Read Tzeltal Lamentaciones 2 Bible Online

Lamentaciones 2 - Tzeltal bible

Lamentaciones 2

¹¡Ilawil bin ut'il te Cajwaltic la smuc ta yaxinal yilimba te yantsil-nich'an Sión! La sjin cohel ta ch'ulchan c'alal ta bahlumilal te yutsilal Israel; ma ba la sna'ix te scajtajib yoc ta yorahil yilimba.

²Te Cajwaltic la sjin, ma ba la sna'be yo'bolil sba; soc sc'ahc'al yo'tan la sjinticlan spisil te nahilpaq'uetic yu'un Jacob; la sjin cohel ta lum te ahnibal ts'ahquetic yu'un te Judá; la spehc'an te ban c'alal scuentahinej soc te príncipaletic yu'une.

³Ta sc'ahc'al yilimba la slajimbe spisil yip te Israel. Ta stojol te scontra la sloq'ues te swa'el sc'ab ta stojol Israel, la stsac c'ahc' ta Jacob hich te bin ut'il nup'bil c'ahc' te ya slajin spisil ta sjoyobal.

⁴La snit te st'ihmalte' hich te bin ut'il contra, chapalix te swa'el sc'ab hich te bin ut'il contra, la sjinticlan spisil te bintic t'ujbil ta ilel. Ta snahilpac' yu'un te yantsil-nich'an Sión la smal cohel yilimba hich te bin ut'il c'ahc'.

⁵Te Cajwaltic hich c'oht te bin ut'il contra, jc'axel la sjin te Israel; la sjinticlan cohel spisil te nahetic yu'un ajwalil, la sjimbe cohel te ahnibal ts'ahquetic yu'un, soc la yac' p'ohluc te mel-o'tan soc oq'uel ta stojol te yantsil-nich'an Judá.

⁶La sjin te snahilpac' hich te bin ut'il yaxna ta ts'umbil nichimetic, la sjin te yawil banti ya stsob sbahique. Te Jehová la yac' ch'ayuc ta o'tanil ta Sión te q'uinetic soc te sc'ahc'alel cux-o'tan; soc ta scuenta sc'ahc'al yilimba la sp'aj te ajwalil soc te sacerdote.

⁷Te Cajwaltic la sp'aj te scajtajib ta chiq'uel mahtanil yu'un soc mayuc sc'oblal c'oht ta yo'tan te ch'ul awilal yu'une; la ya'be ta sc'ab scontra te spahc'ul te nahetic yu'un ajwalil; awonic ta sna Jehová hich te bin ut'il ta sc'ahc'alel q'uin.

⁸Te Jehová la snop te ya sjin cohel te ts'ahquetic yu'un te yantsil-nich'an Sión. La st'im bahel te sp'isojibal, ma ba la scom sc'ab ta sjinel. La ya'be smel yo'tan te busambil lum soc te ts'ahc, ta junax ch'ayic bahel.

⁹Jihnic cohel c'alal lum te ochibaletic yu'un; la swac'ticlan soc la sjinticlan te sc'atal-te'eletic yu'un. Te ajwalil soc te príncipaletic yu'un ayic ta yohlil te mach'atic ma ba yich'ojic te ley, soc te jalwanejetic yu'un mayuc bin ya x'a'bot yilic ta snahal sitil yu'un Jehová.

¹⁰Te mamaletic yu'un te yantsil-nich'an Sión ya shuhcan sbahic ta lum soc ma ba ya xc'opojic; ya yaq'uic tan ta sjolic soc ya slapic pac' yu'un mel-o'tan. Te ach'ixetic yu'un Jerusalén ya snijan sbahic c'alal ta lum.

¹¹Ya xlaj yip jsit yu'un te oq'uele, ya syuc' sba ya ca'iy te jch'uhte; ya xmal cohel jch'a ta lum ta scaj te la yich'ix jinel te pueblo cu'une; te alaletic soc te chu'alaletic yaquic ta lajel ta callehetic yu'un te pueblo.

¹²Hich ya yalbeyic te snanic: ¿Banti ay te pan soc te vino? xchihic c'alal ya xyahlic ta callehetic yu'un te pueblo hich te bin ut'il mach'atic ehchentesbilique.

¹³¿Bin ya calbat ac'oblal? ¿Mach'a ya jpajat soc, yantsil-nich'anat Jerusalén? ¿Mach'a ya jpajat soc yu'un ya jmuc'ubtesbat awo'tan, yantsil-nich'anat Sión? Te ehchen awu'un hich smuc'ul te bin ut'il te mar, ¿mach'a ya xhu' ya slecubtesat?

¹⁴Te jalwanejetic awu'un la yilbat te bin ma meleluc soc te asonsohil, ma ba la yaq'uic chicnajuc te amul yu'un hich ma ba ya xbahat ta chuquel a, ha la yalbat awa'iy lotil sc'op-jalwanej soc howil c'op.

¹⁵Spisil te mach'atic ya xc'axic ta be, ya smaj sc'abic ta atojol, ya xuxubajic soc ya sjimulan sjolic ta stojol te yantsil-nich'an Jerusalén: ¿Ha bal te pueblo ini te ya yalic te c'ax t'ujbil, te ha tse'el-o'tanil yu'un spisil te q'uinale? xchihic.

¹⁶Spisil te acontratac ya sjam yehic ta atojol, ya slabanex soc ya sc'uxuxan yehic, hich ya yalic: ¡La jlajintic! Ha te sc'ahc'alel te la jmahliytic; la jtahtiquix, la jquiltiquix, xchihic.

¹⁷Te Jehová la spas te bin snopoj ta yo'tan, la sc'ohtes ta pasel te sc'op te nameyix la schahpambe sc'oblale. La sjin, ma ba la sna' yo'bolil sbahic, la yac' te tse'el yo'tan ta atojol te acontra soc la stoybe yip te acontrataque.

¹⁸Te yo'tanic te ants-winiquetic ya x'awonic ta stojol te Cajwaltique. ¡Yantsil-nich'anat Sión, maluc ya'lel asit c'ahc'al ahc'abal hich te bin ut'il be-ha'! ¡Ma me xacux awo'tan, ma xawa'be scux yo'tan te asite!

¹⁹¡Hahchan, awonan ta ahc'abal, c'alal ya xhahch jcanan! Mala cohel ta stojol Cajwaltic te bintic ay ta awo'tan, toya mohel ac'ab ta yalbeyel wocol yu'un te scuxlejal te alaletic awu'un, te ya xch'ay q'uinal ya ya'iy yu'un wi'nal ta yochibal spisil te callehetique.

²⁰¡Ilawil, Jehová, nopa awa'iy mach'a hich apasbeyej! ¿Lec bal te ya sti'ic yalatac te antsetic, te tut alaletic te cuentahimbilic yu'unique? ¿Lec bal te ya yich'ic milel ta ch'ul awilal awu'un te sacerdote soc te jalwanej?

²¹Limilic ta callehetic te alaletic soc mamaletic; lajic ta espada te queremetic soc ach'ixetic cu'un. La amajticlan ta yorahil awilimba; la alajinlan, ma ba la ana'be yo'bolil sbahic.

²²La awic'ticlan tal ta bayuc te jcontratac, hich te bin ut'il ta sc'ahc'alel q'uin. Ta sc'ahc'alel yilimba Jehová mayuc mach'a col, mayuc mach'a cuxul hil. Te mach'atic la jcoltes soc te la jcanantay, ¡lajinot yu'un te jcontrahe!