Read Tzeltal Jeremías 22 Bible Online

Jeremías 22 - Tzeltal bible

Jeremías 22

¹Hich la yal te Jehová: Cohan bahel ta sna te ajwalil yu'un Judá, halbeya te c'op ini:

²A'iybeya awa'iyic te sc'op Jehová, ha'at ajwalilat yu'un Judá te huculat ta shuctajib David, ha'at soc te a'batetic awu'un soc te pueblo te ya x'ochic tal ta ochibaletic ini.

³Hich yaloj te Jehová: Stojil me xawa'iy chahpanwanej soc pasa te bin stojil ta pasele. Ac'ahic ta libre ta sc'ab te j'uts'inwanej te mach'a tembil ta uts'inel yu'un soc ma me xawelc'ambe sbiluc te jyanlum, te me'ba' soc te me'ba' ants, soc ma me xamalbe sch'ich'el ta lugar ini te mach'a mayuc smule.

⁴Como teme yac ac'ohtesic ta pasel te c'op ini, te ajwaliletic te ya shuhcan sbahic ta shuctajib David ya me x'ochic tal ta ochibaletic yu'un te sna ajwalil ini, cajajtic ta carreta soc ta cawu, joquimbilic yu'un te a'batetic soc te pueblo yu'unique.

⁵Pero teme ma ba yac awich'ic ta cuenta te c'op ini, ho'on ya cal ta jamal, xchi te Jehová, te jimbil ya xhil te sna ajwalil ini, xchi.

⁶Te Jehová hich ya yalbe sc'oblal te sna ajwalil yu'un Judá: Hich c'ohemat ta jtojol te bin ut'il Galaad, hichat te bin ut'il te ba wits yu'un Líbano; pero ya me jc'atp'unat ta jochol taquin q'uinal, hich ya xc'ohat te bin ut'il pueblohetic te mayuc mach'a nahinem tey a.

⁷Ya jticombat tal jinawetic ta acontra, jujutuhl soc ya'tejibic; ya me sts'eticlambat te tsahbil cedrohetic awu'un soc ya me ya'beyic sc'ahc'al.

⁸Bayel ants-winiquetic ta yantic nacionetic ya me xc'axic bahel ta stojol te pueblo ini, hich ya sjoc'obe sbahic: ¿Bin yu'un te hich pasbot yu'un Jehová te muc'ul pueblo ini? xchihic.

⁹Hich ya xjac'botic: Como la yihquitayic hilel te chapbil-c'op yu'un te Jehová te Dios yu'unique, la sch'uhuntayic te yantic diosetic soc la yac' sbahic ta a'batinel yu'unic, xchi te Jehová.

¹⁰Ma me xawoq'uetayic te mach'a chamen, ma me xamel awo'tan ta stojol; tulan xawoq'uetay te mach'a ya xbaht ta chuquel, como mayuquix bin ora ya suht talel soc ma ba ya yilix te q'uinal te banti ayine.

¹¹Como te Jehová hich la yalbe sc'oblal te Salum snich'an Josías, ajwalil yu'un Judá, te och ta sjelol ta ajwalil te Josías te state, te loc' bahel ta lugar ini: Ma ba ya suhtix tal li'i,

¹²tey ya xcham a ta banti ic'ot bahel ta chuquel; ma ba ya yilix te q'uinal ini, xchi.

¹³¡Obol sba te mach'a ya spas sna ta scuenta bin ma tojuc ta pasel, te ya spas scha'cajal na ta scuenta te bin ma tojuc; te tojol ya yac' a'tejuc te spat-xuhc, ma ba ya ya'be stojol sc'ab!

¹⁴te hich ya yal: Ya jpas muc'ul na te buen muc' yutil ta scha'cajal, xchi, soc ya spasbe sventanahul, ya smac'ticlan ta cedro ta yutil soc ya sbon ta tsaj.

¹⁵¿Ha bal ajwalilat ya xc'ohat yu'un te joytaybilat ta cedro? ¿Ma bal we' uch'uc te atat, soc la spas te bin toj ta pasel, hich lec c'oht ta loq'uel?

¹⁶Ha c'opoj yu'un te mach'a pobre soc te mach'a mayuc bin ay yu'un, hich lec c'oht ta loq'uel. ¿Ma bal hichuc ay sc'oblal te ya xna'ot jbahe? xchi te Jehová.

¹⁷Pero te asit soc te awo'tan ha nax ay sc'oblalic yu'un yac ale te bin ya sc'an awo'tan, yu'un yac amalbe sch'ich'el te mach'a mayuc smul, soc yu'un yac awa'iy uts'inwanej soc yac awac' c'axuc wocol.

¹⁸Ha yu'un te Jehová hich ya yalbe sc'oblal te Joacim snich'an Josías, ajwalil yu'un Judá: Ma ba ya x'oq'uetayot yu'unic, te hich ya yalic: ¡Obol aba, hermano! ¡Obol aba, hermana! ma xchihuquic. Ma hichuc ya yalic ta oq'uel: ¡Obol aba, ajwalilat cu'un! ¡Obol aba, ha'at te ay awutsilal! ma xchihuquic.

¹⁹Hich ya yich' muquel te bin ut'il burro, ya yich' tasel bahel soc ya xch'ojot bahel ta spat te ochibaletic yu'un Jerusalén.

²⁰Mohan bahel ta Líbano soc awonan, toya ac'op ta Basán, awonan c'alal Abarim, como jimbiliquix spisil te mach'atic smulanejat.

²¹La jc'oponat te c'alal ay bayel bintic ay awu'un, pero hich la awal: ¡Ma ba ya ca'iy! xchihat. C'alal ta aqueremil hich ay te atalele, mayuc bin ora la awa'iybon te jc'ope.

²²Spisil te jcananetic awu'un ya xcanantayotic yu'un ic', soc te mach'atic smulanejat ya x'ic'otic bahel ta chuquel. Hich ya xq'uexawat soc peq'uel ya xc'ohat ta scaj spisil achopolil.

²³Ha'at te nahinemat ta Líbano, te apasoj apechech ta cedrohetic, ya me x'ahcanajat te c'alal ya xtal te sc'uxule, ha te sc'uxul hich te bin ut'il ants ya x'alaj.

²⁴¡Cuxulon, xchi te Jehová, aunque ha jch'ocow ta jwa'el-c'ab te Jeconías[8] snich'an Joacim, ajwalil yu'un Judá, ya jloq'ues tey a!

²⁵Ya cac'at ta sc'ab te mach'atic ya slehbat acuxlejal, ta sc'ab te mach'atic xiweltic sba ta asit, ta sc'ab Nabucodonosor ajwalil yu'un Babilonia soc ta sc'abic te caldeohetique.

²⁶Ya cac' te yac awich' chuquel bahel, ha'at soc anan te la yayintesat, ta yan q'uinal ta banti ma ba tey ayinex a, tey ya xchamex a.

²⁷Ma ba ya scha'suhtex tal ta q'uinal banti awo'tanuc ya xcha'talex tey a.

²⁸Te winic Jeconías, ¿ha bal q'uib te p'ajbil soc wuybil? ¿Ha bal te bin mayuc mach'a ya sc'ane? ¿Bin yu'un te ch'ojot bahel soc snich'nab, te ch'ojotic bahel ta q'uinal te ma sna'beyic sbahe?

²⁹¡Lumq'uinal, lumq'uinal, lumq'uinal, a'iybeya awa'iy sc'op te Jehová!

³⁰Hich yaloj te Jehová: Hich xats'ihbabe hilel sc'oblal te winic ini te bin ut'il mach'a mayuc snich'an, te bin ut'il winic te mayuc bin ya sta ta scuxlejal, como mayuc jtuhluc sts'umbal ya xc'oht shuhcan sba ta shuctajib David, ma x'och ta ajwalil yu'un Judá, xchi te Jehová.