Read Tzeltal Ezequiel 12 Bible Online

Ezequiel 12 - Tzeltal bible

Ezequiel 12

¹Tal ta jtojol te sc'op te Jehová, hich la yalbon:

²Snich'anat winic, nahinemat ta yohlil toyba pueblo. Ay sitic pero ma xyilic q'uinal; ay schiquinic, pero ma xya'iyic q'uinal, como ha toyba pueblo.

³Ha yu'un, ha'at snich'anat winic, chahpana abiluc yu'un ya xloc'at bahel, ta c'ahc'alel ya me xloc'at bahel ta comon sitil. Ya me xloc'at hahchel ta ana, ya xbahat ta yan lugar ta comon sitil. Ya wan xc'oht ta yo'tanic, aunque toyba pueblo.

⁴Ta c'ahc'alel ta comon sitil ya me aloq'ues abiluc, hich yilel te ya xbahat ta chuquel; ta tibiltic ta comon sitil ya me xloc'at bahel ha'at, hich yilel te bin ut'il mach'a ya xloc' bahel ta chuquel.

⁵Ta comon sitil hota te ts'ahc, tey ya xloc'at bahel soc a te abiluque.

⁶Ta comon sitil ya me acajan bahel ta anehquel te abiluque, ta yihc'ubel q'uinal ya xloc'at bahel soc; ya me amac asit awelaw scuenta yu'un ma xhu' yac awil te q'uinale. Como ha seña ya xc'ohat cu'un ta stojol te sna Israel, xchi.

⁷Hich la jpas te bin ut'il la spason ta mandar. Ta c'ahc'alel la jquich' loq'uel te jbiluque, hich yilel te ya xbohonix ta chuquel, soc ta tibiltic la jot ta jc'ab te ts'ahque; ta yihc'ubel q'uinal ta comon sitil la jcajan ta jnehquel te jbiluc, loc'on bahel.

⁸Ta sahb tal ta jtojol te sc'op Jehová, hich la yalbon:

⁹Snich'anat winic, ¿ma bal hichuc la sjoc'obat te sna Israel, te toyba pueblo: ¿Bin yac apasbel? ma bal xchihic?

¹⁰Hich me xawalbe: Hich yaloj te Jehová, te Ajwalil: Te sc'op-jalwanej ini ha sc'oblal te ajwalil ta Jerusalén soc spisil te sna Israel te tey ay a, xchihat.

¹¹Halbeya: Ho'on señahilon awu'unic. Te bin la jpas, hich ya xpasbotex; ya me xloq'uex bahel ta chuquel.

¹²Te ajwalil te ay ta yohlilic ya me scajan sbiluc ta snehquel ta ahc'abal, ya xloc' bahel. Ya me shotic te ts'ahc te banti ya xloc' bahel, soc ya me smac sit yelaw scuenta yu'un ma ba ya yil a te q'uinale.

¹³Pero ya jlim bahel jyac ta stojol, ya yich' tsaquel ta yaquil cu'un; ya quic' bahel ta Babilonia, ta sq'uinal te caldeohetic, pero ma ba ya yil te sq'uinalique; tey ya xcham a.

¹⁴Ya jpucticlan bahel ta stojol spisil te iq'uetic spisil te mach'atic ayic ta sjoyobal yu'un ya scoltayic, soc spisil te soldadohetic yu'une, ya jloq'ues te espada ta sna, ya jnutsticlan bahel a.

¹⁵Ya me sna'ic te ho'on Jehovahon te c'alal ya jpucticlan bahel ta yohlil te nacionetic soc yantic q'uinaletic.

¹⁶Pero ya cac' te cha'oxtuhlic ya x'ahnic loq'uel ta stojol te espada, te wi'nal soc te jmilawal-chamel, scuenta yu'un ta nacionetic te banti ya xbahtic ya me yalic spisil te bintic ilobtic sba la spasique. Ya me sna'ic te ho'on Jehovahon, xchi.

¹⁷Tal ta jtojol te sc'op Jehová, hich la yal:

¹⁸Snich'anat winic, nihcan te c'alal ya xwe'at, soc yuc'a aba soc xiwel te c'alal ya x'uch'at.

¹⁹Halbeya te swinquilel te q'uinal, te Jehová, te Ajwalil, hich yalbeyej sc'oblal te mach'atic nahinemic ta Jerusalén soc ta sq'uinal Israel: Yaquic ta nihquel a ya swe'ic te pan yu'unic, soc ayic ta xiwel a ya yuch'ic te ha' yu'unique, como te q'uinal yu'unic ya me yich' pojbeyel spisil bintic ay tey a ta scaj sbohlilic spisil mach'atic nahinemic tey a.

²⁰Te pueblohetic te ay mach'atic nahinemic tey a jimbil ya xhilic soc jochol ya xhil te q'uinale. Ya me ana'ic te ho'on Jehovahon, xchi.

²¹Tal ta jtojol te sc'op Jehová, hich la yalbon:

²²Snich'anat winic, ¿bin a te tsahbil c'op ini te ay awu'unic ta sq'uinal Israel te hich ya yal: Yac ta c'axel c'ahc'al, soc spisil te nahalsitiletic ma xc'oht ta pasel, te xchihe?

²³Ha yu'un halbeya: Hich yaloj te Jehová, te Ajwalil: Ya ca'be slajibal te tsahbil c'op ini, ma ba ya yich'ix xan halel ta Israel, xchihat. Halbeya: Nopolix te sc'ahc'alel soc nopolix te ya xc'oht ta pasel spisil te nahalsitiletique.

²⁴Como mayuquix nahalsitil te ya xlo'loywan o jna'ojel te biluc nax ya yal ta yohlil te sna Israel.

²⁵Como ho'on Jehovahon ya xc'opojon, soc ya me xc'oht ta pasel te bin ya cal, ma ba ya xhalajix; ta sc'ahc'alel awu'unic, toyba pueblohex, ya xc'opojon soc ya cac' te ya xc'oht ta pasel, xchi te Jehová, te Ajwalil, xchihat.

²⁶Tal ta jtojol te sc'op Jehová, hich la yal:

²⁷Snich'an winic, hich ya yal te sna Israel: Te nahalsitil te ya yil te winic ini bayel to c'ahc'al te ya xc'oht ta pasele; namal to te bin ya yal ta sc'op-jalwanej, xchihic.

²⁸Ha yu'un hich xawalbe: Hich yaloj te Jehová, te Ajwalil: Ma ba ya xhalajix jp'ahluc te jc'ope, ya me xc'oht ta pasel te bin ya cal, xchihat.