Read Tzeltal Jeremías 39 Bible Online

Jeremías 39 - Tzeltal bible

Jeremías 39

¹Ta slajunebal u yu'un te sbalunebal ha'bil yochel ta ajwalil yu'un Judá a te Sedequías, te Nabucodonosor ajwalil yu'un Babilonia soc spisil te soldadohetic yu'un la sjoytayic ta guerra te Jerusalén.

²Ta sbalunebal c'ahc'al ta schanebal u ta sbuluchebal (11) ha'bil yochel ta ajwalil a te Sedequías ay banti la yich' jamel te sts'ahcul te pueblo.

³Spisil te príncipaletic yu'un te ajwalil yu'un Babilonia ochic bahel, la slahman sbahic ta Ochibal ay ta ohlil, ha'ic te Nergal-Sarezer, Samgar-nebo, Sarsequim te jtsobaw yu'un te eunucohetic, Nergal-Sarezer te ay tulan ya'tel, soc spisil te yantic yu'un te ajwalil yu'un Babilonia te tulan ya'telique.

⁴Te Sedequías ajwalil yu'un Judá soc spisil te soldadohetic, c'alal la yilic, loq'uic ta ahnel ta pueblo ta ahc'abal ta sbehlal te ts'umbil nichimetic yu'un te ajwalil, ta ochibal te ay ta ohlil yu'un te cheb ts'ahquetique, loq'uic bahel ta sbehlal te Arabá.

⁵Pero te soldadohetic yu'un te caldeohetic la snutsic bahel, la stahic te Sedequías ta spamlej yu'un Jericó. La stsaquic, la yiq'uic bahel ta Ribla ta sq'uinal Hamat ta stojol te Nabucodonosor ajwalil yu'un Babilonia, te la yal bin ya xpasbot.

⁶Tey ta Ribla te ajwalil yu'un Babilonia la smilticlan ta stojol Sedequías te snich'nabe, soc ha nix hich la smilticlan spisil te mach'atic muc' sc'oblalic ta Judá,

⁷soc la sloq'uesbe sit te Sedequías, la schuc bahel ta cadena, la yic' bahel ta Babilonia.

⁸Te caldeohetic la ya'beyic sc'ahc'al te sna ajwalil soc te nahetic ta pueblo, soc la sjinticlanic te ts'ahquetic yu'un Jerusalén.

⁹Te Nabuzaradán, capitán yu'un te soldadohetic te ya scanantayic ajwalil, la yic'ticlan bahel ta chuquel ta Babilonia te mach'atic hilemic ta pueblo soc te mach'atic c'axemiquix bahel ta stojol, soc spisil te yantic te hilemique.

¹⁰Pero te Nabuzaradán, capitán yu'un te soldadohetic te ya scanantayic ajwalil, la yac' hiluc ta sq'uinal Judá te pobrehetic, te mayuc bin ay yu'unic; la yac'ticlambe hilel ts'usubiletic soc sq'uinalic.

¹¹Te Nabucodonosor ajwalil yu'un Babilonia spasojix mandar te Nabuzaradán, capitán yu'un te soldadohetic te ya scanantayic ajwalil, hich la yalbe sc'oblal te Jeremías:

¹²Ic'a ta atojol soc canantaya, ma me ayuc bin chopol xapasbe, pasa te bin ya sc'ambat, xchi.

¹³Ha yu'un te Nabuzaradán, capitán yu'un te soldadohetic te ya scanantayic ajwalil, soc te Nabusazbán jtsobaw yu'un te eunucohetic, te Nergal-Sarezer te tulan ya'tel, soc spisil te príncipaletic yu'un te ajwalil yu'un Babilonia,

¹⁴la sticonic ta iq'uel tal te Jeremías te ay ta yamaq'uil te cárcel. La ya'beyic ta sc'ab te Gedalías snich'an Ahicam, snich'an Safán, yu'un ya yic' bahel ta sna. Hich nahin te Jeremías ta yohlil te slumale.

¹⁵C'alal chucul to ta yamaq'uil cárcel a te Jeremías, tal sc'op Jehová ta stojol, hich la yal:

¹⁶Bahan halbeya te Ebed-melec te etíope-winic: Hich yaloj te Jehová te scuentahinej spisil, te Dios yu'un Israel: Ya jc'ohtes ta pasel te bin caloj ta stojol te pueblo ini te bin chopol, ma ha'uc te bin leque. Ya xc'oht ta pasel ini ta stojol asit.

¹⁷Pero ta hich ora ya me cac'at ta libre, xchi te Jehová, ma ba ya x'ochat ta sc'abic te mach'atic yac axi'e.

¹⁸Ya cac'at ta libre, ma ba ya xlajat ta espada, ha pojbil ta guerra ya xc'oht acuxlejal, como la smuc'ulinon awo'tan, xchi te Jehová.