Read Tzeltal Jeremías 51 Bible Online

Jeremías 51 - Tzeltal bible

Jeremías 51

¹Hich yaloj te Jehová: Ya jach jlajinwanej ic' ta stojol Babilonia soc ta stojol te mach'atic ya scontrahinonic.

²Ya jticon bahel te mach'atic ya yic'ayic te Babilonia soc te ya sjochobtesbeyic te sq'uinale; como ta jujujehch ya xtal scontrahinic ta yorahil te jinel yu'une.

³Ac'a schahpan st'ihmalte' te j'ac'-t'ihmalte', ac'a slap te smahquil yu'un guerra. Ma me sna'beyic yo'bolil sbahic te queremetic yu'un Babilonia; jc'axel ac'a slajinic te soldadohetic yu'une.

⁴Ya xlajic ta sq'uinal te caldeohetic, ehchentesbil ya xhilic ta callehetic.

⁵Como te Israel soc te Judá ma ba ihquitaybilic yu'un te Dios yu'unic, te Jehová te scuentahinej spisil, aunque noj ta mulil te sq'uinalic ta scontrahinel te Ch'ul Dios yu'un Israel.

⁶¡Ahnanic loq'uel ta Babilonia! ¡Coltaya abahic, scuenta yu'un ma ba ya xch'ayex bahel ta scaj te smule! Como ha yorahil te Jehová ya ya'be spacol, ya ya'be stoj te bin ya sc'an te ya'tele.

⁷Te Babilonia ha copa pasbil ta oro c'ohem ta sc'ab Jehová te la syacubtes a spisil te ants-winiquetic ta q'uinal. Te nacionetic la yuch'beyic te vino yu'un, hich sohc sjolic a.

⁸¡Ora nax yahl te Babilonia soc wuybil c'oht! ¡Oq'uetaya! Ich'ahic tal bálsamo-te' yu'un te sc'uxule, ya wan xlecub yu'un, xchi te Jehová.

⁹C'an jpoxtaytic te Babilonia, pero ma ba lecub. Ihquitaya hilel, conic ta jlumaltic ta jujutuhl, como c'ohem c'alal ta ch'ulchan te castigo yu'une, mohem bahel c'alal ta tocal.

¹⁰Te Jehová la yac' ta ilel te toj ayotic; la'ic, ac'a caltic ta Sión te bin spasoj te Jehová te Dios cu'untique.

¹¹¡Huxbeyahic sni'il te ya'tejibalul t'ihmalte'! ¡Ich'ahic te mahquilaletic yu'un guerra! Te Jehová la stijbeyix yo'tanic te ajwaliletic yu'un Media, como snopoj te ya sjin te Babilonia. Ha'ix te spacol yu'un Jehová ha te spacol yu'un te templo yu'une.

¹²¡Toya mohel bandera ta sba te ts'ahquetic yu'un Babilonia, a'beyahic yip te soldadohetic te ya xcanantaywanic, ac'ahic j'il-q'uinal soldadohetic, chahpanahic jnac'tambahinwanejetic! Como te Jehová snopojix soc ya sc'ohtes ta pasel te bin yaloj ta scontrahinel te mach'atic nahenimic ta Babilonia.

¹³Ha'at te nahinemat ta banti bayel ha'etic, te ay bayel ac'ulejal, c'ohtix te alajibal, set'bilix te hilo yu'un acuxlejal.

¹⁴Te Jehová te scuentahinej spisil hich yaloj ta jamal ta stuquel: Ya jnojesbat ta acontratac hich te bin ut'il c'ulubetic, ya me x'awonic yu'un tsalaw ta atojol, xchi.

¹⁵Ha la spas te lumq'uinal ta scuenta yu'el, la ya'be yip te bahlumilal ta scuenta sp'ijil yo'tan, soc la slim bahel te ch'ulchan ta scuenta te snopojibal yu'une.

¹⁶Ta scuenta te sc'op tulan ya xc'opoj ha'etic ta ch'ulchan yu'un, ha ya yac' mohuc bahel tocal c'alal ta sti'il bahlumilal. Ya yac' tihluc tsantsehwaletic ta yohlil te ha'al soc ya sloq'ues tal ic' ta banti q'uejbil yu'une.

¹⁷Ha sonso spisil ants-winiquetic, ma sna'ic q'uinal. Spisil te mach'atic ya spasic loc'ombahetic ya xq'uexawic yu'un, como lotil te loc'ombahetic, mayuc scuxlejal.

¹⁸Ma ba ya xtuhunic, ha te a'telil te ya xlabanot; ta yorahil castigo ya xlajic.

¹⁹Ma hichuc ay te Mach'a yu'un Jacob, como ha Jpaswanej yu'un spisil te bintic ay, soc te Israel ha te jchahp te ha yu'un c'oht, ha Jehová te scuentahinej spisil te sbihile.

²⁰Te Jehová ya yal: Ha'ex martillohex cu'un, soc ca'tejibex yu'un guerra. Ha'at ta acuenta ya jwuyticlan nacionetic, soc ha'at ta acuenta ya jinticlan ban c'alal scuentahinejic.

²¹Ha'at ta acuenta ya jlajinlan cawuhetic soc te jmoheletic yu'unique, ha'at ta acuenta ya jlajinlan carretahetic soc te mach'atic ya xmohic a.

²²Ha'at ta acuenta ya jlajinlan winiquetic soc antsetic, ha'at ta acuenta ya jlajinlan mamaletic soc alaletic, ha'at ta acuenta ya jlajinlan queremetic soc ach'ixetic.

²³Ha'at ta acuenta ya jlajinlan jcanan-tuminchijetic soc te jtsohb tuminchijetic yu'unic, ha'at ta acuenta ya jlajinlan j'a'teletic ta q'uinal soc te j'a'tel-wacaxetic yu'unic, soc ha'at ta acuenta ya jlajinlan jtsobawetic soc príncipaletic.

²⁴Yac awil ta asitic te ya ca'be stoj te Babilonia soc spisil mach'atic nahinemic ta Caldea spisil bintic chopol la spasic ta Sión, xchi te Jehová.

²⁵Jcontrahinejat, ha'at jinaw witsat, xchi te Jehová, ha'at te la ajin spisil te q'uinale. Ya jach jc'ab ta scontrahinelat, ya jtselat cohel ta tontiquil, soc ya jc'atp'unat ta c'ahq'uem wits.

²⁶Mayuc mach'a ya yich'bat jp'ijuc ton scuenta xuhc na, ni p'ijuc ton scuenta yich'o-ip, como stalel jochol ya xhilat, xchi te Jehová.

²⁷¡Toya mohel bandera ta q'uinal, oq'uesinahic corneta ta yohlil te nacionetique! ¡Chahpanahic pueblohetic yu'un ya'beyel guerra, tsobahic tal nacionetic ta scontrahinel, ha te Ararat, Mini soc Askenaz! ¡Lehahic jtuhl capitán te ya scontrahin, ac'a mohuc tal cawuhetic hich te bin ut'il c'ahc'al c'ulubetic!

²⁸¡Chahpanahic nacionetic ta scontrahinel, ha te ajwaliletic yu'un Media, te capitanetic soc príncipaletic yu'un, soc spisil te q'uinal scuentahinej! xchi.

²⁹Te lumq'uinal ya xnihc soc ya syuc' sba, como ya me xc'oht ta pasel te bin schapoj te Jehová ta scontrahinel te Babilonia, ha te ya sjochobtesbe sq'uinal te Babilonia, mayuc mach'a ya xnahin tey a.

³⁰Te soldadohetic yu'un Babilonia quechajiquix ta yaq'uel guerra, hiliquix ta yutil te ahnibal ts'ahc yu'unique; lajix te yipic, hich c'ohtic te bin ut'il antsetic; a'bot sc'ahc'al te nahetic yu'unic, waq'uemic te sc'atal-te'eletic yu'unique.

³¹Te mach'a ya x'ahnimaj ora ya xbaht sta yan te ya x'ahnimaj, jtuhl jal c'op ya x'ahnimaj bahel ta stahel yan jal c'op, ta yalbeyel te ajwalil yu'un Babilonia te ochintaybilix ta jujujehch te muc'ul pueblo yu'une.

³²La yich'ic ich'el te tec'o-ha'etic, a'bot sc'ahc'al te toyol ilo-q'uinaletic[14] soc ay bayel xiwel yu'un te winiquetic yu'un guerra.

³³Como hich yaloj te Jehová te scuentahinej spisil, te Dios yu'un Israel: Te yantsil-nich'an Babilonia hich c'ohem te bin ut'il swuyojibal trigo ta yorahil wuyel ta teq'uel; nopol ya sta yorahil stsobel te site, xchi.

³⁴Te Nabucodonosor ajwalil yu'un Babilonia la slajinon, la sesenon. Jochol la yihquitayon hilel hich te bin ut'il vaso; la sbic'on hich te bin ut'il dragón, la snojes sch'uht ta bintic mulantic sba cu'un, la xetayon.

³⁵Ac'a c'ohtuc ta stojol Babilonia te uts'inel te la ya'bon te jbaq'uetal, xchi te mach'a nahinem ta Sión. Ac'a c'ohtuc spacol yu'un te jch'ich'el ta stojol te mach'atic nahinemic ta Caldea, xchi te Jerusalén.

³⁶Ha yu'un ya yal te Jehová: Ya jchahpanat, ya jpacbat ac'abal. Ya jtaquijtesbe te mar yu'une soc ya cac' te mayuc ya'lel te sloq'uib-ha'etic yu'une.

³⁷Busul jimbil na ya xc'oht te Babilonia, ha yawil ha'mal ts'i'etic, ha te bin xiweltic sba soc te labambil, mayuc mach'a ya xnahin tey a.

³⁸Ta spisilic junax ya x'awonic hich te bin ut'il chojetic, xhilajanic hich te bin ut'il tut chojetic.

³⁹C'alal ya x'och sq'uixinal ya jchahpambe bayel we'elil soc ya cac' te ya xyacubic, yu'un ya stse'ejinic soc ya x'och swayelic sbahtel q'uinal te ma xwihc' sitic yu'un, xchi te Jehová.

⁴⁰Ya quic' bahel ta smilojibal hich te bin ut'il alal tuminchijetic, hich te bin ut'il tat tuminchijetic soc tat tentsunetic, xchi.

⁴¹¡Bin ut'il tsalbilix te Babilonia! ¡Bin ut'il ochintaybilix te bin halbil lec sc'oblal ta spahmal bahlumilal! ¡Ilawil, xiweltic sba c'oht te Babilonia ta yohlil te nacionetique!

⁴²Mucot yu'un mar te Babilonia, mucot yu'un te yip stselajan.

⁴³Jochol hilic te pueblohetic yu'un, te q'uinal taquin soc jochol hil, ha q'uinal te mayuc mach'a ya xnahin tey a, mayuc mach'a ya xc'ax tey a.

⁴⁴Hich ya yal te Jehová: Ya me ca'be castigo te Bel ta Babilonia, ya ca'be xehtay loq'uel te bin sbic'oje. Te nacionetic ma ba ya xtaliquix ta stojol; ya xjihn cohel te sts'ahcul te Babilonia.

⁴⁵¡Loc'anic bahel tey a, pueblo cu'un, coltaya acuxlejalic yu'un te sc'ahc'al yilimba te Jehová!

⁴⁶Ma me xlaj yip awo'tanic, ma me xiwex yu'un te bin yac awa'iyic ta q'uinal. Ay bin yac awa'iyic ta yan ha'bil, yan bin yac awa'iyic ta yan ha'bil. Yac awa'iyic te ya xtal uts'inel ta q'uinal, soc te ajwalil ya scontrahin yan ajwalil.

⁴⁷Ha yu'un, ilawil, ya xtal sc'ahc'alel te ya ca'be castigo te loc'ombahetic yu'un Babilonia. Spisil te sq'uinal ya xq'uexaw, soc spisil te mach'atic yu'un te ya xlajic tey ya xhilic ta yohlil a.

⁴⁸Te ch'ulchan soc te bahlumilal soc spisil te bintic ay tey a ya me x'awonic soc yutsil yo'tanic yu'un te Babilonia, como ya xtal ta norte jinawetic te ya scontrahinic, xchi te Jehová.

⁴⁹Te Babilonia ya me xjihn ta scaj te mach'atic yu'un Israel te lajic, hich te bin ut'il ta scaj Babilonia te bayel lajic ta spisil te q'uinale.

⁵⁰¡Ha'ex te colex loq'uel ta espada, bahanic, ma xatehc'an abahic! ¡Na'ahic me te Jehová ta banti namal ayex, soc na'ahic me te Jerusalén!

⁵¹Ayotic ta q'uexlal, yu'un la ca'iytic te labanele; macal ta q'uexlal te jsit quelawtic, como ochemic jyanlumetic ta ch'ul awilal yu'un te sna Jehová.

⁵²Ha yu'un hich ya yal te Jehová: Ya me xtal sc'ahc'alel te ya jinticlan te loc'ombahetic yu'un, soc ta spahmal sq'uinal ya me x'ahcanajic te mach'atic ehchenajemique.

⁵³Aunque ya xmo bahel c'alal ta ch'ulchan te Babilonia soc te ya ya'be xan yip te ahnibal yu'un te ay ta toyol, ya jticon bahel jlajinwanejetic ta stojol, xchi te Jehová.

⁵⁴¡A'iya awa'iyic yaw te Babilonia soc te muc'ul jinel yu'un te sq'uinal te caldehotique!

⁵⁵Como te Jehová ya me sjin te Babilonia soc ya me sch'aybe te bayel xjuyetic ta c'op yu'une. Ya x'awonic te tulan stselejan mar yu'unic, hich sc'opic te bin ut'il sjuyet bayel ha'etic.

⁵⁶Como ya xtal jinaw ta stojol Babilonia, ya yich'ic tsaquel te soldadohetic yu'un, soc ya yich' wac'ticlanel te t'ihmalte'etic yu'une. Como te Jehová, te Dios te ya ya'be stoj jujutuhl, ya me ya'be stoj.

⁵⁷Ya jyacubtesbe te príncipaletic soc te p'ijil winiquetic yu'un, te jtsobawetic, te mach'atic ich'bilic ta cuenta soc te soldadohetic yu'une. Ya xwayic sbahtel q'uinal, ma ba ya xcuxix yo'tanic, xchi te Ajwalil, te Jehová te scuentahinej spisil te sbihile.

⁵⁸Hich ya yal te Jehová te scuentahinej spisil: Te pimil ts'ahc yu'un Babilonia jc'axel ya yich' jinel soc ya xlajic ta c'ahc' te toyol ochibaletic yu'une. Tojol a'tejic te pueblohetic, tojol luhbic te nacionetic, yu'un ya xlaj ta c'ahq'uel spisil, xchi.

⁵⁹Ha te c'op te ticombil yu'un te jalwanej Jeremías ta stojol te Seraías snich'an Nerías, snich'an Maasías, te c'alal la sjoquin bahel ta Babilonia te Sedequías, ajwalil yu'un Judá, ta schanebal ha'bil yochel ta ajwalil a. Te Seraías ha jtsobaw ta behel.

⁶⁰Te Jeremías la sts'ihbay ta hun spisil te bintic chopol te ya xtal ta stojol Babilonia, spisil te c'opetic la yalbe sc'oblal ta scontra te Babilonia.

⁶¹Hich la yalbe te Seraías: C'alal ya xc'ohat ta Babilonia, tulan xawal spisil te bintic ts'ihbabil ini.

⁶²Hich me yac awal: Jehová, ha'at awaloj te yac ajin te lugar ini, mayuc mach'a ya xnahinix tey a, ants-winiquetic o chambahlametic, soc te stalel jochol ya xhil, xchihat.

⁶³Te c'alal ya xlaj awilbel te hun ini, ya me achuc soc ton, ya me ach'oj ochel ta muc'ul-ha' Éufrates,

⁶⁴soc hich me yac awal: Hich ya x'etanot ta ha' te Babilonia, ma ba ya scha'hahchix xan tal yu'un te jinel ya cac' tal ta stojole. Tsalbil ya xc'oht, xchihat me. Li' laj te sc'op te Jeremías.