Read Tzeltal Jeremías 3 Bible Online

Jeremías 3 - Tzeltal bible

Jeremías 3

¹Ay hich ya yalic: Teme ay mach'a ya yihquitay hilel yihnam, ya xloc' bahel te ants soc ya xnuhpun soc yan winic, ¿ya to bal scha'ic'ot xan yu'un te winique? ¿Ma bal jc'axeluc ya xbohlob te q'uinal yu'un? Pero ha'at la awac' aba ta antsinel soc tsobol mach'atic jun awo'tan aba soc, ¿ya to bal suhtat tal ta jtojol? xchi te Jehová.

²Toya mohel asit ta toyol t'axal q'uinal, ilawil teme ay banti ma ba la awac' aba ta antsinel. La ahuhcan aba ta ti'be ta smahliyel te mach'a yac awac' aba ta antsinel yu'un, hich te bin ut'il jtuhl árabe ta jochol taquin q'uinal. La abohlobtes te q'uinal ta scuenta te antsinel awu'un soc achopolil.

³Ha scuentahil te la yich' comel te ha'ale, te ma ba la yac' ha'al ta yorahil te ya xyaxub te q'uinale. Pero hich awelaw te bin ut'il jmulawil ants, ma ba la ac'an ya xq'uexawat yu'un.

⁴¿Ma bal yach'iluc to hich la awalbon: Jtat, ha'at joquinwanejat cu'un c'alal to ta jqueremil,

⁵¿spisil bal ora ya x'ilinat? ¿sbahtel bal q'uinal ya xhalaj te awilimba? ma bal xchihucat? Hich ya xc'opojat, pero la apas spisil te bin chopol te hu' awu'une, xchi te Jehová.

⁶Ta yorahil ay ta ajwalil a te Josías hich la yalbon te Jehová: ¿Awiloj bal te bin la spas te toyba Israel? Bahemix ta spisil toyol witsiltic soc ta ye'tal spisil pimil ya'binal te'etic, tey la yac' sba ta antsinel a.

⁷Hich la jcal: C'alal pasbilix yu'un spisil ini, ya me suht tal ta jtojol, xchihon; pero ma ba suht talel. Te yihts'in, ha te toyba Judá,

⁸la yil te la jpasbe hun yu'un ihquitayel te toyba Israel, pero te toyba Judá, te yihts'in, ma ba la xi', ha nix hich baht yac' sba ta antsinel.

⁹Te bin ut'il mayuc sc'oblal la ya'iy te la yac' sba ta antsinel, hich la sbohlobtes te q'uinal, yu'un la yac' sba ta antsinel ta stojol ton soc te'.

¹⁰Aunque hich c'oht ta pasel, te Judá, te yihts'in, ma ba suht tal ta jtojol soc spisil yo'tan, ha nax la spason ta lot, xchi te Jehová.

¹¹Hich la yalbon te Jehová: Te toyba Israel ha toj xan c'ohem te bin ut'il Judá te ma junuc yo'tan ta jtojol.

¹²Bahan, hich me xapuc ta halel ta stojol norte: Suhtanic tal ta jtojol, toyba Israel, xchi te Jehová, ma ba soc ilimba ya quilatix, como ho'on jc'uxultaywanejon, xchi te Jehová, ma ba spisil ora ya x'ilinon.

¹³Na'a me hiche te achopolil, como acontrahinej te Jehová, te Dios awu'un, soc la awac' aba ta antsinel ta stojol yantic diosetic ta ye'tal spisil pimil ya'binal te'etic, ma ba la awa'iybon te jc'ope, xchi te Jehová.

¹⁴Suhtanic talel, toyba al-nich'anex, xchi te Jehová, como ho'on amamalalon; ya me quiq'uex, jujutuhl ta jujun pueblo soc cha'cha'tuhl ta jujuchahp ats'umbal, ya quiq'uex talel ta Sión.

¹⁵Ya ca'beyex jcananetic te lec co'tan yu'unic, te ya stojobtesex bahel soc sp'ijil yo'tanic soc ta scuenta bintic ay ta na'el.

¹⁶Te c'alal ya sta yorahil te yac ap'ohl abahic soc te ya xmuc'ubex ta q'uinal, xchi te Jehová, ma ba hich ya yich' halel: ¡Te scaxahul te chapbil-c'op yu'un Jehová! ma xchihuquic. Ma ba ya xtal ta yo'tanic, ma ba ya sna'iquix, mayuquix ta cuenta, ma ba ya yich'ix pasel yan.

¹⁷Ta hich ora ya me ya'beyic sbihilin te Jerusalén Muc'ul Huctajibal yu'un Jehová, xchi, soc spisil te nacionetic ya me stsob sbahic ta Jerusalén ta scuenta te sbihil Jehová; ma ba ya yo'tantayiquix st'unel bahel te chopol yo'tanique.

¹⁸Ta hich ora te sna Judá ya sjoquin te sna Israel, soc pajal ya xloq'uic tal ta q'uinal ta norte, ya xc'ohtic ta q'uinal te la jca'be yich'ic hilel te ame'atatique.

¹⁹Hich la jcal: Mero la jc'an te ya caq'uex ta al-nich'anetic cu'un soc te ya ca'beyex t'ujbil q'uinal, ha te q'uinal te c'ax hich yutsil a te bin ut'il te yich'ojic yantic nacionetic. La jcal te, Jtat, xchihuquex ta jtojol, te ma ba yac awihquitay aba at'umbelon.

²⁰Pero hich te bin ut'il jtuhl ants te ma junuc yo'tan ta stojol te smamalal, hich ma junuc awo'tanic ta jtojol, ha'ex pueblo Israel, xchi te Jehová.

²¹Chicnaj aw ta toyol t'axal witsiltic, ha te oq'uel yu'un sc'anel coltayel te israeletic, como la showiytesic te be yu'unic, la sch'ay ta yo'tanic te Jehová, te Dios yu'unique.

²²Suhtanic tal ta jtojol, toyba al-nich'anex, ya jlecubtesex yu'un atoybahilic, xchi te Jehová. Ilawil, ya suhtotic tal ta atojol, como ha'at Jehovahat te Diosat cu'uncotique.

²³Melel jlo'loywanejetic te tsehletic soc bayel c'opetic ta sba witsiltic; melel ta scuenta Jehová te Dios cu'untic ay te colel yu'un Israel.

²⁴Te loc'ombahetic te q'uexlaltic sba la slajimbeyic sit ya'tel te jme'jtatic, c'alal ta jqueremiltic: ha te tuminchijetic soc wacaxetic, te queremetic soc ach'ixetic yu'unic.

²⁵Ac'a jmehtsan jbahtic ta jq'uexlaltic, ac'a smucotic te pehc'anel cu'untique; como jtahoj jmultic ta stojol Jehová te Dios cu'untic, ho'otic soc te jme'jtatic, c'alal ta jqueremiltic c'alal ora ini, soc ma ba la jch'uhumbetic sc'op te Jehová te Dios cu'untique, xchihic.