Read Tzeltal Jeremías 42 Bible Online

Jeremías 42 - Tzeltal bible

Jeremías 42

¹Spisil te capitanetic yu'un soldadohetic soc te Johanán snich'an Carea, te Jezanías snich'an Osaías soc spisil te pueblo, muc' biq'uit, talic

²ta stojol te jalwanej Jeremías, hich la yalbeyic: A'iya awa'iy bin ya jc'ambatcotic; c'opombotic Jehová te Dios awu'un yu'un spisil te mach'atic hilemique. Ta nahil tsobolotcotic, ta ora ini mayucotic tsobol, hich te bin ut'il yac awile.

³C'ambeya te Jehová te Dios awu'un te yacuc yac' jna'cotic banti ya sc'an ya xbohotcotic soc bin ya sc'an ya jpascotic, xchihic.

⁴La sjac' te Jeremías: La jca'iybeyex ac'opic. Ya jc'opon te Jehová te Dios awu'unic hich te bin ut'il la awalique. Spisil te bin ya yal te Jehová ya ca'beyex ana'ic, mayuc bin ya jmuc ta co'tan, xchi.

⁵Hich la yalbeyic te Jeremías: Te Jehová ha'uc smelelil soc stojil testigo ta cohlilcotic teme ma ba ya jpascotic te bin ya sticonat ta yalel ta jtojolcotic te Jehová te Dios awu'une.

⁶Chican teme lec o teme ma lecuc, ya jch'uhumbecotic te Jehová te Dios cu'untic te ya jticonatcotic bahel ta stojole, scuenta yu'un hich lec ya xc'ohotic a, yu'un te ya jch'uhumbecotic sc'op te Jehová te Dios awu'une, xchihic.

⁷Ta lajuneb c'ahc'al ta patil tal te sc'op Jehová ta stojol te Jeremías.

⁸Hich la yic' tal te Johanán snich'an Carea soc spisil te capitanetic yu'un te soldadohetic te joquimbil yu'un, soc spisil te pueblo, muc' biq'uit,

⁹hich la yalbe ya'iyic: Hich yaloj te Jehová te Dios yu'un Israel, te la aticononic ta yalel ta stojol te bin yac ac'ambelique:

¹⁰Teme ya xhilex ta q'uinal ini, ya ca'beyex awich' awipic, ma ba ya jinex; ya jts'unex, ma ba ya jbulex loq'uel, yu'un ya jsut jc'op yu'un te bin chopol la jpasbeyexe.

¹¹Ma me xaxi'ic te ajwalil yu'un Babilonia, te yac axi'belic ta ora ini. Ma me xaxi'ic, xchi te Jehová, yu'un ya joquinejex yu'un ya jcoltayex soc ya jloq'uesex ta libre ta sc'ab.

¹²Ya jc'uxultayex, soc ha nix hich ya sc'uxultayex te ajwalil soc ya yac' te ya suhtex bahel ta alumalique.

¹³Yan teme hich yac awalic: Ma ba ya xhilotic ta q'uinal ini, teme xchihexe, te hich ma ba yac ach'uhumbeyic te sc'op Jehová te Dios awu'unic,

¹⁴teme hich yac awalic: Ma'uc, ya xbohotcotic ta sq'uinal Egipto ta banti ma ba ya quilcotic guerra, ma ba ya ca'iycotic sc'op corneta, soc ma ba ya ca'iycotic wi'nal, tey ya xnahinotcotic a, teme xchihexe,

¹⁵ha yu'un a'iya me awa'iyic te sc'op Jehová, ha'ex te hilemex ta Judá, como hich yaloj te Jehová te scuentahinej spisil, te Dios yu'un Israel: Teme hich awo'tanic te ya xbahex ta Egipto yu'un ya xnahinex tey a,

¹⁶te espada te yac axi'ic ya me stahex c'ohel tey a ta sq'uinal Egipto, soc te wi'nal te yac axi'ic ya me st'unex bahel tey a, tey ya xchamex a.

¹⁷Spisil te mach'atic hich yo'tanic te ya xbahtic ta nahinel ta Egipto ya me xlajic ta espada, ta wi'nal soc ta jmilawal-chamel. Mayuc mach'a cuxul ya xhil o te ya x'ahn loq'uel ta stojol te bin chopol ya cac' tal ta stojolic, xchi.

¹⁸Hich yaloj te Jehová te scuentahinej spisil, te Dios yu'un Israel: Hich te bin ut'il mal cohel te quilimba soc sc'ahc'al co'tan ta stojol te mach'atic nahinemic ta Jerusalén, hich ya xmal cohel ta atojolic te c'alal ya xbahex ta Egipto. Ha te bin wocol soc te bin xiweltic sba ya xc'ohex, te bin ac'bil ta lajel soc te bin p'ajbil; mayuc bin ora ya suhtex tal ta lugar ini, xchi.

¹⁹Te Jehová la yalbeyex, ha'ex te hilemex yu'un Judá: Ma me xbahex ta Egipto, xchi. Na'ahic me te la jca'beyex ana'ique.

²⁰¿Bin yu'un la alo'loy abahic? Ha'ex nix la aticononic ta stojol Jehová te Dios awu'unic, te hich la awalic: C'opombotic Jehová te Dios cu'untic, soc a'botcotic jna'cotic spisil te bin ya yal te Jehová te Dios cu'untic, hich me ya jpascotic, xchihex.

²¹La jcalbeyexix awa'iyic, pero ma ba ach'uhunejic te bin la yal te Jehová te Dios awu'unic, o spisil te bintic la sticonon ta yalel ta atojolique.

²²Ha yu'un na'ahic me ta lec te ya me xlajex ta espada, ta wi'nal soc ta jmilawal-chamel tey ta banti yac ac'anic ya xbahex ta nahinel, xchi te Jeremías.