Read Tzeltal Jeremías 47 Bible Online

Jeremías 47 - Tzeltal bible

Jeremías 47

¹Ha sc'op Jehová te tal ta stojol te jalwanej Jeremías te la yalbe sc'oblal te filisteohetic, te c'alal ma to ba stsaloj a te Gaza te faraón:

²Hich yaloj te Jehová: Ilawil, yac ta nojel ha' ta stojol norte, ya sutp'ij ta tulan snojel ha'; ya me smuc te q'uinal soc spisil bintic ay tey a, te pueblohetic soc te mach'atic nahinemic tey a. Ya x'awonic te ants-winiquetic, spisil te mach'atic nahinemic ta q'uinal ya me x'oq'uic,

³yu'un te xnilet yoc te cawuhetic yu'un te stulanil sc'op te carretahetic, te xju'et te yoque. Te tatiletic ma ba ya scoltayic te yal-snich'nabic ta scaj te laj yip sc'abic.

⁴Como c'ohtix sc'ahc'alel te ya xlajinot te filisteohetic, te ya xjihnot spisil mach'atic hilemic ta scoltayel te Tiro soc Sidón. Como te Jehová ya me slajinlan te filisteohetic, te mach'atic hilemic ta ti'mar yu'un Caftor.

⁵La sloq'ues stsotsel sjolic te mach'atic yu'un Gaza, te mach'atic yu'un Ascalón uma' hilic. Ha'ex te hilemex ta spamlej ¿jayeb xan ora yac aboj abaq'uetalic?

⁶Ha'at espadahat yu'un Jehová, ¿bin ora yac acux awo'tan? ¡Cha'ochan ta ana, quechajan soc ch'aban!

⁷Pero ¿bin ut'il c'an cuxuc yo'tan, teme pasot ta mandar yu'un Jehová, teme ticombil yu'un ta scontrahinel te Ascalón soc te ti'ti'mar?