Read Tzeltal Ezequiel 13 Bible Online

Ezequiel 13 - Tzeltal bible

Ezequiel 13

¹Tal ta jtojol te sc'op Jehová, hich la yal:

²Snich'anat winic, halbeya sc'op-jalwanej ta scontrahinel te jalwanejetic ta Israel te ya yalic sc'op-jalwanej, hich me xawalbe te mach'atic ta stuquel-o'tan ya yalic sc'op-jalwanej: A'iya awa'iyic te sc'op te Jehová:

³Hich yaloj te Jehová, te Ajwalil: ¡Ay me swocolic te sonso jalwanejetic te st'unojic te bin snopoj ta yo'tanic, te mayuc bin yilojique!

⁴Te jalwanejetic awu'un, Israel, hich c'ohemic te bin ut'il waxetic ta jochol taquin q'uinal.

⁵Ma ba mohemex bahel ta banti jamal te ts'ahc, ma ba acha'pasojic xan ts'ahc ta sjoyobal te sna Israel scuenta yu'un ya xcuhch yu'un guerra ta sc'ahc'alel yu'un Jehová.

⁶Yilojic lotil nahalsitil soc lotil jna'ojel. Hich ya yalic: Hich yaloj te Jehová, xchihic, pero ma ha'uc ticombilic yu'un Jehová. Pero yac smahliybelic te ya xc'oht ta pasel te bin ya yalique.

⁷¿Ma bal lajuc awil lotil nahalsitil soc lotil jna'ojeletic te c'alal hich yac awalic: Hich yaloj te Jehová, xchihex, pero mayuc bin caloj?

⁸Ha yu'un, hich yaloj te Jehová, te Ajwalil: Te bin ut'il la awalic lotil c'op soc la awilic lotil nahalsitil, ya jcontrahinex yu'un, xchi te Jehová, te Ajwalil.

⁹Ya jach jc'ab ta scontrahinel te jalwanejetic te ma meleluc bin ya yilic soc te slotic bin ya yalic ta jna'ojel; ma ba ya xhilic ta tsoblej yu'un te pueblo cu'un, soc ma ba ya yich' ts'ihbabeyel sbihilic ta libro yu'un te sna Israel, soc ma ba ya suhtic bahel ta sq'uinal Israel. Ya me ana'ic te ho'on Jehovahon, Ajwalilon.

¹⁰Te bin ut'il la slo'loybonic te pueblo cu'un, te hich la yalbeyic: Lamal q'uinal, xchihic, pero mayuc lamal q'uinal; soc te c'alal ay mach'a ya spas ts'ahc, ha'ic nix ya sbonic ta tan.

¹¹Halbeya te mach'atic ya sbonic ta tan, te ya me xbusq'uij cohel. Ya xtal tulan ic'al ha'al soc ya jticon tal niwac bat soc ya xtal tulan ic'.

¹²Te c'alal ya xhemts'uj cohel te ts'ahc, ¿ma bal hichuc ya sjoc'obeyex: ¿Banti ay te tan te la abonic a? ma bal xchihuquic?

¹³Ha yu'un hich yaloj te Jehová, te Ajwalil: Ta scuenta quilimba ya cac' taluc tulan ic' soc ta scuenta sc'ahc'al co'tan ya cac' taluc tulan ic'al ha'al, soc niwac bat capal ta ilimba te ya slajin.

¹⁴Hich ya jin cohel te ts'ahc te la abonic ta tan, ya jbusq'uin cohel ta lum, ya xchicnaj yilel te yich'o-ipe. Ya xbusq'uij cohel soc tey ya xlajex a; ya me ana'ic te ho'on Jehovahon.

¹⁵Hich ya cac' lajuc te quilimba ta stojol te ts'ahc soc ta stojol te mach'atic la sbonic ta tan; soc ya calbeyex te mayuquix ts'ahc soc te mach'atic la sbonic:

¹⁶ha te jalwanejetic ta Israel te la yalic sc'op-jalwanej te la yalbe sc'oblal Jerusalén soc te la yilic nahalsitil yu'un lamal q'uinal ta stojol Jerusalén, te c'alal mayuc lamal q'uinal a, xchi te Jehová, te Ajwalil.

¹⁷Ha'at, snich'anat winic, ac'a asit awelaw ta scontrahinel te yantsil-nich'nab te pueblo awu'un te ya yalic sc'op-jalwanej ta stuquel-o'tanic.

¹⁸Hich me xawalbe: Hich yaloj te Jehová, te Ajwalil: ¡Ay me swocolic te antsetic te ya sts'isic tut pac' te ay bin ya xhu' ya spasic a ta sc'opic, te ya yaq'uic ta spisil snuc' sc'abic, soc te ya spasic smahquil sjolic ta chahpalchahp ya'bilal, yu'un ya xhu' yu'unic stsacbel scuxlejal ants-winiquetic! ¿Ya bal atsacbe scuxlejal te pueblo cu'un scuenta yu'un hich cuxul ya xhilex te ha'exe?

¹⁹La abohlobtesbonic jc'oblal ta stojol te pueblo cu'un ta scuenta cheb oxeb ta johp cebada soc xeht'elul pan, ha te yac amilic te mach'atic ma sc'oblaluc ya xlajic soc yac awac' cuxajuc te mach'atic sc'oblal ma ba cuxul ya xhilic, te yac alo'loybonic te pueblo cu'un te ya sch'uhunic te lotil c'ope.

²⁰Ha yu'un, hich yaloj te Jehová, te Ajwalil: Ya jcontrahin te tut paq'uetic te ay bin ya xhu' yac apasic ta ac'opic a, te yac atsacbe scuxlejal ants-winiquetic hich te bin ut'il mutetic. Ya jloq'ueslan ta ac'abic, ya jcoltay ta libre yu'un hich ya xwihlic bahel te bin ut'il mutetic te mach'atic yac atsaquic hich te bin ut'il mutetic.

²¹Soc ya jch'i' loq'uel te smahquil awelawic soc ya jcoltay loq'uel ta ac'abic te pueblo cu'une; ma ba ya x'ochix ta ac'abic. Ya me ana'ic te ho'on Jehovahon.

²²Te bin ut'il yac awa'beyic smel yo'tan ta scuenta lot te mach'a toj yo'tan, te ma ho'ucon la jca'be smel yo'tan, soc te la awa'beyic yip sc'ab te mach'a chopol yo'tan scuenta yu'un ma ba ya yihquitay te chopol be, ha te la awa'beyic xan yip yo'tan,

²³ha yu'un ma ba yac awiliquix xan lotil nahalsitil soc ma ba ya apasiquix na'ojel. Ya cac' ta libre ta ac'abic te pueblo cu'une. Ya me ana'ic te ho'on Jehovahon, xchi te Jehová.