Read Tzeltal Ezequiel 1 Bible Online

Ezequiel 1 - Tzeltal bible

Ezequiel 1

¹Ta yo'ebal c'ahc'al ta schanebal u, ta slajunebal scha'winic (30) ha'bil te ayon ta yohlil te mach'atic ayic ta chuquel, ayon ta ti' muc'ul-ha' Quebar a, la sjam sba te ch'ulchan, la jquil nahalsitetic yu'un Dios.

²Ta yo'ebal ha'bil te ic'ot bahel ta chuquel a te ajwalil Joaquín, ta yo'ebal c'ahc'al yu'un te u,

³tal sc'op Jehová ta stojol te sacerdote Ezequiel snich'an Buzi ta sq'uinal te caldeohetic ta sti'il te muc'ul-ha' Quebar. Tey c'oht a te sc'ab Jehová ta stojol.

⁴La jquil yac ta talel tulan ic'al-ha'al ta norte soc muc'ul tocal capal ta c'ahc' yac ta tihlel, soc tulan sacal q'uinal ta sjoyobal. Ta yohlil te c'ahc' ay bin ay tey a te pajal soc bronce te xlipet yilel;

⁵soc ta mero yohlil ay bin ay tey a te pajal soc chaneb bintic cuxajtic; hich yilelic te bin ut'il winiquetic.

⁶Te jujune ay chaneb yelawic soc chaneb xiq'uic.

⁷Toj ay te yoquic, soc te stahn yoquic hich te bin ut'il slots' tut toro te xlipet hich te bin ut'il ch'ulbil bronce.

⁸Ta ye'tal te xiq'uic, ta schanjehchel, ay pajal soc sc'ab winic. Ta schanjehchel ay sit yelawic soc xiq'uic.

⁹Te xiq'uic ya stahticlan sbahic. C'alal ya xbehenic ma ba ya suht ta spatic, tuhlultuhl toj ya xbehenic bahel.

¹⁰Te jun yelawic pajal soc yelaw winic, ta swa'el pajal soc choj, ta sq'uexam pajal soc toro, soc ta spat pajal soc jxic;

¹¹hich yilel te sit yelawique. Jujutuhl ay cheb xic' slichoj mohel te ya stahticlan sba soc yan. Te cheb xan xiq'uic smacoj sbaq'uetalic a.

¹²Jujutuhl toj ya xbehen bahel; te banti ac'ot bahel yu'un te espíritu tey behenic a, ma ba ya suht ta spatic c'alal ya xbehenic.

¹³Te bin yilelic te bintic cuxajtic, hich yilelic te bin ut'il tihlem ac'al, o hich te bin ut'il tsumbil c'ahc' te ya xtal ya xbaht ta yohlilique. Tulan sjahts' te c'ahq'ue, tey yac ta loq'uel tsantsehwaletic a.

¹⁴Te bintic cuxajtic ahnimal ya xtal ya xbahtic, pajal soc tsantsehwal.

¹⁵C'alal yacon ta yilel a te bintic cuxajtic, la jquil yoc carreta ta lum ta sts'ehl te jujutuhl bintic cuxajtic, ta schanjehchel.

¹⁶Te bin yilel te yoquic soc te bin ut'il pasbilic, hich yilelic te bin ut'il yax-el'el ton. Pajal yilel schanebal; hich yilelic te bin ut'il ay yoc ta yutil yan yoc.

¹⁷C'alal ya xbehenic, ya xbehenic ta schanjehchel, ma ba ya sut sitic.

¹⁸Te schanebal xotlejal yoc ha toyol soc xiweltic sba, soc nojel ta sitil ta sjoyobal.

¹⁹Te c'alal ya xbehenic te bintic cuxajtic, ha nix hich ya xbehenic te yoc carretahetique. Te c'alal ya xmohic hahchel ta lum te bintic cuxajtic, ha nix hich ya xmohic hahchel te yoc carretahetique.

²⁰Te banti ya x'ac'otic bahel yu'un te espíritu, tey ya xbahtic a; te yoc carretahetic pajal ya xtohyic mohel hahchel soc, como te espíritu yu'un te bintic cuxajtic ay ta yoc carretahetic.

²¹Te c'alal ya xbehenic te bintic cuxajtic ha nix hich ya xbehenic te yoc carretahetic, c'alal ya xquehchajic ta behel, ha nix hich ya xquehchajic ta behel. Soc te c'alal ya xwihlic hahchel ta lum te bintic cuxajtic, ha nix hich ya xtohy mohel te yoc carretahetic, como te espíritu yu'un te bintic cuxajtic ay ta yoc carretahetic.

²²Ta yahc'olal te sjolic te bintic cuxajtic ay bin limbil hich te bin ut'il t'ujbil sts'ayet cristal.

²³Ta ye'tal te bin limbil tey slich'ticlanej bahel a te xiq'uic te bintic cuxajtic, ya stahticlan sbahic. Te jujutuhl ay cheb xiq'uic te smacoj sbaq'uetalic a.

²⁴La jca'iybe sc'op te xiq'uic te c'alal ya xhahchic bahel, pajal soc sc'op bayel ha'etic, pajal soc sc'op te Mach'a spisil ya xhu' yu'un, pajal soc xjuyet bayel soldadohetic. Te c'alal ya stehc'an sbahic, ya scohtesic te xiq'uique.

²⁵Te c'alal ya stehc'an sbahic soc ya scohtesic te xiq'uic, chicnaj c'op ta sba te bin limbil te ay ta yahc'olal te sjolique.

²⁶Ta sba te bin limbil ta yahc'olal te sjolic ay bin chican te hich yilel te bin ut'il muc'ul huctajibal pasbil ta t'ujbil yaxal ton; soc ay mach'a te pajal soc winic yilel hucul ta bin pajal soc muc'ul huctajibal yilele.

²⁷Ta sch'uyomba mohel la jquil hich yilel te bin ut'il bronce te sch'ulet, hich yilel te bin ut'il c'ahc' ta yutil ta sjoyobal. Soc ta sch'uyomba cohel la jquil te pajal soc c'ahc' yilel soc ay sts'anabul ta sjoyobal.

²⁸Hich te bin ut'il xojob te ay ta tocal te c'alal ay ha'al, hich yilel te sts'anabul ta sjoyobal. Hich yilel te nahalsitil yu'un te bin yilel te yutsilal te Jehová. Te c'alal la jquil, la jpahcan jba c'alal ta lum, soc la jca'iybe sc'op te mach'a c'opoje.