Read Tzeltal Jeremías 13 Bible Online

Jeremías 13 - Tzeltal bible

Jeremías 13

¹Hich la yalbon te Jehová: Bahan, mana schuhquil ach'uht pasbil ta lino, chuca ach'uht a, pero ma xamul ta ha', xchi.

²Hich la jman te schuhquil jch'uht hich te bin ut'il la yalbon te Jehová, soc la jchuc jch'uht a.

³Cha'tal ta jtojol ta schebal buelta te sc'op te Jehová, hich la yalbon:

⁴Ich'a te schuhquil ach'uht la aman, te chucul ach'uht a, bahan ta muc'ul-ha' Éufrates, tey yac anac' hilel ta sc'uhb ton a, xchi.

⁵Hich bohon ta muc'ul-ha' Éufrates, la jnac' hilel, hich te bin ut'il la yalbon te Jehová.

⁶Bayel c'ahc'al ta patil hich la yalbon te Jehová: Bahan ta muc'ul-ha' Éufrates, ich'a tal te schuhquil ach'uht te la jcalbat te yac anaq'ue, xchi.

⁷Hich bohon ta muc'ul-ha' Éufrates, la joc' ta banti jnac'oj, la jtsac loq'uel te schuhquil jch'uht, pero c'a'emix, jc'axel ma xtuhunix.

⁸Tal ta jtojol te sc'op Jehová, hich la yal:

⁹Hich yaloj te Jehová: Hich ya cac' c'a'uc te stoybahil Judá soc te bayel stoybahil Jerusalén.

¹⁰Te chopol pueblo ini, te ma sc'an ya ya'iybon jc'op, te ya st'unic bahel te stulanil yo'tanic soc ya st'unic bahel yantic diosetic yu'un ya yac' sbahic ta a'batinel yu'unic soc ya sch'uhuntayic, hich ya xc'ohtic te bin ut'il te chuquil ch'uhtul ini, te jc'axel ma xtuhune.

¹¹Como hich te bin ut'il ya sut' ta chuquel sch'uht te winic, hich la jcac' te ya sut' ta chuquel ta jtojol spisil te sna Israel soc spisil te sna Judá, scuenta yu'un ha pueblo cu'un ya xc'oht, scuenta yu'un ya ya'bon ta na'el te jbihil soc ya yich' halbeyel yutsil jc'oblal soc te ya x'ich'otic ta muc' a, pero ma ba la ya'iyic, xchi te Jehová.

¹²Hich me xawalbe: Hich yaloj te Jehová te Dios yu'un Israel: Spisil te yawil vino ya me yich' nojesel ta vino, xchihat me. Hich ya yalbat te israeletic: ¿Yu'un bal ma ba jna'ojcotic te ya yich' nojesel spisil te yawil vino? xchihic.

¹³Hich me xawa'be: Hich yaloj te Jehová: Ya jnojes ta yacubel spisil te mach'atic nahinemic ta q'uinal ini: ha te ajwaliletic te ya shuhcan sbahic ta shuctajib David, te sacerdotehetic, jalwanejetic soc spisil te mach'atic nahinemic ta Jerusalén.

¹⁴Ya cac' te ya sbutsticlan sbahic ta tuhlultuhl, te tatiletic soc te al-nich'anetic, xchi te Jehová. Ma ba ya jna'be yo'bolil sbahic, ma ba ya jc'uxultay, ya me jlajinlan, xchi te Jehová.

¹⁵A'iya awa'iy ta lec, ma me xatoy abahic, como c'opojix te Jehová.

¹⁶Halbeya yutsil sc'oblal te Jehová te Dios awu'unic, te c'alal ma to xtal yu'un a te yihc'al q'uinal, te c'alal ma to ba ac'ohchinej awoquic a ta witsiltic te ayic ta axinal; soc te c'alal yac amahlibel a te sacal q'uinal, ha ya sutp'ij ta axinal yu'un lajel soc ta yihc'al q'uinal.

¹⁷Teme ma ba yac awa'iyic, muquen ya x'oc'on ta scaj te atoybahilic; ya xloc' ya'lel jsit ta tulan oq'uel, como te jtsohb tuminchijetic yu'un Jehová ya x'ic'otic bahel ta chuquel.

¹⁸Halbeya te ajwalil soc te ajwalil-ants: Huclanic ta banti peq'uel, como ch'ayemix cohel ta ajol te t'ujbil corona awu'unic, xchihat me.

¹⁹Te pueblohetic ta Neguev la yich'ic maquel, mayuc mach'a ya xhu' ya sjam; spisil Judá ic'ot bahel, spisilic ic'otic bahel ta chuquel.

²⁰Toya mohel asitic soc ilawilic te mach'atic yaquic ta talel ta stojol norte. ¿Banti ay te jtsohb tuminchij te a'botat, te t'ujbil tuminchijetic awu'une?

²¹¿Bin yac awal yu'un te c'alal Jehová ya yac' scuentahinat te mach'atic la anohptes te ha awamigo ya xc'ohtic? ¿Ma bal yacuc ya'beyex sc'uxul, hich te bin ut'il ants te ya x'ayin yale?

²²Teme hich yac awal ta awo'tanic: ¿Bin yu'un te hich c'oht ta jtojol? teme xchihate, ha ta scaj bayel mulil awu'un te la yich' mohtesel atsec, soc la awich' uts'inel.

²³¿Ya bal xhu' ya sjeltay snuhculel te etíope-winic soc ya bal xhu' ya sjeltay spintohil te c'an bahlam choj? Ha nix hich ¿ya bal xhu' yac apasic te bin lec, te bin ut'il c'ahyemex ta spasel te bin chopol?

²⁴Ha yu'un ya jpuquex bahel ta ic' te ya xtal ta jochol taquin q'uinal hich te bin ut'il suhlil trigo te ya xc'ax bahele.

²⁵Hich ya xc'oht ta acuenta, ha te bin la jp'is te yac awich', xchi te Jehová, como la ach'ayon ta awo'tan, soc ha la smuc'ulin awo'tan te lot.

²⁶Ho'on nix ya jlicbat mohel atsec c'alal ta asit awelaw, hich ya xchicnaj aq'uexlal:

²⁷ha te antsiwej awu'un soc te xhilajanat, te schopolil antsiwej awu'un ta sba te tsehletic. La jquil ta aquiltic te bintic ilobtic sba awu'une. ¡Obol aba, Jerusalén! ¿Jayeb xan c'ahc'al te ma ba ya xlecub ac'oblale? xchi te Jehová.