Read Tzeltal Lamentaciones 4 Bible Online

Lamentaciones 4 - Tzeltal bible

Lamentaciones 4

¹¡Bin ut'il ihc'ub te oro! ¡Bin ut'il ch'ay yutsil st'ujbilal te oro! Puhquemic bahel ta xuhc' callehetic te tonetic yu'un te ch'ul awilal.

²Te yal-snich'nab Sión te lec ta o'tanil, te c'ax hich ich'bil ta cuenta a te bin ut'il lequil oro, ¡yo'tic hich c'ohemic ta o'tanil te bin ut'il pac'bil oxometic, te ha ya'tel jpac'ojom!

³Te yantsilel ha'mal ts'i' ya to nix ya'be schu'ic te yalatac, pero te yantsilal jlumal c'ax chopol yo'tan, hich te bin ut'il te avestruz-mutetic te ay ta jochol taquin q'uinal.

⁴Te yac' te jchu'-alal ya slap' sba ta spajaj ta scaj taquinti'il; ya sc'anic pan te alaletic, pero mayuc mach'a ya x'a'bot yu'un.

⁵Te mach'atic la swe'ic lequil we'elil ya xlajiquix ta wi'nal ta callehetic; te mach'atic muc'ubic ta banti ay chi'in-yaxal pac' ayiquix ta sch'ayojibal tsa'.

⁶C'ax hich smul c'oht a te jlumal te bin ut'il te smul Sodoma, te ora nax jinot, aunque mayuc mach'a tal ta contrahinel yu'un.

⁷Te mach'atic bayel sc'oblal yu'unic c'ax hich sacal a te bin ut'il me'sic, c'ax hich sacal a te bin ut'il leche; te sbaq'uetalic c'ax hich tsaj a te bin ut'il tsajal ton, te bin yilel c'ax hich yutsilal a te bin ut'il zafiro-ton.

⁸Pero ta ora ini c'ax hich ihc' a te bin ut'il abac, ma ba ya xna'bot sbahic ta calle. Slap'oj sba ta sbaquel te snuhculel, taquin hich te bin ut'il si'.

⁹Ha lec xan a te mach'atic lajic ta espada te bin ut'il te mach'atic ya xlajic ta wi'nal, como c'unc'un chamic ta scaj te mayuc sit awal-ts'unubil ta q'uinal.

¹⁰Te antsetic te ay sc'uxul yo'tanic, ta sc'abic nix la spayic te yalataque; ¡ha nix te yalatac tuhun yu'un swe'elic, ta yorahil sjinel te jlumale!

¹¹Te Jehová ts'acal c'oht te yilimba, la smal cohel te sc'ahc'al yo'tan, la ya'be sc'ahc'al te Sión te la slajin c'alal ta yich'o-ip.

¹²Te ajwaliletic ta q'uinal soc spisil te mach'atic nahinemic ta bahlumilal ma ba la sch'uhunic te ya x'ochic ta ochibaletic yu'un Jerusalén te scontrataque.

¹³Ha ta scaj smulic te jalwanejetic soc te schopolil te sacerdotehetic yu'unic, te tey nix ta yohlil te Jerusalén la smalbeyic sch'ich'el te mach'atic toj yo'tanic.

¹⁴Xhanlajan behenic ta callehetic hich te bin ut'il ts'o'sitetic, c'ax bohlobenic yu'un ch'ich', hich mayuc mach'a ya sc'an ya spicbe te sc'u'ique.

¹⁵¡Q'ueja abahic! ¡Bohloben ac'oblalic! xchi sc'oblalic ta awtayel. Loc'anic, loc'anic, ma me xapiquic, xchi sc'oblalic. Hich ahnic loq'uel, puhquic bahel. Hich la yich' halel ta yohlil te nacionetic: Ma xhu' ya x'ayiniquix li'i, xchihic. Mayuc ta stojol te Diose.

¹⁶Ha nix te Jehová te la spucticlan bahel, ma ba ya yilix xan; ma ba ich'otic ta muc' te sacerdotehetic, ma ba na'bot yo'bolil sbahic te mamaletique.

¹⁷Luhb te jsitique, tojol yac ta smahliyel yil coltayel; quechelotic ta smahliyel te nación te ma xhu' ya xcoltaywan.

¹⁸La stsahtay yilic te jujujihm coctic hich ma ba hu' ya xbehenotic ta callehetic. Nohpoj tal te slajibal cu'untic, ts'acay te corahiltic, c'ohtix te jlajibaltique.

¹⁹Te jnutsawal cu'untic c'ax hich ya x'ahnimajic a te bin ut'il jxic ya xwihl ta ch'ulchan; la snutsotic ta witsiltic, la smacliyotic ta jochol taquin q'uinal.

²⁰Och ta yaquil te mach'a tsahbil yu'un Jehová, ha te mach'a cuxulotic ta scuenta, ha te mach'a hich la jcalbetic sc'oblal: Ya xcuxajotic ta yaxinal ta yohlil te nacionetic, te xchihotique.

²¹¡Tse'eluc me awo'tan, ayuc me yutsil awo'tan, yantsil-nich'anat Edom; ha'at te ya xnahinat ta sq'uinal Uz! Ha nix ya xc'oht ta atojol te copa, ya me xyacubat soc watal ya xhilat.

²²Ts'acayix te castigo awu'un, yantsil-nich'anat Sión; ma ba ya xcha'ic'atix bahel ta chuquel. Pero ha'at yantsil-nich'anat Edom, ya ya'bat castigo yu'un amul, ya yac' chicnajuc te muliletic awu'une.