Read Tzeltal Jeremías 16 Bible Online

Jeremías 16 - Tzeltal bible

Jeremías 16

¹Tal ta jtojol te sc'op Jehová, hich la yalbon:

²Ma me xnuhpunat, soc ma me ayuc aquerem-nich'nab o awantsil-nich'nab ta lugar ini.

³Como yaloj te Jehová te squerem-nich'nab soc yantsil-nich'nab te ya x'ayinic ta lugar ini, soc te naniletic te ya yac' yalataquic soc te tatiletic te ya xnich'ajic ta q'uinal ini,

⁴ya me xchamic yu'un tulan chameletic; mayuc mach'a ya x'oq'uetayotic yu'un soc mayuc mach'a ya xmucotic yu'un; hich ya xhilic te bin ut'il stsa' chambahlam ta sba te lumq'uinale. Ya xlajic ta espada soc ta wi'nal, soc te schamen baq'uetalic ya me xlajic ta ti'el ta mutetic te ya xwihlic ta toyol soc ti'awal chambahlametic ta q'uinal, xchi te Jehová.

⁵Soc hich yaloj te Jehová: Ma me x'ochat ta na ta banti ayic ta mel-o'tan yu'un te mach'a chamene; ma me x'oc'at soc ma me xamuc'ubtesbe q'uinal ya'iyic, como jloq'uesej te lamal q'uinal, te sc'uxul co'tan soc sna'beyel yo'bolil sba te pueblo ini, xchi te Jehová.

⁶Muc' biq'uitetic ya me xlajic ta q'uinal ini. Ma ba ya yich'ic muquel soc ma ba ya x'oq'uetayotic; mayuc mach'a ya yehchentes sbaq'uetal o te ya squits' loq'uel stsotsel sjolic yu'unic.

⁷Mayuc mach'a ya ya'be we'elil scuenta smuc'ubtesel q'uinal ya'iyic mach'atic ayic ta mel-o'tan yu'un te mach'a chamen yu'unic, soc mayuc bin ya x'a'bot yuch'ic scuenta smuc'ubtesel q'uinal ya'iyic yu'un te stat o te snane.

⁸Soc ma me x'ochat ta na ta banti ay q'uin, yu'un yac ahuhcan aba ta we'el uch'el soc.

⁹Como hich yaloj te Jehová te scuentahinej spisil, te Dios yu'un Israel: Ya cac' te ya xquehchaj ta lugar ini, ta atojolic soc ta yorahil awu'unic, te sc'op tse'el-o'tanil soc yutsil q'uinal, soc te sc'op mach'atic slecolinej sbahique.

¹⁰C'alal yac awalbe te pueblo spisil te c'op ini, ya me sjoc'obat: ¿Bin yu'un la yal Jehová te ya xtal ta jtojoltic spisil te bintic chopol te c'ax muq'ue? ¿Bin chopol jpasojcotic? ¿Bin mulil jpasojcotic ta stojol Jehová te Dios cu'untique? xchihic.

¹¹Hich me yac ajac'be: Como la yihquitayon te ame'atatic, xchi te Jehová, soc la st'unic bahel yantic diosetic soc la yac' sbahic ta a'batinel yu'unic soc la sch'uhuntayic. La yihquitayonic soc ma ba la sch'uhunic spasel te Ley cu'une.

¹²Pero te ha'exe c'ax hich chopol apasojic a te bin ut'il ame'atatique. Como ilawil, tuhlultuhlex la at'unic bahel te bin snopoj te achopol-o'tanic, ma ba la awa'iybonic te jc'ope.

¹³Ha yu'un ya jloq'uesex bahel ta q'uinal ini, ya xbahex ta q'uinal te ma ba ana'beyejic sba, ha'ex ni ha'uc te ame'atatic, tey yac awich'ic a'batinel c'ahc'al ahc'abal yu'un te yantic diosetic yu'unique; ma ba ya jc'uxultayex.

¹⁴Pero ya xtal sc'ahc'alel, xchi te Jehová, te ma ba ya yich'ix halel: Yiloj Jehová te la sloq'ues tal ta Egipto te israeletic, te xchihe;

¹⁵hich me ya yich' halel: Yiloj Jehová te la sloq'ues tal te israeletic ta q'uinal ta stojol norte soc ta spisil te q'uinaletic te banti spucticlanej bahele, xchi. Como ya jsuhteslan tal ta sq'uinalic, ha te la jca'be te sme'statique.

¹⁶Ya jticon tal bayel jtsac-chayetic, xchi te Jehová, te ya stsacticlanic. Patil ya jticon tal bayel jnutsojeletic, ya me snutsic ta spisil witsiltic, tsehletic soc sc'uhb tontiquil.

¹⁷Como yac quilbel spisil te ya'telic, ma ba mucul ta jtojol, ma ba nac'bil ta jsit te smulique.

¹⁸Nahil ya ca'be stojic cheb buelta yu'un te schopolilic soc te smulique, como la sbohlobtesbonic sc'oblal te jq'uinal ta scuenta te pujajtic sloc'ombahic te ihlaybilic, soc la snojesic te jq'uinal ta bintic ilobtic sba yu'unic, xchi te Jehová.

¹⁹Jehová, ha'at quipat soc toyol ts'ahcat cu'un, soc j'ahnibalat cu'un ta yorahil wocol, ya me xtal ta atojol te nacionetic c'alal ta sti'il bahlumilal, hich me ya yalic: Ha nax lotil te a'bot yich'ic te jme'jtatic, ha te bin ma xtuhun, te mayuc bin la stahic a.

²⁰¿Ya bal xhu' ya spas dios te winique? Pero ma ha'uc diosetic, xchihic me.

²¹Ha yu'un ya ca'be snopic, ya ca'be sna'ic te yu'el jc'ab, hich ya sna'ic a te ha Jehová te jbihile, xchi te Jehová.