Read Tzeltal Jeremías 20 Bible Online

Jeremías 20 - Tzeltal bible

Jeremías 20

¹Te Pasur snich'an Imer, te príncipal sacerdote ta sna Jehová, c'alal la ya'iy te bin la yal te Jeremías,

²la yac' ta majel te jalwanej Jeremías soc la yac' ta otsesel yoc ta hotbil te' te ay ta Ochibal yu'un Benjamín ta ahc'ol, ta sbehlal te sna Jehová.

³Ta schebal c'ahc'al la yac' ta loq'uesel te Jeremías ta banti xojbil yoc ta te'. Ha yu'un hich halbot yu'un te Jeremías: Te Jehová ma ba ya yalbat abihil Pasur, ha ya yalbat abihil Magor-misabib.[7]

⁴Como hich yaloj te Jehová: Ilawil, ya cac' te ha'at nix tulan yac axiwtes aba soc spisil te mach'atic jun awo'tan soque. Ya me awil ta asit te ya xlajic ta espada yu'un te scontrataque. Ya cac' ta sc'ab te ajwalil yu'un Babilonia spisil Judá, ha ya yic'ticlan bahel ta chuquel ta Babilonia soc ya me smilticlan ta espada.

⁵Soc ya ca'be ta sc'ab scontratac spisil sc'ulejal te pueblo, spisil sit ya'tel soc spisil bintic t'ujbil yu'un, soc spisil sc'ulejal te ajwaliletic yu'un Judá; ya me spojticlanic soc ya me yich'ic bahel ta Babilonia.

⁶Soc ha'at, Pasur, soc spisil mach'atic ayic ta ana ya me xbahex ta chuquel ta Babilonia. Tey ya xchamat a soc tey ya xmucat soc spisil a te mach'atic jun awo'tan aba soc, te la awalbe slotil-c'op jalwanej, xchi te Jeremías.

⁷La alo'loyon, Jehová, la jquich' lo'loyel; c'ax hich awip a te bin ut'il te quipe, hich la atsalon. Jujun c'ahc'al ya quich' tse'layel, spisilic ya slabanonic.

⁸Te jujun buelta te ya xc'opojon, hich ya x'awonon: ¡Ay uts'inel soc jinel! xchihon, como te sc'op Jehová la yac'on ta ixta'c'optayel soc labanel jujun c'ahc'al.

⁹Ha yu'un hich la jcal: ¡Ma ba ya jna'ix xan te Cajwal, soc ma ba ya xc'opojonix ta scuenta te sbihile! xchihon. Pero hich ya xc'oht te sc'op te bin ut'il c'ahc' te ya schic'bon jbaquel. La jc'an te ya jcom jba, pero ma ba hu' cu'un.

¹⁰La jca'iybe sajsaj c'opic tsobolic te hich ya yalic: ¡Ay tulan xiwel ta bayuc! ¡Halbeyahic smul! ¡Ya jlehbetic smul! xchihic. Spisil te mach'atic jun co'tan soc ya smahliyic te ya jc'ohchin te coque. Hich ya yalic: Ya wan xhu' ta lo'loyel, hich ya jtsaltic soc ya jsutbetic spacol, xchihic.

¹¹Pero Jehová sjoquinejon hich te bin ut'il mach'a bayel yip te ya stsalawan ta guerra; ha yu'un te mach'atic ya yuts'inonic ya me xyahlic, ma ba ya stsalonic; ya me stahic bayel q'uexlal, mayuc bintic ya xhu' yu'unic; stalel pehc'ambil ya xhilic, mayuc bin ora ya xch'ay ta o'tanil.

¹²Ha'at, Jehová te acuentahinej spisil, te yac atsahtaybe yo'tan te mach'atic toj yo'tanic, te yac ana'be yo'tan soc te bin snopoje, a'bon quil te spacol yac awac'ticlambe, como cac'oj ta acuenta te bin ut'il ayone.

¹³¡C'ayojtayahic te Jehová, halbeyahic yutsil sc'oblal! como la ya'be ta libre te scuxlejal te pobre ta sc'ab te mach'atic chopolique.

¹⁴¡Ma lecuc sc'oblal te bin c'ahc'alil te ayinone! ¡Te bin c'ahc'alil la yayinteson jnan ayuc ma ba yich'oj bendición!

¹⁵¡Ma me lecuc sc'oblal te mach'a hich la yalbe te jtate: Ayinix aquerem-nich'an! te xchihe.

¹⁶Te winic ini hichuc me te bin ut'il te pueblohetic te jinotic yu'un Jehová te ma ba la sna'be yo'bolil sba. Ac'a ya'iy awetic ta sahb, soc c'op yu'un guerra ta ohlil c'ahc'al,

¹⁷como ma ba la smilon ta sch'uht te jnane; ha'uc jmuquenal c'oht te jnan te hichuque, te staleluc swoloj te yale.

¹⁸¿Bin yu'un loc'on tal ta sch'uht jnan yu'un yilel wocol soc sc'uxul soc te ya xlaj jcuxlejal ta q'uexlal?