Read Tzeltal Jeremías 31 Bible Online

Jeremías 31 - Tzeltal bible

Jeremías 31

¹Ta hich ora, xchi te Jehová, ho'on Dioson ya xc'ohon yu'un spisil ta chahp sts'umbal Israel, soc ha pueblo cu'un ya xc'ohtic, xchi.

²Hich yaloj te Jehová: Te pueblo te ma ba tahot yu'un te espada la sta yutsil-o'tanil ta jochol taquin q'uinal, c'alal la sle cux-o'tanil te Israel.

³Te Jehová nameyix la yac' sba ta ilel ta jtojolt, hich la yal: Sbahtel q'uinal c'uxat ta co'tan; ha yu'un te la jcac' halajuc ta atojol te c'uxultayel cu'une.

⁴Ya jcha'pasat xan ta yach'il, hich yac awich' pasel, ha'at ach'ix Israel. Ya me acha'ich' xan te panderohetic awu'unic soc ya xloc'at bahel ta ahc'ot soc yutsil q'uinal.

⁵Ya me ats'un xan ts'usubiltic ta witsiltic yu'un Samaria; te mach'atic ya xts'umbajic ya me smulambeyic te site.

⁶Ya me sta sc'ahc'alel te hich ya x'awonic te j'il-q'uinaletic ta witsiltic yu'un Efraín: Hahchanic, mohucotic bahel ta Sión, ta stojol Jehová te Dios cu'untic, xchihic.

⁷Hich yaloj te Jehová: C'ayojinanic soc yutsil awo'tanic ta scuenta Jacob; awonanic ta scuenta te jolal yu'un te nacionetique. Ac'ahic ta a'iyel te yutsilal sc'oblal, soc hich me yac awalic: Jehová, coltaya te pueblo awu'un, te mach'atic hilemic yu'un Israel, xchihanic me.

⁸Ilawil, ya cac' suhtuc tal ta q'uinal te ay ta norte, ya jtsob tal c'alal sti'il te bahlumilale. Ta yohlilic ay ts'o'sitetic soc coxo'etic, ay ants te swoloj yal soc ay ants te ayinemix yal; ¡c'ax bayelic te ya suhtic talele!

⁹Soc oq'uel ya xtal, soc sc'uxul co'tan ya quic'ticlan suhtel tal. Ya cac' behenuquic ta sti'il be-ha'etic, ta toj be te banti ma ba ya sc'ohchin yoquic, como ho'on tatilon yu'un Israel, soc te Efraín, ha jba-nich'an.

¹⁰A'iybeya awa'iyic te sc'op Jehová, nacionetic, halbeyahic sc'oblal ta sti'il mar te namal ayic: Te mach'a la spuc bahel te Israel ya stsob tal soc ya scanantay, hich te bin ut'il te jcanan ya scanantay te jtsohb tuminchijetic yu'une, xchihex me.

¹¹Como te Jehová la yic' loq'uel ta libre te Jacob, la yac' ta libre ta sc'ab mach'atic bayel xan yipic.

¹²Ya me xtalic soc aw yu'un tse'el-o'tanil ta sba wits Sión, ya me smulambe yutsil slequil te Jehová: ha te trigo, vino soc aceite, te yalatac te tuminchijetic soc te wacaxetique. Hich ya xc'oht scuxlejalic te bin ut'il awal-ts'unubil te ay ya'lel, mayuquix bin ora ya xlaj yipic.

¹³Hich te ach'ixetic bayel yutsil yo'tanic ya x'ahc'otajic, ha nix hich te queremetic soc te mamaletique. Ya jc'atp'umbe ta stse'elil-o'tanil te oq'uel yu'unic, ya jmuc'ubtesbe q'uinal ya'iyic, soc ya jc'atp'umbe ta yutsil q'uinal te swocolique.

¹⁴Ya jnojes ta bayel yutsil slequil te sch'uhlel te sacerdotehetic, soc te pueblo cu'un ya xnoj ta bintic lec ay cu'un, xchi te Jehová.

¹⁵Hich yaloj te Jehová: Ay chicnaj c'op ta Ramá, mel-o'tan soc bayel oq'uel. Ha te Raquel te yac yoq'uetaybel yalatac, ma sc'an te ya xmuc'ubtesbot q'uinal ya'iy, como ch'ayic bahel te yalatac, xchi.

¹⁶Hich yaloj te Jehová: Coma aba ta oq'uel soc ma xawac' loc'uc ya'lel asit, como ya yich' tojel te awa'tel, xchi te Jehová, ya suhtic loq'uel tal ta sq'uinal te contrahe.

¹⁷Ay bin yac amahliy bahel ta patil awu'un, xchi te Jehová, te awalatac ya me suhtic talel ta slumalic.

¹⁸La jca'iybe yoq'uel te Efraín, te hich la yal: La awa'bon castigo, hich la jquich'ix castigo te bin ut'il jcoht tut toro te ma ba c'ahytesbile. Ic'awon suhtel, hich ya suhton tal, como ha'at Jehovahat te Diosat cu'une.

¹⁹C'alal la jpitix jba, la jsuhtes co'tan; c'alal la jna'ix te ay jmul, la jmajulan jtahn yu'un. Q'uexawon soc pehc'ajon, como la jcuch te q'uexlal yu'un te jqueremil, xchi.

²⁰Te Efraín, ¿ma bal ha'uc te jnich'an te bayel sc'oblal ta co'tan? ¿Ma bal ha'uc te alal te ya smulan te co'tane? Aunque bayel la jtsits, ya jna'ulan. Ha yu'un ya stij sba co'tan ta scuenta, bayel me ya jna'be yo'bolil sba, xchi te Jehová.

²¹A'beya señahiletic ta be, a'beya señahiletic te ya stojobtesat bahel; ilawil ta lec te be, te be te banti behenemat bahele. Suhtan tal, ach'ix Israel, suhtan tal ta pueblohetic awu'un.

²²¿Jayeb xan c'ahc'al te ya xhowiyat ta behel, ach'ix te ma junuc awo'tan? Como te Jehová spasojix te bin yach'il ta bahlumilal: jtuhl ants ya smac jtuhl winic, xchi.

²³Hich yaloj te Jehová te scuentahinej spisil, te Dios yu'un Israel: C'alal ya cac' te ya suhtic tal te jchuqueletic, hich me ya yalic yan buelta ta sq'uinal Judá soc ta pueblohetic yu'un: Te Jehová ac'a ya'bat bendición, ha'at yawilat te bin stojil ta pasel, ha'at ch'ul witsat, xchihic.

²⁴Te Judá soc spisil te pueblohetic yu'un pajal ya xnahinic tey a, te j'a'teletic ta q'uinal soc te mach'atic ya xbahtic soc te tsohbotsohb tuminchijetique.

²⁵Ya ca'be xan yipic te mach'atic luhbenic soc ya cac' lecubuc q'uinal ya'iyic te mach'atic ayic ta mel-o'tan, xchi.

²⁶Hich ora wihc' jsit soc la jquil ta joyobal; buen lec te jwayiche.

²⁷Ya xtal sc'ahc'alel, xchi te Jehová, te ya jts'un te sna Israel soc te sna Judá soc sts'umbal winiquetic soc sts'umbal chambahlametic.

²⁸Hich te bin ut'il la jtsahtay ta sbulel loq'uel soc ta jinel cohel, ta slajinel, ch'ayel soc ta ya'beyel swocolic, ha nix hich ya jtsahtay ta spasel soc ta sts'unel, xchi te Jehová.

²⁹Ta hich ora ma hichuc ya yaliquix: Te me'iltatiletic la slo'ic pajal ts'usub, te snich'nabic sijub yehic yu'un, te xchihique.

³⁰Pero jujutuhl ya xlaj yu'un te smule; te mach'a ya slo' te pajal ts'usube, ha nix ya sijub ye yu'un, xchi.

³¹Ya xtal sc'ahc'alel, xchi te Jehová, te ya jpas yach'il chapbil-c'op soc te sna Israel soc te sna Judá.

³²Ma hichuc te bin ut'il te chapbil-c'op la jpas soc te sme'static c'alal la jnit loq'uel ta sc'abic ta sq'uinal Egipto; como la sc'axuntaybonic te chapbil-c'op cu'un, aunque ha smamalal c'ohon, xchi te Jehová.

³³Hich ay te chapbil-c'op te ya jpas soc te sna Israel ta patil bahel, xchi te Jehová: Ya cac' ta sjolic te ley cu'un soc ya jts'ihbabe ta yo'tanic. Ho'on Dioson yu'unic ya xc'ohon, soc ha pueblo cu'un ya xc'ohtic.

³⁴Mayuquix mach'a ya snohptes te spat-xuhc, mayuc mach'a ya ya'be snop te yermano, te hich ya yal: Na'beya sba te Jehová, te xchihe, como spisilic ya me sna'bonic jba, muc' biq'uit, xchi te Jehová. Como ya jpasbe perdón yu'un te schopolilic soc ma ba ya jna'beyix xan te smulique, xchi.

³⁵Hich yaloj te Jehová, te ya yac' te c'ahc'al scuenta sacal q'uinal ta c'ahc'alel, soc te ya yalbe mandar te u soc te eq'uetic te ya xtihlic ta ahc'abal; te ya ya'be stij sba te mar soc ya xc'opoj te tulan stselajan, ha Jehová te scuentahinej spisil te sbihile, hich ya yal:

³⁶Teme ay ya xch'ay ta jtojol te yip te mandariletic ini, xchi te Jehová, ha nix hich te sts'umbal Israel ma ba stalel ya xhilix ta nación ta jtojol te hichuque, xchi.

³⁷Hich yaloj te Jehová: Te yacuc xhu' ta p'isel te ch'ulchan ta toyol soc te yacuc xhu' ta tsahtayel yil te yich'o-ip te bahlumilal, ha nix hich ya xhu' ya jch'ay ta co'tan spisil te sts'umbal Israel ta scaj spisil te bintic spasojique, xchi te Jehová.

³⁸Ya xtal sc'ahc'alel, xchi te Jehová, te ya yich' cha'pasel xan ta stojol Jehová te muc'ul pueblo ini, c'alal ta toyol bahlal ts'ahc yu'un Hananeel ha to ta Ochibal ta xuhc.

³⁹Te sp'isojibal toj ya xloc' bahel c'alal ta tsehl yu'un Gareb, tey ya yac' buelta c'alal ta Goa.

⁴⁰Spisil te sjuclej yu'un chamen baq'uetetic soc yu'un tan, soc spisil te q'uinal c'alal ta sba be-ha' yu'un Cedrón, c'alal ta xuhc ta ochibal yu'un Cawuhetic ta stojol banti ya xloc' tal c'ahc'al, ha ch'ultesbil ta stojol Jehová. Mayuc bin ora ya yich'ix xan bulel soc jinel, xchi.