Read Tzeltal Jeremías 27 Bible Online

Jeremías 27 - Tzeltal bible

Jeremías 27

¹Ta shahchibal te ay ta ajwalil yu'un Judá te Sedequías[9] snich'an Josías, tal te sc'op Jehová ini ta stojol Jeremías:

²Hich la yalbon te Jehová: Pasa yugo soc schucojbil, ac'a ta anuc'.

³Ticona c'op ta stojol te ajwaliletic yu'un Edom, Moab, Amón, Tiro soc Sidón ta scuenta te j'al-c'opetic te talemic ta Jerusalén ta stojol Sedequías ajwalil yu'un Judá.

⁴Halbeya mandar te hich me ya yalbeyic te ajwaliletic yu'unic, te hich ya yal te Jehová te scuentahinej spisil, te Dios yu'un Israel:

⁵Ta scuenta smuc'ul cu'el soc ta scuenta te jc'ab la jpas te bahlumilal, te ants-winiquetic soc te chambahlametic te ayic ta sba te lumq'uinal, soc la jca'be te mach'a ya sc'an co'tane.

⁶Ta ora ini ca'beyej ta sc'ab Nabucodonosor ajwalil yu'un Babilonia, te a'bat cu'un, spisil te q'uinaletic ini, soc nix te ha'mal chambahlametic yu'un ya ya'batin.

⁷Spisil te nacionetic ya me yac' sbahic ta a'batinel yu'un soc te snich'an soc smam, ha to c'alal ya xc'oht yorahil te slumal nix ya x'och ta mosohil yu'un bayel nacionetic soc muc'ul ajwaliletic.

⁸Teme ay nación o ajwalil te ma ba ya yac' sba ta a'batinel yu'un te Nabucodonosor ajwalil yu'un Babilonia, te ma ba ya yac' ta snuc' te yugo yu'un te ajwalil yu'un Babilonia, ya ca'be castigo ta espada, ta wi'nal soc ta jmilawal-chamel ha to c'alal ya xlaj ta sc'ab, xchi te Jehová.

⁹Ha yu'un ma me xawa'iybeyic sc'op te jalwanejetic awu'unic, te jna'ojeletic, jwayichijeletic, jwoyawetic soc te jmonawetic awu'unic te hich ya yalbeyex: Ma ba yac awac' abahic ta a'batinel yu'un te ajwalil yu'un Babilonia, te xchihique.

¹⁰Ya yalbeyex lotil sc'op-jalwanej, te ha ya yac' te ya xnamijex bahel ta aq'uinalic, soc te ya jtenex loq'uel soc ya xch'ayex bahele.

¹¹Yan te nación te ya yac' ta snuc' te yugo yu'un te ajwalil yu'un Babilonia soc te ya yac' sba ta a'batinel yu'une, ya cac' te ya xhil ta sq'uinal, ya schahpan te sq'uinal soc ya xhil ta nahinel tey a, xchi.

¹²Ha nix hich la jcalbe te Sedequías ajwalil yu'un Judá spisil te c'opetic ini: Ac'a ta anuc' te yugo yu'un te ajwalil yu'un Babilonia; ac'a aba ta a'batinel ta stojol soc ta stojol te pueblo yu'une, hich me ya xcuxajex a.

¹³¿Bin yu'un ya xlajat soc te pueblo awu'un ta espada, ta wi'nal soc ta jmilawal-chamel, hich te bin ut'il yaloj te Jehová ta stojol te nación te ma ba ya yac' sba ta a'batinel yu'un te ajwalil yu'un Babilonia?

¹⁴Ma me xawa'iybeyic sc'op te jalwanejetic te hich ya yalbeyex: Ma ba yac awac' abahic ta a'batinel yu'un te ajwalil yu'un Babilonia, te xchihique, yu'un lotil te sc'op-jalwanej yu'unique.

¹⁵Como ma ho'ucon la jticonlan, xchi te Jehová; ya yalic lotil sc'op-jalwanej ta scuenta jbihil; hich ya jtenex loq'uel soc ya xch'ayex bahel, ha'ex soc te jalwanejetic te la yalbeyex te sc'op-jalwanej, xchihon.

¹⁶Hich nix la jcalbe te sacerdotehetic soc spisil te pueblo ini: Hich yaloj te Jehová: Ma me xawa'iybeyic sc'op te jalwanejetic te hich ya yalbeyex: Te bintic tuhun ta sna te Jehová ora me ya yich'ic suhtel tal ta Babilonia, te xchihique, yu'un lotil te sc'op-jalwanej yu'unique.

¹⁷Ma me xawa'iybeyic te sc'opique; ac'a abahic ta a'batinel yu'un te ajwalil yu'un Babilonia, hich ya xcuxajex. ¿Bin yu'un ya yich' jinel te pueblo ini?

¹⁸Teme ha jalwanejetic soc teme yich'ojic te sc'op Jehová, ac'a sc'oponic te Jehová te scuentahinej spisil scuenta yu'un te bintic hilemic te ya xtuhunic ta sna Jehová soc te ayic ta sna te ajwalil yu'un Judá soc ta Jerusalén te manchuc ya x'ich'otic bahel ta Babilonia, xchi.

¹⁹Como te Jehová te scuentahinej spisil hich yaloj sc'oblal te oyetic, te yawil ha', te scajtajibic soc spisil bintic ya xtuhun te hilemic ta pueblo ini,

²⁰te ma ba ich'otic bahel yu'un te Nabucodonosor ajwalil yu'un Babilonia te c'alal la yic' bahel ta Babilonia te Jeconías snich'an Joacim, ajwalil yu'un Judá, soc spisil te mach'atic ich'bilic ta muc' ta Judá soc ta Jerusalén;

²¹hich yaloj te Jehová te scuentahinej spisil, te Dios yu'un Israel, sc'oblal te bintic ya xtuhun te hilemic ta sna Jehová soc ta sna te ajwalil yu'un Judá soc ta Jerusalén:

²²Ya me x'ich'otic bahel ta Babilonia, tey ya xhilic a ha to c'alal ya sta yorahil te ya xtal quile, xchi te Jehová. Hich ya quich' suhtel tal soc ya jcha'ac'ticlan ta lugar ini, xchi.