Read Tzeltal Jeremías 6 Bible Online

Jeremías 6 - Tzeltal bible

Jeremías 6

¹¡Ahnanic bahel, sts'umbalex Benjamín, ahnanic loq'uel ta Jerusalén! ¡Oq'uesinahic corneta ta Tecoa, toyahic mohel señahil ta Bet-haquerem! como ay bin chopol ya xtal ta stojol norte, ya xtal muc'ul jinel.

²Ya jlajin te yantsil-nich'an Sión te buen t'ujbil soc te jteb stahele.

³Ya xtal ta contrahinel yu'un jcanan-tuminchijetic soc te tsohbotsohb tuminchijetic yu'unique. Ya me spas nahilpaq'uetic ta sjoyobal, jujutuhl ya ya'be swe'el stuminchijic tey ta banti ayic, xchi te Diose.

⁴¡Chahpana guerra ta stojol! ¡Hahchanic, ochucotic ta ohlil c'ahc'al! Pero obol jbahtic, mahlelix c'ahc'al, muq'uix bahel te axinale.

⁵¡Hahchanic, ochucotic ta ahc'abal, jimbetic sna ajwaliletic yu'unic! xchihic.

⁶Hich la yal te Jehová te scuentahinej spisil: Ts'etahic te'etic, busanahic mohel lum ta spat ts'ahc ta scontrahinel te Jerusalén. Te muc'ul pueblo ini ya sc'an ya x'a'bot castigo, como nojel ta uts'inel.

⁷Hich te bin ut'il spisil ora ya xloc' ya'lel te sloq'uib-ha', hich spisil ora ya xloc' schopolil; ya x'a'iybot sc'oblal uts'inel soc jinel tey a, spisil ora ay ta jtojol chamel soc ehchen.

⁸Tojobtesa aba, Jerusalén, scuenta yu'un ma ba ya quihquitayat, scuenta yu'un ma ba ya jsutp'inat ta jochol taquin q'uinal, ta q'uinal te mayuc yajwal, xchi.

⁹Hich la yal te Jehová te scuentahinej spisil: Lehahic hich te bin ut'il ts'usubil te mach'atic yu'un Israel te hilemic; c'asesa xan ac'ab ta sc'abc'ab ts'usub, hich te bin ut'il ya spas te mach'a ya stsobe te site, xchi.

¹⁰¿Mach'a ya jc'opon soc ya jtsits, yu'un ya ya'iy? Macal schiquinic, ma xhu' ya ya'iyic c'op. Ya xq'uexawic yu'un te sc'op Jehová, mayuc yutsil yo'tanic yu'un.

¹¹Ha yu'un nojel co'tan ta yilimba Jehová, luhbenonix yu'un scomel jba. La yal te Jehová: Mala bahel ta stojol te alaletic ta calle soc ta stojol te queremetic banti stsoboj sbahic; como ya me yich'ic chuquel te winiquetic soc yihnamic, te mamaletic soc te mach'atic c'ax mamalixe.

¹²Te snahic, sq'uinalic soc yihnamic ya x'ich'otic yu'un yantic, como ya me jach jc'ab ta stojol te mach'atic nahinemic ta q'uinal, xchi te Jehová.

¹³Spisilic, muc' biq'uitetic, ya xbic'taj yo'tanic yu'un stahel taq'uin; jalwanejetic soc sacerdotehetic, spisilic jlo'loywanejetic.

¹⁴Sba nax ya spoxtaybeyic yehchen te pueblo cu'une, hich ya yalic: Lamal q'uinal, lamal q'uinal, xchihic, c'alal mayuc lamal q'uinal.

¹⁵¿Q'uexawic bal yu'un te bin ihlaybil te spasojique? Ma'uc, jc'axel ma xq'uexawic; ma sna'ic bin a te q'uexlale. Ha yu'un ya xyahlic ta yohlil te mach'atic ya xyahlique; ya me xyahlic te c'alal ya ca'be castigo, xchi te Jehová.

¹⁶Hich la yal te Jehová: Tehc'ana abahic ta behbetic soc ilawilic, joc'oyahic te namey behetic, ha te banti ay te lequil be. Tey me ya xbehenex a, hich ya sta cux-o'tanil a te ach'uhlelic, xchi. Pero hich la yalic: Ma ba ya xbehenotic tey a, xchihic.

¹⁷La jcac' ta atojolic j'il-q'uinaletic te hich ya yalbeyex: ¡A'iya me awa'iyic yoq'uel te corneta! xchihic. Pero hich la yalic: Ma ba ya ca'iycotic, xchihic.

¹⁸Ha yu'un a'iya awa'iyic, nacionetic, c'ohtuc ta awo'tanic, pueblohat, te bin ya xc'oht ta pasel ta stojolic.

¹⁹A'iya awa'iy, lumq'uinal: Ya quich' tal bin chopol ta stojol te pueblo ini, ha te sit te bin snopojic, como ma ba la ya'iybonic jc'op soc la sp'ajbonic te ley cu'une.

²⁰¿Bin stuc cu'un te pom yu'un Sabá o te chi'il jalal te ya xtal ta namal q'uinal? Ma ba ya jtsac te scohtol chic'bil mahtaniletic awu'unic, soc ma lecuc co'tan yu'un te chic'bil mahtaniletic awu'unic, xchi te Jehová.

²¹Ha yu'un hich ya yal te Jehová: Ya cac' te bin ya sc'ohchin sba a te pueblo ini, pajal ya xyahlic tey a te tatiletic soc al-nich'aniletic; ya xch'ayic bahel te spat-xuhquic soc mach'atic jun yo'tan sbahic, xchi.

²²Hich yaloj te Jehová: Ilawil, yac ta talel jun pueblo ta q'uinal ta stojol norte, jun muc'ul nación ya xhahch ta sti'il te bahlumilale.

²³Chapalic soc st'ihmalte'ic soc slanzahic; ha j'uts'inwanejetic, mayuc xc'uxul yo'tanic. Te sc'opic hich ay te bin ut'il ya x'awon te mar, soc cajajtic ta cawu hich te bin ut'il winiquetic chapalic yu'un ya ya'bat guerra yantsil-nich'anat Sión, xchi.

²⁴La jca'iybetiquix sc'oblal, mayuc yip te jc'abtique. La yu'untayotic pich'il-o'tanil, hich te bin ut'il sc'uxul ya ya'iy te ants ya x'alaj.

²⁵¡Ma me xloc'at bahel ta aquiltic, ma me xbehenat ta behbetic, como ay espada yu'un te contra, soc bayuc ay xiwel!

²⁶¡Pueblo cu'un, lapa ch'ixal pac' soc balana aba ta tan! Tulan me ya x'oc'athich te bin ut'il ya yich' oq'uetayel hip jtuhl querem, como ta jts'ihn ya xtal ta jtojoltic te jlajinwanej.

²⁷Ya cac'at te ha jtsahtaywanej ya xc'ohat ta stojol te pueblo cu'un, yu'un yac ana'be sba soc yac atsahtay te behetic yu'unic, xchi te Jehová.

²⁸Spisilic ha jtoybahetic, ya xleyawanic ta c'op. Ha bronce soc hierro c'ohemic, spisil chopolic.

²⁹Te shu'xiyojibal c'ahc' tulan ya xhu'xiy, yu'un ya xlaj ta c'ahc' te plomo; tojol ya yich' uhltesel xan, ma ba ya xloc' te bin ma xtuhune.

³⁰Ya x'a'bot sbihilinic ch'aybil plata, como te Jehová la sch'ay bahel, xchi.