerdotehil ya xhu' ya swe'ic; ya yich' we'el ta lugar te ch'ultesbil; ha mero ch'ultesbil.

⁷Te bin ut'il ay te milbil mahtanil yu'un mulil, hich nix ay te milbil mahtanil yu'un stahel falta, junax mandaril ta schebal. Ha ya xc'oht ta scuenta te sacerdote te ya spas te stojel mulil.

⁸Te sacerdote te ya yac' te scohtol chic'bil mahtanil ta scuenta yan, ha yu'un ya xhil te snuhculel te mahtanile.

⁹Ha nix hich spisil te mahtanil harina te ta'ajtesbil ta horno, soc spisil te bin pasbil ta sartén o ta samet, ha ya yich' te sacerdote te ha nix ya yaq'ue.

¹⁰Soc spisil te mahtanil harina wots'bil ta aceite, o teme taquin, ha ya xc'oht yu'un spisil te snich'nab Aarón, pajal me ya yich'ic.

¹¹Hich ay te mandaril yu'un te milbil mahtanil scuenta lamal q'uinal te ya yich' a'beyel ta stojol Jehová.

¹²Teme ya yich' aq'uel ta scuenta yalel wocol, ha ya yich' aq'uel soc pimil pan ma ba yich'oj levadura te wots'bil ta aceite, soc jayal pan ma ba yich'oj levadura te jaxbil ta aceite, soc pimil pan pasbil ta lequil harina wots'bil ta aceite.

¹³Ta milbil mahtanil ya yich' aq'uel scuenta lamal q'uinal soc yalel wocol ya me awac' sjoquin pimil pan te yich'oj levadura.

¹⁴Ta spisil te mahtaniletic ini ya yich' aq'uel jujupehch te pan ta stojol Jehová, ha yu'un te sacerdote te ya stsihtsin te sch'ich'el milbil mahtanil scuenta lamal q'uinal.

¹⁵Te ti'bal yu'un te milbil mahtanil scuenta lamal q'uinal yu'un yalel wocol, ya me yich' we'el ta sc'ahc'alel nix te ya yich' aq'uele; ma me ayuc bin ya xhil ta yan c'ahc'al.

¹⁶Yan teme ha mahtanil yu'un sc'op schapoj, o teme scuenta nax sc'anojel yo'tan, ya yich' we'el ta sc'ahc'alel nix te la yich' aq'uele; teme ay to hile, ya xhu' ya swe'ic ta schebal c'ahc'al;

¹⁷pero teme ay to ti'bal ya xhil ta yoxebal c'ahc'al, ya me yich' chiq'uel.

¹⁸Teme ya yich' we'el ta yoxebal c'ahc'al te ti'bal yu'un te milbil mahtanil scuenta lamal q'uinale, ma ba lec ya xc'oht yu'un Dios te mach'a la yaq'ue, soc te bin la yac' mayuc ta cuenta, ihlaybil ya xc'oht, soc te mach'a ya sti' ay smul ya xc'oht.

¹⁹Te ti'bal te ya slac' sba soc te bin bohloben sc'oblal, ma xhu' ta we'el, ya yich' chiq'uel. Spisil te mach'atic lec sc'oblalic ya xhu' ya swe'ic te ti'bal.

²⁰Yan te mach'a bohloben sc'oblal a te ya swe' te ti'bal yu'un te milbil mahtanil scuenta lamal q'uinal, te ha yu'un Jehová, ya me yich' loq'uesel ta stojol te slumale.

²¹Soc teme ay mach'a ya spic te bin bohloben sc'oblal yu'un ants-winic o chambahlam, biluc a te ihlaybil, teme ya swe' te ti'bal yu'un te milbil mahtanil scuenta lamal q'uinal, te ha yu'un Jehová, ya me yich' loq'uesel ta stojol te slumale, xchi.

²²Te Jehová la yalbe te Moisés:

²³Halbeya te snich'nab Israel: Ma me xawe'beyic sjuhp'el wacax, tuminchij o tentsun.

²⁴Te sjuhp'el te chamen chambahlam o te ixta'lambil yu'un ti'awal ha'mal chambahlam, ya xhu' ya yich' tuhunel, pero ma xhu' yac awe'ic.

²⁵Mach'ayuc a te ya swe'be sjuhp'el te chambahlam te a'bot scuenta chic'bil mahtanil ta stojol Jehová, ya me yich' loq'uesel ta stojol te slumale.

²⁶Soc ta bayuc ya xnahinex, ma me xawe'beyic sch'ich'el mutetic o chambahlametic.

²⁷Mach'ayuc a te ya swe' ch'ich', ya me yich' loq'uesel ta stojol te slumal, xchi.

²⁸Te Jehová la yalbe te Moisés:

²⁹Halbeya te snich'nab Israel: Te mach'a ya yac' milbil mahtanil scuenta lamal q'uinal ta stojol Jehová, ya me yich'be tal ta stojol Jehová.

³⁰Ta sc'ab nix ya yich'be tal te mahtaniletic te ya yich'ic chiq'uel ta stojol Jehová; ya me yich' tal te sjuhp'el soc te stahn, scuenta yu'un ya yich' tuchilanel te stahn ta stojol Jehová scuenta tuchilambil mahtanil.

³¹Te sacerdote ya schic' te sjuhp'el ta scajtajib ta chiq'uel mahtanil, yan te stahn ha yu'un Aarón soc te snich'nabe.

³²Ya me awa'be te sacerdote te swa'el ya' te ya yich' aq'uel yu'un te milbil mahtanil scuenta lamal q'uinal.

³³Te snich'an Aarón te ya yac' te sch'ich'el te milbil mahtanil scuenta lamal q'uinal soc te sjuhp'ele, ha yu'un ya xc'oht te swa'el ya'.

³⁴Como tey ta milbil mahtanil scuenta lamal q'uinal te ya yaq'uic te snich'nab Israel la jca'be te sacerdote Aarón soc snich'nab te stahn te ya yich' tuchilanel soc te ya' te ya yich' aq'uel; ha mandaril te ma xlaj sc'oblal yu'un te snich'nab Israel, xchi.

³⁵Hich ay te bin ya yich' Aarón soc te snich'nab yu'un te mahtaniletic te ya yich'ic chiq'uel ta stojol Jehová, c'alal ta bin c'ahc'alil te parte ac'otic ta sacerdotehil yu'un Jehová.

³⁶Te c'alal bin ora la yich'ic malel ta aceite scuenta ch'ultesel, te Jehová la yalbe te snich'nab Israel te hich ya x'a'botic te Aarón soc te snich'nab; ha mandaril te ma xlaj sc'oblal ta cajalcaj sts'umbalic.

³⁷Hich ay te mandaril yu'un te scohtol chic'bil mahtanil, mahtanil harina, mahtanil yu'un mulil, mahtanil yu'un stahel falta, mahtanil bintic parte ac'ot, soc te mahtanil scuenta lamal q'uinal,

³⁸te pasot ta mandar yu'un Jehová te Moisés ta wits Sinaí, te bin c'ahc'alil la yalbe te snich'nab Israel te ya me ya'beyic smahtan te Jehová, tey ta jochol taquin q'uinal ta Sinaí.