Read Tzeltal Ezequiel 11 Bible Online

Ezequiel 11 - Tzeltal bible

Ezequiel 11

¹Te espíritu la slicon mohel, la yic'on bahel ta yochibal te sna Jehová te ya yil bahel ta stojol banti ya xloc' tal c'ahc'al. Tey ta yochibal te puerta ay ho'eb scha'winic (25) ta tuhl winiquetic, soc la jquil ta yohlilic te Jaazanías snich'an Azur, soc te Pelatías snich'an Benaías, príncipaletic yu'un te pueblohe.

²Hich la yalbon te Jehová: Snich'anat winic, te winiquetic ini ha'ic te ya snopic te bin chopol soc te ya ya'beyic te pueblo j'ac'-o'tanil te ma lecuc.

³Hich ya yalic: Ma to yorahiluc te ya jcha'pastic te nahetique. Ha oxom te pueblo ini, ho'otic ti'balotic, xchihic.

⁴Ha yu'un, snich'anat winic, ¡c'opona ta sc'op-jalwanej ta scontrahinel! xchi.

⁵La yu'untayon te espíritu yu'un Jehová, hich la yalbon: Halbeya: Hich yaloj te Jehová: Hich awalojic, pueblo Israel, jna'ojbat te bintic anopoj ta awo'tanique.

⁶Bayel te mach'atic la amilic ta pueblo ini; la anojesic te callehetic yu'un ta mach'atic milbilic.

⁷Ha yu'un hich yaloj te Jehová, te Ajwalil: Te chamen baq'uetetic te awac'ojic ta yohlil te pueblo, ha te ti'bale, soc ha te oxom te pueblohe, pero ya jloq'uesex tey a.

⁸La axi'ic te espada, ha nix espada te ya cac' ta atojolic, xchi te Jehová, te Ajwalile.

⁹Ya jloq'uesex bahel ta pueblo, ya caq'uex ta sc'ab jyanlumetic soc ya ca'beyex castigo.

¹⁰Ya me xlajex ta espada; ya ca'beyex castigo ta sti'il sq'uinal Israel. Ya me ana'ic te ho'on Jehovahon.

¹¹Te pueblo ma ha'uc oxom awu'unic ya xc'oht, soc ma ha'uc ti'bal ya xc'ohex tey a; ya ca'beyex castigo ta sti'il sq'uinal Israel.

¹²Hich yac ana'ic a te ho'on Jehovahon; como ma ba at'unojic te chahpambil c'op cu'un soc ma ba ach'uhunejic spasel te mandariletic cu'une, ha la at'umbeyic stalel te nacionetic te sjoytayejex, xchi.

¹³Te c'alal yacon ta yalel sc'op-jalwanej a, cham te Pelatías snich'an Benaías. Hich la jpahcan jba, la jca'be sta lum te jti'ba, tulan awonon, hich la jcal: ¡Ay, Cajwal Jehová! ¿Ya bal alajin spisil te mach'atic hilemic yu'un Israel? xchihon ta aw.

¹⁴Tal ta jtojol te sc'op Jehová, hich la yal:

¹⁵Snich'anat winic, te awermanotac, te mero awermanotac, ha te amohlol ats'ahquil soc spisil te pueble Israel, ha'ic te mach'atic hich halbotic sc'oblal yu'un te mach'atic nahinemic ta Jerusalén: Namal ayic ta stojol Jehová; ho'otcotic a'bilotcotic quich'cotic te q'uinale, xchihic.

¹⁶Ha yu'un hich me xawalbe: Hich yaloj te Jehová, te Ajwalil: Aunque namal la jticonlan bahel ta yohlil te nacionetic, aunque la jpucticlan ta yohlil yantic q'uinaletic, ha ahnibal ya xc'ohon yu'unic te banti ya xc'ohtique, xchi.

¹⁷Ha yu'un hich xawalbe: Hich yaloj te Jehová te Ajwalil: Ho'on ya jcha'tsobex xan tal ta pueblohetic, ya jcha'iq'uex xan tal ta q'uinaletic te banti puhquemex bahele, ya ca'beyex te sq'uinal Israel.

¹⁸Ya xcha'suhtic xan talel, soc ya me sloq'uesic spisil te loc'ombahetic tey a soc spisil te bintic ilobtic sba yu'unique.

¹⁹Ya ca'be yach'il yo'tanic soc yach'il espíritu ta yo'tanic; ya jloq'uesbe te o'tanil yu'un ton, ya ca'be o'tanil yu'un baq'uet,

²⁰scuenta yu'un ya st'unic te mandariletic cu'un soc ya sch'uhunic spasel te chapbil mandariletique. Ha pueblo cu'un ya xc'ohtic, soc ho'on Dioson yu'unic ya xc'ohon.

²¹Pero te mach'atic ay ta yo'tanic st'unel te loc'ombahetic soc te bintic ilobtic sba yu'unic, ya cac' ta sjolic te bintic spasojic, xchi te Jehová, te Ajwalil.

²²Patil te querubinetic la shach xiq'uic, soc tey ay ta sts'ehlic a te yoc carretahetic; soc te yutsilal te Dios yu'un Israel ay ta yahc'olalic.

²³Te yutsilal te Jehová tohy mohel ta yohlil te pueblo, c'oht ta sba te wits te ay ta stojol banti ya xloc' tal c'ahc'al yu'un te pueblohe.

²⁴Te espíritu la slicon hahchel, ta scuenta nahalsitil yu'un te espíritu yu'un Dios la scha'ic'on xan bahel ta sq'uinal te caldeohetic, ta banti ay te mach'atic bahemic ta chuquel. Hich ch'ay bahel te nahalsitil te la jquile.

²⁵La jcalbe te jchuqueletic spisil te bintic la ya'bon quil te Jehová.