Read Tzeltal Jeremías 28 Bible Online

Jeremías 28 - Tzeltal bible

Jeremías 28

¹Ha nix ta ha'bil, ha ta shahchibal te ay ta ajwalil yu'un Judá te Sedequías, te jalwanej Hananías snich'an Azur te talem ta Gabaón, hich la yalbon ta sna Jehová ta stojol te sacerdotehetic soc spisil te pueblo:

²Hich yaloj te Jehová te scuentahinej spisil, te Dios yu'un Israel: Ya jwac'be te yugo yu'un te ajwalil yu'un Babilonia.

³Ma sta cheb ha'bil ya cac' te ya suht tal ta lugar ini spisil te bintic ya xtuhun ta sna Jehová te la yich' bahel ta Babilonia te ajwalil Nabucodonosor.

⁴Soc ya cac' suhtuc tal ta lugar ini te Jeconías snich'an Joacim, ajwalil yu'un Judá, soc spisil te mach'atic yu'un Judá te ic'otic bahel ta Babilonia, xchi te Jehová, yu'un ya jwac'be te yugo yu'un te ajwalil yu'un Babilonia, xchi te Hananías.

⁵Te jalwanej Jeremías hich la sjac'be sc'op te jalwanej Hananías ta stojol te sacerdotehetic soc spisil te pueblo te ayic ta sna Jehová:

⁶¡Hichuc, ac'a spas te Jehová! Ac'a sc'ohtes ta pasel Jehová te bin la awal ta sc'op-jalwanej, te ya suht tal ta lugar ini te bintic ya xtuhun ta sna Jehová soc spisil mach'atic ic'otic bahel ta Babilonia.

⁷Pero a'iya awa'iy te bin ya cal ta atojol soc ta stojol spisil te pueblo:

⁸Te jalwanejetic te nahil c'axic cu'untic ta namey la yalic ta sc'op-jalwanej sc'oblal guerra, wocol soc jmilawal-chamel ta stojol bayel ta chahp nacionetic soc muc'ul ajwaliletic.

⁹Pero te jalwanej te ya yalbe sc'oblal lamal q'uinal, teme ya xc'oht ta pasel te sc'ope, hich ya xna'bot sba te ha jalwanej te ticombil yu'un te Jehová, xchi.

¹⁰Ha yu'un te jalwanej Hananías la sloq'uesbe te yugo ay ta snuc' te jalwanej Jeremías, la swac'be,

¹¹hich la yal ta stojol spisil te pueblo: Hich yaloj te Jehová: Li' ta cheb ha'bil hich nix ya jwac'be te yugo yu'un te ajwalil Nabucodonosor ta Babilonia te ay ta snuq'uic spisil te nacionetic, xchi. C'alal hich la ya'iy, baht te Jeremías.

¹²C'alal swac'ojix a te yugo ay ta snuc' te jalwanej Jeremías te Hananías, tal sc'op te Jehová ta stojol te Jeremías, hich la yal:

¹³Bahan, halbeya te Hananías: Hich yaloj te Jehová: La awac' yugo pasbil ta te', pero ho'on la jchahpambat yugo pasbil ta taq'uin.[10]

¹⁴Como hich yaloj te Jehová te scuentahinej spisil, te Dios yu'un Israel: Ca'beyej yugo pasbil ta taq'uin ta snuc' spisil nacionetic yu'un ya yac' sbahic ta a'batinel yu'un te Nabucodonosor ajwalil yu'un Babilonia, ya me yac' sbahic ta a'batinel yu'un; asta ca'beyej ta sc'ab te ha'mal chambahlametic, xchi.

¹⁵Ha yu'un te jalwanej Jeremías hich la yalbe te Hananías: ¡A'iya awa'iy, Hananías! Ma ba sticonejat te Jehová, la awa'be smuc'ulin yo'tanic lot te pueblo ini.

¹⁶Ha yu'un hich yaloj te Jehová: Ya jloq'uesat bahel ta sba te lumq'uinale. Ya me xchamat ta ha'bil ini, como la awal toyba-c'op ta scontrahinel te Jehová, xchi.

¹⁷Ta shuquebal u ta ha'bil nix cham te jalwanej Hananías.