Read Tzeltal Jeremías 15 Bible Online

Jeremías 15 - Tzeltal bible

Jeremías 15

¹Ha yu'un hich la yalbon te Jehová: Aunque ya stehc'an sbahic ta jtojol te Moisés soc Samuel, ma ba tey ay co'tan ta stojol a te pueblo ini. ¡Tenticlana loq'uel ta jtojol, ac'a bahtuquic!

²Teme hich ya sjoc'obat: ¿Banti ya xbohotcotic? teme xchihique, halbeya te hich yaloj te Jehová: Te mach'a chapal sc'oblal ta lajel, ya xlaj; te mach'a ya xlaj ta espada, ya xlaj ta espada; te mach'a chapal ya xlaj ta wi'nal, ya xlaj ta wi'nal; te mach'a ya x'ic'ot bahel ta chuquel, ya x'ic'ot bahel ta chuquel.

³Ya jticon ta stojolic chanchahp castigo, xchi te Jehová: ha te espada te ya xmilawan, ts'i'etic te ya xti'awanic, mutetic te ya xwihlic ta toyol soc chambahlametic ta q'uinal yu'un ya xti'awanic soc ya xlajinwanic.

⁴Ya cac' te xiweltic sba ya xc'ohtic ta stojol te nacionetic ta q'uinal ta scaj te bin la spasic ta Jerusalén te Manasés snich'an Ezequías, ajwalil yu'un Judá.

⁵¿Mach'a ya sna'bat yo'bolil aba, Jerusalén? ¿Mach'a ya smel yo'tan awu'un? ¿Mach'a ya xtal sjoc'oy bin ut'il ayat?

⁶Ha'at la awihquitayon, xchi te Jehová, suhtat bahel ta apat; ha yu'un ya jach jc'ab ta atojol, ya jinat. ¡Luhbenonix yu'un jna'belat yo'bolil aba!

⁷Aunque la jtsulq'uin ta tsulq'uinojibal ta ochibaletic yu'un te q'uinal; soc mayuc yal-snich'nabic hilic cu'un, la jlajin te pueblo cu'une, ma ba jelon te behetic yu'unique.

⁸C'ax hich me'ba' antsetic yu'unic a te bin ut'il shi'al mar. Ta ohlil c'ahc'al la jquic' tal jinawal ta stojol te naniletic yu'un te queremetic; ora nax la jcac' tal wocol soc tulan xiwel ta stojolic.

⁹Laj yip te mach'a ay huqueb yalatac, loc' sch'uhlel; mahl te c'ahc'al yu'un aunque ay to te c'ahc'ale; la yich' q'uexlaltesel soc pehc'anel. Te mach'atic yu'un te cuxul hilic ya cac' te ya xlaj ta espada ta stojol te scontrahic, xchi te Jehová.

¹⁰¡Ay, obol jba, jnan, te la awalatayon, ho'on te ya jach c'op soc te ya jcontrahin spisil te q'uinale! Mayuc bin jmajanej soc mayuc bin cac'oj ta majanel, pero spisilic ya sbohlc'optayonic.

¹¹¡Ac'a c'ohtuc ta pasel yu'unic te sbohlc'opic, Jehová, teme ma ba la jc'oponat yu'un lec ya xc'ohtic teme ma ba la jcalbat wocol yu'un yac ac'uxultay ta yorahil wocol soc mel-o'tan![4]

¹²¿Ay bal mach'a ya xhu' ya swac' hierro, te hierro ya xtal ta norte, soc te bronce?

¹³Te ac'ulejal soc te bintic q'uejbil awu'un ya cac' ta pojel, mayuc stojol, ta scaj spisil amul ta spisil alumal.

¹⁴Ya cac'at ta mosohil yu'un acontratac ta q'uinal te ma xana'be sba, como ta scuenta te quilimba tsumbilix c'ahc' te ya xtihl ta atojolic, xchi te Jehová.

¹⁵Ha'at ana'oj, Jehová; na'awon, canantayawon, a'beya spacol te mach'atic ya yuts'inonique. Te bin ut'il ma orahuc ya x'ilinat, ma xaloq'ueson bahel; yac ana' te yac ta c'axel jwocol ta acuenta.

¹⁶La yich' tahel te ac'ope, ho'on la jwe'; ha stse'elil co'tan c'oht te ac'ope soc ha yutsil co'tan c'oht, como quich'ojbat abihil, Jehová, Diosat te acuentahinej spisil.

¹⁷Ma ba la joquin ta huclej te mach'atic ha nax ya spasic te bin ya smulanic, ma ba la joquinlan ta tse'ej; jtuquel huculon ta scaj te ay ta atojol te ac'ab soc la anojesbon co'tan ta ilimba.

¹⁸¿Bin yu'un te spisil ora ay bin c'ux ya ca'iy soc te mayuc spoxil te quehchen, te ma xlecub? ¿Hich bal ya xc'ohat ta jtojol te bin ut'il be-ha' te ya xlo'loywan, te ma staleluc ay ya'lele?

¹⁹Ha yu'un hich la yal te Jehová: Teme yac asuhtes awo'tan, ya jcha'hahchat, soc yac atehc'an aba ta jtojol. Teme parte yac awac' te bin t'ujbil soc te bin ma lecuque, ha'at ya xc'opojat ta jcuenta. Ac'a suhtuquic tal ta atojol te yantique, ma ha'ucat te ya suhtat bahel ta stojolic.

²⁰Ya cac' te ha tulan ts'ahc pasbil ta bronce ya xc'ohat ta stojol te pueblo ini; ya ya'bat guerra, pero ma ba ya stsalat, como joquinejat yu'un ya jcoltayat soc yu'un ya cac'at ta libre, xchi te Jehová.

²¹Ya cac'at ta libre ta sc'ab te mach'atic chopol yo'tanic, ya jcoltayat loq'uel ta sc'ab te j'uts'inwanejetic, xchi.