Read Tzeltal Jeremías 36 Bible Online

Jeremías 36 - Tzeltal bible

Jeremías 36

¹Ta schanebal ha'bil yochel ta ajwalil yu'un Judá a te Joacim snich'an Josías, tal te sc'op Jehová ta stojol Jeremías, hich la yal:

²Ich'a balbil hun, ts'ihbaya tey a spisil te bintic la jcalbat ta scontrahinel Israel, Judá soc spisil te nacionetic, c'alal bin ora hahch jc'oponat, ha te c'alal ay ta ajwalil a te Josías c'alal yo'tic.

³Te sna Judá, c'alal ya ya'iy spisil te bintic chopol jnopoj te ya jpasbe, ya wan suhtes yo'tanic jujutuhl yu'un te chopol be yu'unique, hich ya jpasbe perdón yu'un schopolil soc smul, xchi.

⁴Hich te Jeremías la yic' tal te Baruc snich'an Nerías. Spisil te bintic halbot yu'un Jehová te Jeremías, te Baruc la sts'ihbay ta balbil hun.

⁵Patil, te Jeremías hich la spas ta mandar te Baruc: Ma xyac'on ochel ta sna Jehová.

⁶Ha yu'un, bahan ta sna Jehová te bin ora ya scom swe'elic, halbeya ya'iyic te sc'op Jehová te la jcalbat, te ts'ihbabil awu'un ta balbil hun; halbeya ya'iyic spisil mach'atic yu'un Judá te talemic ta pueblohetic yu'unique.

⁷Ya wan xc'oht ta stojol Jehová te bin ya yalic wocol yu'un, soc jujutuhl ya wan yihquitayic hilel te chopol be yu'unique; como muc' te yilimba soc sc'ahc'al yo'tan te Jehová te ya xhul ta stojol te pueblo ini, xchi.

⁸Hich te Baruc snich'an Nerías la spas spisil bintic pasot ta mandar yu'un te jalwanej Jeremías; la yalbe ya'iyic ta sna Jehová te sc'op Jehová te ay ta balbil hun.

⁹Ta sbalunebal u ta yo'ebal ha'bil yochel ta ajwalil yu'un Judá a te Joacim snich'an Josías, la yich' halel te ya scom swe'elic ta stojol Jehová spisil te ants-winiquetic ta Jerusalén soc spisil mach'atic talemic ta pueblohetic yu'un Judá.

¹⁰Ta sna Jehová, ta stsahlul-na yu'un Gemarías snich'an Safán te jts'ihbajel, ta amac' te ay ta ahc'ol ta yochibal te Yach'il Puerta yu'un te sna Jehová, te Baruc la yil ta stojol spisil te ants-winiquetic te sc'op Jeremías te ts'ihbabil ta hun.

¹¹Te Micaías snich'an Gemarías, snich'an Safán, c'alal la ya'iy spisil te sc'op Jehová te ts'ihbabil ta balbil hun,

¹²co bahel ta sna te ajwalil, ta stsahlul-na yu'un te jts'ihbajel, tey la sta a huculic spisil te príncipaletic: ha te Elisama te jts'ihbajel, Delaía snich'an Semaías, Elnatán snich'an Acbor, Gemarías snich'an Safán, Sedequías snich'an Hananías soc spisil te yantic príncipaletique.

¹³Te Micaías la yalbe ya'iyic spisil te bintic la ya'iy te la yil ta balbil hun te Baruc ta stojol te pueblo.

¹⁴Ha yu'un spisil te príncipaletic la sticonic bahel te Jehudí snich'an Netanías, snich'an Selemías, snich'an Cusi, yu'un hich ya yalbe te Baruc: Ich'a tal te balbil hun te la awil ta stojol te pueblo, xchi. Hich te Baruc snich'an Nerías la stsac te balbil hun, tal ta stojolic.

¹⁵Hich halbot yu'unic: Huclan, ila ca'iycotic te bin ya yal te balbil hune, xchihic. Hich te Baruc la yil te hune.

¹⁶C'alal la ya'iyic spisil te bintic la yal, talel c'axel la yilbe sbahic soc xiwel, hich la yalbeyic te Baruc: Ya sc'an te ya calbetic ya'iy spisil te ajwalil, xchihic.

¹⁷La sjoc'obeyic te Baruc: Hala ca'iycotic bin ut'il la ats'ihbay spisil te c'opetic ini. ¿Ha bal te bin la yal te Jeremías? xchihic.

¹⁸Ha la yalbon spisil te c'opetic ini, la jts'ihbay ta tinta ta balbil hun, xchi te Baruc.

¹⁹Ha yu'un te príncipaletic hich la yalbeyic te Baruc: Bahan, nac'a abahic, ha'at soc Jeremías; ma me ayuc mach'a ya sna' banti ayex, xchihic.

²⁰La yaq'uic hilel te balbil hun ta stsahlul-na yu'un Elisama te jts'ihbajel, ochic bahel ta amac' ta banti ay te ajwalil, la yalbeyic ya'iy spisil.

²¹Te ajwalil la sticon bahel te Jehudí ta yich'el tal te balbil hun, hich baht yich' tal ta stsahlul-na yu'un Elisama te jts'ihbajel. Te Jehudí la yilbe ya'iy te ajwalil soc spisil te príncipaletic te joytaybilic yu'une.

²²Ha sbalunebal u a, te ajwalil ay ta na yu'un yorahil sic, tey ay yawil ac'al a te yac ta tihlele.

²³C'alal la yil cha'oxcaj ta hun te Jehudí, te ajwalil la sboj loq'uel ta cuchillo yu'un jts'ihbajel, la sch'oj ochel ta c'ahc' te ay ta yawil c'ahc'. Hich la spas ha to c'alal laj ta c'ahq'uel spisil te balbil hune.

²⁴Te ajwalil soc te a'batetic yu'un te la ya'iyic spisil te c'opetic, ma ba xiwic yu'un, ma ba la sch'i' sc'u'ic yu'un.

²⁵Te Elnatán, Delaía soc te Gemarías, aunque la yalbeyic wocol te ajwalil te manchuc ya schic' te balbil hune, ma ba a'iybot sc'opic yu'un.

²⁶Te ajwalil la spas ta mandar te Jerameel snich'an ajwalil, te Seraías snich'an Azriel, soc te Selemías snich'an Abdeel te ya me stsaquic te Baruc te jts'ihbajel soc Jeremías te jalwanej. Pero nac'bilic yu'un Jehová.

²⁷C'alal schic'ojix a te balbil hun te banti ay te c'opetic te la sts'ihbay te Baruc te halbot yu'un Jeremías, tal sc'op Jehová ta stojol Jeremías, hich la yal:

²⁸Ich'a yan balbil hun, ts'ihbaya tey a spisil te c'opetic te ts'ihbabil ta balbil hun te la schic' te Joacim ajwalil yu'un Judá.

²⁹Soc hich me yac awalbe te Joacin ajwalil yu'un Judá: Hich yaloj te Jehová: La achic' te balbil hun, soc hich la awal: ¿Bin yu'un te la sts'ihbay tey a te ya me xtal te ajwalil yu'un Babilonia, te ya sjin te q'uinal ini soc te ma ba ya yac' hiluc ants-winiquetic o chambahlametic tey a? xchihat.

³⁰Ha yu'un hich yaloj te Jehová sc'oblal Joacim ajwalil yu'un Judá: Ma me ayuc sts'umbal ya shuhcan sba ta shuctajib David, soc te sbaq'uetal ya x'ac'ot ta sc'uxul c'ahc'al soc ta sc'uxul sic ta ahc'abal.

³¹Ya ca'be castigo soc te sts'umbal soc te a'batetic yu'un ta scaj te smulique. Ya cac' ta stojolic soc te mach'atic nahinemic ta Jerusalén soc te winiquetic yu'un Judá spisil te bin chopol la jcalbe sc'oblal, te ma ba la yich'ic ta cuenta, xchi.

³²Ha yu'un te Jeremías la yich' xan yan balbil hun, la ya'be te Baruc te jts'ihbajel, te snich'an Nerías. Tey la sts'ihbay a spisil te c'opetic te halbil yu'un Jeremías te ay ta balbil hun te la schic' te ajwalil Joacim. Soc ay to xan bayel c'opetic tey a te pajal soque.