Read Tzeltal Jeremías 21 Bible Online

Jeremías 21 - Tzeltal bible

Jeremías 21

¹Te sc'op Jehová te tal ta stojol Jeremías te c'alal te ajwalil Sedequías la sticon bahel te Pasur snich'an Malquías soc te sacerdote Sofonías snich'an Maasías yu'un hich ya yalbeyic te Jeremías:

²Joc'obeya te Jehová ta jcuentacotic, como te Nabucodonosor ajwalil yu'un Babilonia yac ya'belotic guerra. Te Jehová ya wan spasbotic jchahp a'teliletic yu'un, te hich ya yihquitayotic hilel, xchihic.

³La sjac' te Jeremías: Halbeya te Sedequías:

⁴Hich yaloj te Jehová te Dios yu'un Israel: Ya cac' suhtuc bahel te a'tejibaletic yu'un guerra te ay ta ac'abic, te yaquex ta ya'beyel guerra a te ajwalil yu'un Babilonia; soc te caldeohetic te sjoytayejex ta spat ts'ahc ya jtsobticlan tal ta yohlil te pueblo ini.

⁵Ho'on jachoj jc'ab ta ya'beyelex guerra soc yip jc'ab, soc quilimba soc smuc'ul sc'ahc'al co'tan.

⁶Ya quehchentes te mach'atic nahinemic ta pueblo ini, ants-winiquetic soc chambahlametic; ya me xlajic yu'un jmilawal-chamel te xiweltic sba.

⁷Ta patil, xchi te Jehová, ya cac' ta c'abal te Sedequías ajwalil yu'un Judá, te a'batetic yu'un soc te mach'atic cuxul hilic yu'un te jmilawal-chamel, te espada soc wi'nal, ya cac' ta sc'ab te Nabucodonosor ajwalil yu'un Babilonia, ta sc'ab te scontratac te ya slehbe scuxlejalic. Ha ya smilticlan ta espada; ma ba ya spasbe perdón, ma ba ya sc'uxultay, ma ba ya sna'be yo'bolil sbahic.

⁸Soc hich yac awalbe te pueblo ini: Hich yaloj te Jehová: Ilawil, ya cac' ta atojolic te sbehlal cuxlejal soc te sbehlal lajel.

⁹Te mach'a ya xhil ta pueblo ini ya me xlaj ta espada, ta wi'nal, o ta jmilawal-chamel; yan te mach'a ya xloc' bahel soc ya yac' sba ta sc'ab te caldeohetic te yac sjoytaybelexe, ya me xcuxaj; hich ya xcol te scuxlejale.

¹⁰Como jnopoj te ya ca'be te bin chopol, ma ha'uc te bin lec, te pueblo ini, xchi te Jehová. Ya x'a'bot ta sc'ab te ajwalil yu'un Babilonia, ha me ya ya'be sc'ahc'al.

¹¹Soc hich me xawalbe te ajwalil yu'un Judá: A'iybeya awa'iy sc'op te Jehová:

¹²Sts'umbalex David, hich ya yal te Jehová: Stojil me xawa'iyic chahpanwanej ta sab, ac'ahic ta libre te mach'a tembil yu'un te j'uts'inwanej, scuenta yu'un ma ba ya xloc' talte quilimba hich te bin ut'il c'ahc'te ya xtihl te mayuc mach'a ya xhu' yu'un stup'el, ta scaj te chopol awa'telique.

¹³Ayon ta acontra, ha'at te nahinemat ta sjuclej, ha'at te muc'ul tonat ta spamlej, xchi te Jehová; ha'ex te hich yac awalic: ¿Mach'a c'an taluc scontrahinotic? ¿Mach'a c'an ochuc tal ta ahnibal cu'untic? te xchihexe.

¹⁴Ho'on ya ca'beyex castigo, hich te bin ut'il ya sc'an te sit te awa'telique, xchi te Jehová. Ya ca'be sc'ahc'al te tohyem te'etic awu'unic te ya schic' spisil ta sjoyobal, xchi.