Read Tzeltal Lamentaciones 3 Bible Online

Lamentaciones 3 - Tzeltal bible

Lamentaciones 3

¹Ho'on te mach'a yiloj wocol te tal ta scuenta te xul yu'un te yilimba te Diose.

²Ha la stenon bahelta yihc'al q'uinal, ma ha'uc ta sacal q'uinal;

³ha la yac' tal sc'ab ta jtojol bayel buelta, sjunal c'ahc'al.

⁴La yac' mamalubuc te jbaq'uetal soc te jnuhculel, soc la swac'ticlambon jbaquel;

⁵la schahpan busambil lum ta jtojol soc la sjoytayon ta bin ch'a soc wocol.

⁶La yihquitayon hilel ta yihc'al q'uinal, hich te bin ut'il mach'atic namey chamic.

⁷La smacon ta jujujehch, ma xhu' ya xloc'on bahel; la yac' tal cadenahetic ta jtojol.

⁸Aunque ya x'awonon ta sc'anel coltayel, ma ba ya ya'iybon te jc'ope.

⁹La smacbon jbe ta latsbil tonetic, la yac' te chuhcul c'oht te be cu'une.

¹⁰Hich c'oht ta jtojol te bin ut'il oso te yac smaclibel swe'el, hich te bin ut'il choj te snac'oj sba.

¹¹La showiyteson ta be, la sbutsticlanon; jimbilon hilel yu'un.

¹²La snit te st'ihmalte', la stojlinon ta ya'tejibalul t'ihmalte'.

¹³La slowbon jch'uht ta ya'tejibalul t'ihmalte' te ay ta yawil yu'une.

¹⁴La jquich' tse'layel yu'un spisil te jlumale, spisil ora ya stahonic ta labanel.

¹⁵La snojeson ta bin paj, la syacubteson ta ch'ahco'.

¹⁶La swac'bon sbaquel que ta sjach'el hi', la smucon ta stanul c'ahc'.

¹⁷Namal baht ta jtojol te lamal q'uinal, ch'ayix ta co'tan te bin lec ta a'iyele.

¹⁸Hich la jcal: Lajix quip soc laj te smuc'ul co'tan ta stojol Jehová.

¹⁹Na'bon te jwocol soc te jmel-o'tan, te ch'ahco' soc te sch'ahe.

²⁰Spisil ora ay ta co'tan, ayon ta mel-o'tan yu'un.

²¹Pero ya cac' taluc ta co'tan ini, ha yu'un ay smuc'ul co'tan:

²²Ha ta scuenta sc'uxul yo'tan Jehová te ma ba lajemotic, como mayuc bin ora ya xlaj te sc'uxul yo'tane;

²³yach'il ay ta jujun sab. ¡Mero stalel jun awo'tan!

²⁴Hich ya cal ta co'tan: Te bin ay cu'un, ha te Jehová; ha yu'un ha smuc'ulinej co'tan stuquel, xchihon.

²⁵Te Jehová lec bin ya spasbe te mach'a ha ya smuc'ulin yo'tan, te mach'a ya xlehot yu'une.

²⁶Ha lec ch'abuc ta smahliyel te coltayel yu'un te Jehová.

²⁷Ha lec te ta squeremil to ya yich' te yugo te winique.

²⁸Ac'a shuhcan sba ta stuquel soc ac'a ch'abuc, como ha te Dios te a'bot yu'une;

²⁹ac'a yac' ta ts'ubilum te ye, ya to wan sta smuc'ul yo'tan;

³⁰ac'a yac' scho ta stojol te mach'a ya x'ehchentesot yu'une, soc ac'a ac'otuc ta q'uexlal.

³¹Te Jehová ma ba spisil ora ya xp'ajawan.

³²Aunque ya yac' wocol, ha nix hich ya me sna'be yo'bolil sba, hich te bin ut'il bayel te sc'uxul yo'tane.

³³Como ma hichuc yo'tan te ya yac' wocol soc te ya ya'be mel-o'tan te ants-winiquetique.

³⁴Te ts'o'el ta teq'uel spisil te jchuqueletic ta q'uinal,

³⁵te sjinel te bin toj ta pasel ta stojol ants-winiquetic ta stojol te Mach'a ay ta Toyol,

³⁶te sjinel te bin toj ta chahpanel, ma lecuc yo'tan yu'un te Jehová.

³⁷¿Mach'a ya xhu' ya yal te ay bin ya xc'oht ta pasel teme ma hichuc yaloj ta mandar te Jehová?

³⁸¿Ma bal ha'uc ya xloc' ta ye te Mach'a mero toyol te bintic lec soc te bintic ma lecuc ya xc'oht ta pasel?

³⁹Te mach'a cuxul ¿bin yu'un ya x'och wulwonel yu'un te castigo yu'un te smule?

⁴⁰Ac'a jtsahtaytic ta lec te behetic cu'untic, ac'a suhtucotic xan ta stojol Jehová.

⁴¹Ac'a jtoytic mohel co'tantic soc jc'abtic ta stojol Dios ta ch'ulchan.

⁴²La jle jmulcotic soc jtoyoj jbahcotic ta atojol, ma ba la apasbotcotic perdón.

⁴³La ajoytayotic ta sc'ahc'al awo'tan, la anutsotcotic; la awa'iy milaw, ma ba la ana'botic yo'bolil jbahcotic.

⁴⁴La apots aba ta tocal scuenta yu'un ma ba ya xc'oht ta atojol te ya jc'oponatcotic.

⁴⁵La awac'otic ta p'ajel soc ihlayel ta yohlil te pueblohetique.

⁴⁶Spisil te jcontracotic la sjam yehic ta scontrahimbelotcotic;

⁴⁷xiwel soc yaquil, jinel soc lajinel c'ohemic ta jtojolcotic.

⁴⁸Yac ta loq'uel ya'lel jsit hich te bin ut'il muc'ul ha', yu'un te la yich' jinel te jlumale.

⁴⁹Ma xquehchaj ta oc te ya'lel jsit, mayuc banti ya scux yo'tan,

⁵⁰ha to c'alal ya yil te Jehová c'alal ta ch'ulchan.

⁵¹Ya ya'bon jmel co'tan te bin ya quil, ta scaj te bin c'oht ta pasel ta stojol te yantsilel te jlumale.

⁵²Mayuc scuentahil a la snutsonic te jcontratac hich te bin ut'il ha'mal mut;

⁵³cuxulon to a la yotsesonic ta hotbil ch'en, la smaquic hilel ta ton te sti'ile;

⁵⁴la smucbon jol te ha'etic, hich la jcal: Ch'ayemon ya ca'iy, xchihon.

⁵⁵La jc'oponat ta abihil, Jehová, c'alal ta sc'ubulil te hotbil ch'en;

⁵⁶la awa'iybon jc'op: ¡Ma xamac achiquin yu'un te wocol ya calbate!

⁵⁷Nohpojat tal te bin ora la jc'oponat, hich la awal: Ma xiwat, xchihat.

⁵⁸Cajwal, c'opojat yu'un te jwocole, la acoltaybon te jcuxlejale.

⁵⁹Awiloj, Jehová, te bin ma stojiluc te bin la spasbone, ¡c'opojan ta jcuenta!

⁶⁰Awiloj spisil te spacol la yaq'uic, spisil te bin schapojic ta jcontra.

⁶¹Awa'iybeyej te labanel yu'unic, spisil te bin schapojic ta jcontra;

⁶²te bintic ya yalic yu'un scontrahimbelon, te hich ya spasic sjunal c'ahc'al.

⁶³Ilawil c'alal huculic soc c'alal teq'uelic, ho'on c'ayojilon yu'unic.

⁶⁴¡A'beyahic stoj, Jehová, ha chican bintic spasojic!

⁶⁵¡Ac'a tulanubuc yo'tanic, ac'a taluc ta stojolic te chopol c'oblalil awu'une!

⁶⁶¡Nutsa ta sc'ahc'al awo'tan, Jehová, lajinlana ta ye'tal ch'ulchan!