Read Tzeltal Lamentaciones 5 Bible Online

Lamentaciones 5 - Tzeltal bible

Lamentaciones 5

¹Na'a me, Jehová, te bin c'ohem ta jtojolcotic; ilawil te jwocolcotic ta uts'inel.

²Te bintic ay cu'uncotic c'axic bahel ta sc'ab yantic, te jnahcotic c'axic bahel ta sc'ab jyanlumetic.

³Me'ba'otcotic, mayuc jtatcotic; te jnancotic hich c'ohtic te bin ut'il me'ba' ants.

⁴Mambil te ha' ya cuch'cotic; ya jtojcotic te si' ya jtuhuncotic.

⁵Ay jwocolcotic ta nutsel, ya xluhbotcotic, mayuc ya jcux co'tancotic.

⁶La jach jc'abcotic ta stojol te egipciohetic soc asiriahetic yu'un ya jtahcotic jwe'elcotic.

⁷La sta smulic te jme'jtatcotic soc wayemix sbaq'uetalic, pero ho'otcotic ya jcuchbecotic te castigo yu'unique.

⁸Ha ajwalil c'oht cu'uncotic te mosohetique, mayuc mach'a ya yac'otic ta libre ta sc'abic.

⁹Ya c'an lajuc jcuxlejalcotic ta stahel jwe'elcotic ta scaj te espada ta jochol taquin q'uinal.

¹⁰Ihc'uben te jnuhculelcotic hich te bin ut'il horno, ta scaj sc'ahc'al te wi'nale.

¹¹La yuts'inic antsetic ta Sión, te ach'ixetic ta pueblohetic ta Judá.

¹²Te snich'nab ajwalil la yich'ic jipanlanel ta sc'abic; ma ba la yich'ic ta muc' te mamaletique.

¹³Te jcolel winiquetic la yaq'uic ta juch', te queremetic laj yipic yu'un yalal si'.

¹⁴Mayuquix mamaletic ta yochibal te pueblo, ma ba ya xc'ayojinic te queremetique.

¹⁵Mayuquix stse'elil co'tancotic, te ahc'ot cu'uncotic c'atp'ujix ta mel-o'tan.

¹⁶Ch'ay cohel ta joltic te corona. ¡Obol jbahcotic como jtahoj jmulcotic!

¹⁷Ha scuentahil te ayotcotic ta mel-o'tan soc te ya xtocalub te jsitcotique:

¹⁸ta scaj te wits Sión te jochol hilem, soc ya xbehenix waxetic tey a.

¹⁹Pero ha'at, Jehová, sbahtel q'uinal ajwalilat; stalel ay amuc'ul huctajib ta cajalcaj ts'umbalil.

²⁰¿Bin yu'un te jc'axel yac ach'ayotcotic ta awo'tan, soc te bayel c'ahc'al yac apihtesotcotic?

²¹Ic'awotcotic suhtel tal ta atojol, Jehová, yu'un hich ya suhtotcotic talel a; ach'ubtesbotcotic jcuxlejalcotic hich te bin ut'il ta nahil to.

²²O ¿jc'axel bal la aloq'uesotcotic ta atojol soc jc'axel bal ilinemat ta jtojolcotic?