Read Tzeltal Ezequiel 10 Bible Online

Ezequiel 10 - Tzeltal bible

Ezequiel 10

¹Patil la jquil te ta sba te bin limbil ta yahc'olal te sjolic te querubinetic ay bin chican te hich yilel te bin ut'il t'ujbil yaxal ton, te hich yilel te bin ut'il muc'ul huctajibal.

²Te Jehová la sc'opon te winic te slapoj lino-pac', hich la yalbe: Ochan ta yohlil te yoc carretahetic te ay ta ye'tal te querubinetic, nojesa ta ac'ab te tsumbil ac'al te ay ta yohlil te querubinetic, puca bahel ta stojol te pueblo, xchi. La jquil te och bahel te winique.

³Te querubinetic ayic ta swa'el-c'ab te templo te c'alal och bahel te winique; soc noj ta tocal te amac' ay ta yutile.

⁴Te yutsilal te Jehová tohy mohel ta sba te querubín, toj bahel ta yochibal te templo; noj ta tocal te templo, soc te yamaq'uil noj ta sts'anabul te yutsilal te Jehová.

⁵Te sc'op te xiq'uic te querubinetic chican c'alal ta shahchibal amac', hich te bin ut'il sc'op te Dios te c'alal ya xc'opoje.

⁶Te Jehová la spas ta mandar te winic te slapoj lino-pac', hich la yalbe: Ich'a te c'ahc' ay ta yohlil te yoc carretahetic, ta yohlil te querubinetic, xchi. Hich och bahel te winic, la stehc'an sba ta yohlil te yoc carretahetique.

⁷Jtuhl querubín la shach bahel sc'ab ta stojol te c'ahc' ay ta yohlilic, la stsac jtebuc te c'ahc', la ya'be ta sc'ab te winic te slapoj lino-pac'. Te winic la stsac te c'ahc', loc' bahel.

⁸Ta ye'tal te xiq'uic te querubinetic ay bin chican te sjel ta sc'ab winic.

⁹Ta sts'ehl te querubinetic la jquil ay chaneb yoc carretahetic, jun yoc carreta ta sts'ehl te jujun querubín. Hich yilel te yoc carretahetic te bin ut'il yax-el'el ton.

¹⁰Junax yilel ta schanebal te yoc carretahetic, hich yilel te bin ut'il te ay yoc ta yutil te yan yoque.

¹¹Te c'alal ya xbehenic ta schanjehchel ma ba ya sut sbahic te ya xbehenique, tey ya xbahtic ta banti ya xbaht te nahil aye.

¹²Ta spisil sbaq'uetalic, ha ta spatic, ta sc'abic, ta xiq'uic soc ta yoc carretahetic, nojel ta sitil ta sjoyobal.

¹³La jca'iy te halbot sbihil te yoc carretahetic: Sjoyoyet, xchi.

¹⁴Jujutuhl te querubinetic ay chaneb sit yelawic: te june ha sit yelaw querubín, te schebale ha sit yelaw winic, te yoxebale ha sit yelaw choj, te schanebale ha sit yelaw jxic.

¹⁵Mohic bahel te querubinetique; ha'ic te bintic cuxajtic te la jquil ta muc'ul-ha' Quebar.

¹⁶Te c'alal ya xbehenic te querubinetic, ha nix hich ya xbehenic te yoc carretahetique; te c'alal ya shachic mohel te xiq'uic te querubinetic yu'un ya xwihlic hahchel ta lum, ma ba ya x'ihquitayotic yu'un te yoc carretahetique.

¹⁷C'alal ya xquehchajic ta behel, ha nix hich ya xquehchajic ta behel, c'alal mohic bahel, ha nix hich mohic bahel; como te espíritu yu'un te bintic cuxajtic ay ta yoc carretahetic.

¹⁸Hich te yutsilal te Jehová tohy hahchel ta sba te yochibal te templo, c'oht ta sba te querubinetique.

¹⁹Te querubinetic la shachic mohel te xiq'uic, ta stojol jsit hahchic mohel ta lum. C'alal loq'uic bahel, ha nix hich mohic bahel te yoc carretahetique. La stehc'an sbahic ta yochibal te puerta ay ta stojol sloq'uib c'ahc'al yu'un te sna Jehová; te yutsilal te Dios yu'un Israel ay ta sbahic.

²⁰Ha nix te bintic cuxajtic te la jquil ta ye'tal te Dios yu'un Israel ta muc'ul-ha' Quebar. La jna' te ha querubinetic.

²¹Jujutuhl ay chaneb sit yelawic, jujutuhl ay chaneb xiq'uic, soc ta ye'tal te xiq'uic pajal soc sc'ab winic yilel.

²²Te yelawic pajal soc te yelawic te la jquil ta muc'ul-ha' Quebar. Ta jujutuhl toj ya xbehenic bahel.