Read Tzeltal Jeremías 44 Bible Online

Jeremías 44 - Tzeltal bible

Jeremías 44

¹Ha sc'op Jehová te tal ta stojol Jeremías te la yalbe sc'oblal spisil te judiohetic te nahinemic ta sq'uinal Egipto, ta Migdol, ta Tafnes soc Menfis, soc ta sq'uinal Patros, hich la yal:

²Hich yaloj te Jehová te scuentahinej spisil, te Dios yu'un Israel: Awilojic spisil te bintic chopol la jquich' tal ta stojol Jerusalén soc spisil te pueblohetic yu'un Judá. Yo'tic jihnemiquix, mayuc mach'a nahinemic tey a

³ta scaj te bintic chopol la spasic, te la yac' ilinucon yu'un, ha te la ya'beyic smahtanin pom soc la sch'uhuntayic yantic diosetic te ma ba sna'beyejic sba, ni ha'uquex ni ha'uc te ame'atatique.

⁴Bayel buelta la jticonlan ta atojolic spisil te jalwanejetic, te a'batetic cu'un, te hich la yalic: ¡Ma me xapasic te bin ilobtic sba ini te p'ajbil cu'un! xchihon.

⁵Pero ma la ya'iyic soc ma ba la yich'ic ta cuenta; ma ba la suhtes yo'tanic yu'un schopolilic, yu'un ya scom sbahic ta ya'beyel pom te yantic diosetique.

⁶Ha yu'un mal cohel ta stojolic te quilimba soc te sc'ahc'al co'tan, soc tihl ta stojol te pueblohetic yu'un Judá soc ta callehetic ta Jerusalén. Hich jihnic soc jochol hilic c'alal ora ini.

⁷Ha yu'un, hich yaloj te Jehová te scuentahinej spisil, te Dios yu'un Israel: ¿Bin yu'un te ha'ex nix yac awac' taluc ta atojolic te bin chopol te c'ax muc', ha te ya xlajic winiquetic, antsetic, ach'ix-queremetic soc tut alaletic ta Judá, te mayuc mach'a ya xhil awu'unique?

⁸¿Bin yu'un yac awac' ilinucon yu'un te ya'tel ac'abic, ha te yac awa'beyic pom te yantic diosetic ta sq'uinal Egipto ta banti talemex ta nahinel, te yac alehic ajihnelic, te ya xc'atp'ujex ta bin chopol sc'oblal soc ta bin p'ajbil ta stojol spisil te nacionetic ta bahlumilal?

⁹¿Ch'ay balix ta awo'tanic te bintic chopol la spasic te ame'atatic, te bintic chopol la spasic te ajwaliletic yu'un Judá soc te yihnamic, soc te bintic chopol la apasic te ha'ex soc awihnamic ta sq'uinal Judá soc ta callehetic yu'un Jerusalén?

¹⁰C'alal ora yo'tic ma ba pehc'ajem yo'tanic soc ma ba xi'ojic; ma ba st'unojic te Ley cu'un o te mandariletic te la jca'beyex ta atojolic soc ta stojol te ame'atatique.

¹¹Ha yu'un hich yaloj te Jehová te scuentahinej spisil, te Dios yu'un Israel: Ilawil, jnopoj te ya cac' tal bin chopol ta atojolic yan buelta, ya jin spisil Judá.

¹²Ya jtsac te mach'atic hilemic yu'un Judá te mero hich ya sc'an yo'tanic te ya xnahinic ta sq'uinal Egipto, ya me xlajic tey a. Ya me xlajic ta espada soc ta wi'nal. Muc' biq'uit ya xlajic ta espada soc ta wi'nal, soc ya xc'atp'ujic ta bin chopol sc'oblal, ta bin xiweltic sba, ta bin bohloben sc'oblal soc ta bin p'ajbil.

¹³Te mach'atic nahinemic ta sq'uinal Egipto ya ca'be castigo ta espada, ta wi'nal soc ta jmilawal-chamel, hich te bin ut'il la jca'be castigo te Jerusalén.

¹⁴Te mach'atic hilemic ta Judá te ochic bahel ta nahinel ta sq'uinal Egipto mayuc mach'a ya xloc' ta ahnel o te cuxul ya xhil te ya suht tal ta sq'uinal Judá, te banti yo'tanuc ya xnahinic; ma ba ya suhtic bahel; ha nax cha'oxtuhl te ya x'ahnic loq'uel, xchi.

¹⁵Ha yu'un spisil te mach'atic sna'ojic te ya'beyejic pom te yantic diosetic te antsetic yu'unic, soc spisil te antsetic te tey ayic a, c'ax tsobolic, soc spisil te ants-winiquetic te nahinemic ta Patros ta sq'uinal Egipto, hich la sjac'beyic sc'op te Jeremías:

¹⁶Ma ba ya quich'cotic ta cuenta te c'op la awalbotic ta scuenta Jehová.

¹⁷Ha ya jpascotic spisil te bintic calojcotic: ha te ya ca'becotic pom soc malbil mahtaniletic te ajwalil-ants yu'un ch'ulchan, hich te bin ut'il la jpascotic soc te la spasic te jme'jtatcotic, te ajwaliletic soc te príncipaletic cu'untcotic ta pueblohetic yu'un Judá soc ta callehetic ta Jerusalén. Ta hich ora ay bayel we'elil cu'untcotic, tse'el co'tantcotic soc mayuc bin chopol la jquilcotic.

¹⁸Pero te c'alal la jquihquitaycotic ta ya'beyel pom soc ta ya'beyel malbil mahtaniletic te ajwalil-ants yu'un ch'ulchan, mayuc bin ay cu'uncotic soc ya xlajotcotic ta espada soc ta wi'nal, xchihic.

¹⁹Soc hich la yalic te antsetic: Te c'alal la jca'becotic pom soc malbil mahtaniletic te ajwalil-ants yu'un te ch'ulchan, ¿ma bal sna'ojic te jmamalalcotic te la jpasbecotic pimil pan te pajal yilel soc sloc'omba soc te la jca'becotic malbil mahtaniletic? xchihic.

²⁰Hich te Jeremías la sc'opon spisil te winiquetic soc antsetic te hich jac'bot yu'unic, hich la yalbe:

²¹¿Ma bal sna'ojuc Jehová, ma bal yacuc xtal ta yo'tan te pom la achiq'uic ta pueblohetic yu'un Judá soc ta callehetic yu'un Jerusalén, ha'ex soc ame'atatic, te ajwaliletic soc te príncipaletic awu'unic, soc te ants-winiquetic ta q'uinal?

²²Te Jehová ma ba cuhchix yu'un te schopolil awa'telic soc te bintic ilobtic sba te la apasique; ha yu'un te jihnemix te aq'uinalic, te sutp'ij ta bin xiweltic sba soc ta bin chopol c'oblalil, te mayuquix mach'a nahinemic tey a, hich te bin ut'il ay c'alal ora ini.

²³Ta scaj te la achiq'uic pom soc la ata amulic ta stojol Jehová soc ma ba la ach'uhumbeyic sc'op te Jehová soc ma ba la at'unic te Ley o te mandariletic o te testigo-c'op yu'une, ha scuentahil te tal ta atojolic te bintic chopol ini, hich te bin ut'il ay c'alal ora ini, xchi.

²⁴Te Jeremías hich la yalbe xan spisil te pueblo soc te antsetic: A'iya awa'iyic te sc'op Jehová, apisilic yu'un Judá te ayex ta sq'uinal Egipto:

²⁵Hich yaloj te Jehová te scuentahinej spisil, te Dios yu'un Israel: Te ha'ex soc te antsetic awu'unic la awalic ta awehic soc la apasic ta ac'abic, te hich la awalic: Ya me jc'ohtescotic ta pasel te bintic calojcotic ta jamal, ha te ya jchic'becotic pom te ajwalil-ants yu'un ch'ulchan soc ya ca'betic malbil mahtaniletic, xchihex. Ha yu'un pasa te bin la awalic ta jamal, pasahic te bin awalojique.

²⁶Pero a'iybeya awa'iyic sc'op te Jehová, apisilic yu'un Judá te nahinemex ta sq'uinal Egipto, te hich ya yal: Caloj ta jamal ta scuenta te jbihil te muc' sc'oblal, xchi te Jehová, te ma ba ya yich'ix halel te jbihil li' ta sq'uinal Egipto yu'un jtuhluc winic yu'un Judá, te hich ya yal: ¡Cuxul Jehová, te Ajwalil! te xchihe,

²⁷como yacon ta yilel ta stojolic te ya ca'be te bin chopol, ma ha'uc te bin leque. Spisil te winiquetic yu'un Judá te ayic ta sq'uinal Egipto ya me xlajic ta espada soc ta wi'nal, ha to c'alal ya xlaj spisilic.

²⁸Ahtaybil xanix te mach'atic ya xcolic ta espada, te ya xloq'uic bahel ta Egipto soc ya suhtic bahel ta Judá. Hich me ya sna'ic spisil te mach'atic hilemic yu'un Judá te talic ta nahinel ta Egipto mach'a sc'op ya xc'oht ta pasel, teme ha te cu'une o ha te yu'unique.

²⁹Ha me seña ya xc'oht awu'unic, xchi te Jehová, te ya ca'beyex castigo ta lugar ini, scuenta yu'un ya me ana'ic te ya me xc'oht ta pasel te bin caloj te chopol ya xc'oht ta atojolic.

³⁰Hich yaloj te Jehová: Ya cac' te faraón Hofra ajwalil yu'un Egipto ta sc'ab te mach'atic ya slehbe scuxlejal, hich te bin ut'il la jcac' te Sedequías ajwalil yu'un Judá ta sc'ab te Nabucodonosor ajwalil yu'un Babilonia, ha te scontra te lehbot scuxlejal yu'une, xchi.