Read Tzeltal Jeremías 49 Bible Online

Jeremías 49 - Tzeltal bible

Jeremías 49

¹Hich ay sc'oblal te amonetique. Hich yaloj te Jehová: ¿Ma bal ayuc snich'nab te Israel? ¿Ma bal ayuc mach'atic ya x'ich'bot hilel yu'un te bintic ay yu'une? ¿Bin yu'un te Milcom la yich' hilel te Gad, soc te nahinemic ta pueblohetic yu'un te ants-winiquetic yu'une?

²Ha yu'un ya sta yorahil, xchi te Jehová, te ya cac' chicnajuc sc'op guerra ta Rabá soc te amonetique. Ya xc'atp'uj ta busul jimbil, soc te pueblohetic ya x'a'botic sc'ahc'al; hich te Israel ya me scha'ic'ticlan te mach'atic ic'otic yu'unique.

³¡Oc'an, Hesbón, como jihnemix te Hai! ¡awonanic, yantsil-nich'nab Rabá, lapahic ch'ixal-pac', oq'uetaya abahic, ahnimajanic ta jehch ta jehch ta yutil te ts'ahc, como te Milcom ic'ot bahel ta chuquel soc te sacerdotehetic soc príncipaletic yu'unique.

⁴¿Bin yu'un yac atoy aba yu'un te spamlejetic awu'un, te spamlejetic te bayel ya yac' sit, ha'at, antsat te ma junuc awo'tan, te ha smuc'ulinej awo'tan te ac'ulejal, te hich yac awal: ¿Mach'a c'an tal scontrahinon? te xchihate?

⁵Ilawil, ya quic' tal xiwel ta atojol te ya xtal ta stojol spisil mach'atic ayic ta ajoyobal, xchi te Jehová te scuentahinej spisil. Jujutuhl toj ya yich'ic tenel bahel, mayuc mach'a ya stsob talel te mach'atic loq'uic ta ahnel.

⁶Pero ta patil ya cac' te ya scha'suhtic xan talel te amonetic, xchi te Jehová.

⁷Hich ay sc'oblal te Edom. Hich yaloj te Jehová te scuentahinej spisil: ¿Ma bal ayuquix p'ijil-o'tanil ta Temán? ¿Laj balix te j'ac'-o'tanil yu'un te mach'atic p'ijique? ¿Jihn balix te sp'ijilique?

⁸¡Suhtanic bahel, loc'anic ta ahnimal, nac'a abahic ta c'ubul ch'enetic, ha'ex te nahinemex ta Dedán! como ya cac' tal jinel ta stojol Esaú ta yorahil te ya ca'be castigo.

⁹Teme tal ta atojolic te mach'atic jtul-ts'usubiltic, ¿ma bal yacuc xhil yu'unic cha'ox chejuc? Teme tal j'eleq'uetic ta ahc'abal, ¿ma bal lajuc yich' bahel ban c'alal la sc'anic?

¹⁰Pero ho'on jc'axel ya jpojbe spisil bintic ay yu'un Esaú, ya jam ta banti snac'oj sba, ma xhu' ya snac' sba. Ya me yich' lajimbeyel te snich'nab, yermanotac soc te spat-xuhc, ya xch'ay bahel te Esaú.

¹¹Ihquitaya te me'ba'etic awu'un, ho'on ya jcanantay; soc te me'ba' antsetic awu'un ha ya smuc'ulinon yo'tanic, xchi.

¹²Hich yaloj te Jehová: Te mach'atic ma ba a'botic yuch' te copa yu'un castigo, ya me yuch'ic. ¿Yu'un bal libre ya xhilat yu'un spisil? ¡Ma ba ya xhilat ta libre, ya me awuch'!

¹³Como caloj ta jamal ta jtojol, xchi te Jehová, te ha xiweltic sba, pehc'ambil sc'oblal, jimbil soc bohlobtesbil sc'oblal ya xc'oht te Bosra, spisil te pueblohetic yu'un jc'axel jimbil ya xc'ohtic sbahtel q'uinal, xchi.

¹⁴La jca'iy te hich la yal te Jehová: Ticombil jal c'op ta stojol te nacionetic, te hich ya yal: ¡Tsoba abahic tal ta scontrahinel te Edom, chahpana abahic yu'un guerra! xchi.

¹⁵Tut ya cac'at ta yohlil te nacionetic, p'ajbil ya xc'ohat ta yohlil te ants-winiquetique.

¹⁶Ha la slo'loyat te atoybahil soc te stoybahil te awo'tane. Ha'at te nahinemat ta c'ubul tontiquil, te ha awu'un te stoyolil te witsiltic, aunque toyol yac apas apechech hich te bin ut'il muc'ul jxic, tey ya jcohtesat a, xchi te Jehová.

¹⁷Te Edom, ya sutp'ij ta bin xiweltic sba. Spisil mach'a ya xc'ax tey a xcham yo'tan yu'un, soc ya me slaban yu'un spisil te swocole.

¹⁸Hich te bin ut'il jihn te Sodoma, Gomorra soc te pueblohetic ta sjoyobal, xchi te Jehová, ha nix hich mayuc mach'a ya xnahin tey a, ni jtuhluc ya xnahin tey a.

¹⁹Hich te bin ut'il ya xloc' tal choj ta pimil q'uinal yu'un Jordán soc ya xbaht ta yaxal c'unil ha'maletic, ora nax ya cac' ahnuc loq'uel tey a te Edom, soc ya cac' tey a te mach'a tsahbil cu'un, como ¿mach'a pajalon soc? ¿Mach'a ya xhu' ya stsalon? ¿Mach'a jcanan-tuminchij te ya xhu' ya scontrahinon?

²⁰Ha yu'un a'iya awa'iyic te bin schapoj Jehová ta stojol Edom, te bin snopoj te ya spasbe te mach'atic nahinemic ta Temán. Ya me stasic bahelte mero tut tuminchijetic yu'un te jtsob tuminchijetic, pajal ya slajinic soc te yaxal aquiltic yu'unique.

²¹Ya me xnihc te q'uinal yu'un te sc'op te jinel yu'unic, soc te aw yu'unic ya xchicnaj c'alal ta Mar Rojo.

²²Ya me xwihl bahel hich te bin ut'il jxic, ya sjam te xic' ta stojol Bosra. Ta hich ora, te yo'tan te mach'atic ay yipic yu'un Edom hich ya xc'oht te bin ut'il te yo'tan ants te ya x'alaj, xchi.

²³Hich ay sc'oblal te Damasco: Te Hamat soc Arfad ma sna'ic bin ya spasic, como la ya'iyic te bintic ma lecuc te ya xc'oht ta pasel; ya xnihc yo'tanic yu'un xiwel, hich te bin ut'il mar te ma xhu' ta lahmajtesel.

²⁴Laj yip te Damasco, ya xbaht ta ahnel, tsacot yu'un xiwel soc wocol, tsacot yu'un sc'uxul, hich te bin ut'il ants ya x'alaj.

²⁵¡Ilawil bin ut'il ihquitayot te pueblo te halbot yutsil sc'oblal, te pueblo te ya smulan co'tan!

²⁶Ha yu'un te queremetic yu'un ya xyahlic ta callehetic, soc spisil te soldadohetic yu'un ya me xlajic ta hich ora, xchi te Jehová te scuentahinej spisil.

²⁷Ya ca'be sc'ahc'al te ts'ahquetic yu'un Damasco, ya slajin te muc'ul nahetic yu'un Ben-adad, xchi.

²⁸Sc'oblal Cedar soc te ban c'alal scuentahinej Hazor, te tsalot yu'un Nabucodonosor ajwalil yu'un Babilonia. Hich yaloj te Jehová: Hahchanic, a'beyahic guerra te Cedar, soc lajinahic te mach'atic ayic ta stojol banti ya xloc' tal c'ahc'al.

²⁹Ya me yich'beyic te snahilpaq'uic soc te tuminchijetic yu'unic, te smuhquil snahilpaq'uic, spisil te sbiluquic, soc te camellohetic yu'unic ya me yiq'uic, soc hich me ya yalbeyic ta aw: ¡Ay xiwel ta bayuc! xchihic.

³⁰¡Loc'anic ta ahnimal ta namal, nahinanic ta c'ubul ch'enetic, ha'ex te nahinemex ta Hazor! xchi te Jehová; como te Nabucodonosor ajwalil yu'un Babilonia schapojix c'op ta atojolic.

³¹Hahchanic, a'beyahic guerra te nación te lamal q'uinal ya ya'iy, te jun yo'tan ya x'ayin, xchi te Jehová, te mayuc ochibaletic o sc'atal-te'eletic yu'un, te stuquel nahinem!

³²Ya xpojbot te camellohetic yu'un soc te bayel schansbahlamic. Ya jpucticlan bahel ta ic' te mach'atic ya squits'be stsotsel sjol ta xuhc schiquin; ta jujujehch ya ca'be tal jinel ta stojolic, xchi te Jehová.

³³Yawil ha'mal ts'i'etic ya xc'oht te Hazor, jochol ya xhil sbahtel q'uinal. Mayuquix mach'a ya xnahin tey a, ni jtuhluc ya xnahin tey a, xchi.

³⁴Ha te sc'op Jehová te tal ta stojol te jalwanej Jeremías te la yalbe sc'oblal Elam, c'alal ochel to ta ajwalil yu'un Judá a te Sedequías, te hich la yal:

³⁵Hich yaloj Jehová te scuentahinej spisil: Ilawil, ya jwac'be te st'ihmalte' Elam, te banti stahoj te yipe.

³⁶Ya cac' tal ta stojol Elam te schanxuhcul iq'uetic te ya xtal ta schanxuhcul te ch'ulchane; ya pucticlan bahel ta schanxuhcul te iq'uetique. Mayuc nación te banti ma ba ya xbaht ta ahnel te mach'atic yu'un Elam.

³⁷Ya cac' xiwuc te Elam ta stojol te scontratac, ta stojol te mach'atic ya xlehbot scuxlejal yu'unic. Ya jticon tal ta stojol te bin chopol, te sc'ahc'al quilimba, xchi te Jehová, soc ya jticon bahel espada ta stojolic ha to c'alal ya xlajinotic yu'un.

³⁸Ya cac' muc'ul huctajibal cu'un ta Elam, soc ya jlajimbe te ajwalil soc te príncipaletic yu'une, xchi te Jehová.

³⁹Pero ta patil bahel ya cac' te ya suhtic tal te jchuqueletic yu'un Elam, xchi te Jehová.