Read Tzeltal Ezequiel 14 Bible Online

Ezequiel 14 - Tzeltal bible

Ezequiel 14

¹Ay mamaletic yu'un Israel te tal shuhcan sbahic ta jtojol.

²Tal ta jtojol te sc'op Jehová, hich la yal:

³Snich'anat winic, te winiquetic ini yac'oj ta yo'tanic te loc'ombahetic yu'unic soc yac'ojic te bintic chopol yu'unic scuenta sc'ohchinojibal ta stojolic. ¿Lec bal teme ay bin ya xtal sjoc'obonique?

⁴C'opona hiche, hich xawalbe: Hich yaloj te Jehová, te Ajwalil: Mach'ayuc a ta sna Israel te yac'oj ta yo'tan te loc'ombahetic yu'un, soc te yac'oj bintic chopol yu'un scuenta sc'ohchinojibal ta stojol, teme ya xtal sjoc'obe te jalwanej, ho'on Jehovahon hich ya jac'be sc'opic chican jayeb loc'ombahetic ay yu'une.

⁵Hich ya jpas scuenta yu'un ya jcha'cuentahimbe xan yo'tan te sna Israel, te bin ut'il spisilic yihquitayejonic hilel ta scaj te loc'ombahetic yu'unique.

⁶Ha yu'un, halbeya te sna Israel: Hich ya yal te Jehová, te Ajwalil: Suhtanic tal ta jtojol, ihquitayahic hilel te loc'ombahetic awu'unic, loq'uesahic tal asit awelaw ta stojol spisil te bintic ilobtic sba awu'unique.

⁷Como mach'ayuc a ta sna Israel o te jyanlum te nahinem ta Israel, te ya yihquitay hilel st'umbelon, te ya yac' ta yo'tan te loc'ombahetic yu'un, te ya yac' te bintic chopol yu'un scuenta sc'ohchinojibal ta stojol, soc teme ya xtal ta stojol jtuhl jalwanej yu'un ay bin ya sjoc'obon ta scuenta, ho'on nix ya jsutbe suhtib.

⁸Ya cac' jsit quelaw ta scontrahinel soc ya cac' te ha seña soc tsahbil c'op ya xc'oht, soc ya jloq'ues ta yohlil te pueblo cu'une. Ya me ana'ic te ho'on Jehovahon.

⁹Teme ay jalwanej te ya xlo'loyot soc ay bin ya yal, ho'on Jehovahon la jlo'loy te jalwaneje. Ya jach jc'ab ta scontrahinel soc ya jlajin ta yohlil te pueblo Israel cu'une.

¹⁰Schebalic ya me yich'ic castigo; como te bin yilel smul te mach'a ya sjoc'oy, hich nix yilel smul te jalwanej,

¹¹scuenta yu'un ma ba ya xcha'loc' xan ta jtojol te sna Israel, soc ma ba ya sbohlobtesix sbahic yu'un spisil stoybahilic. Ha pueblo cu'un ya xc'oht soc ho'on Dioson yu'unic ya xc'ohon, xchi te Jehová, te Ajwalil.

¹²Tal ta jtojol te sc'op Jehová, hich la yal:

¹³Snich'anat winic, teme ay nación te ya sta smul ta jtojol, te ma junuc yo'tan ta jtojole, teme ya jach jc'ab ta stojol, teme ya jlajimbe swe'el soc ya jticombe talel wi'nal, soc ya jlajimbe te ants-winiquetic soc te chambahlametic yu'unique,

¹⁴te teyuc ay ta yohlilic a te Noé, Danel soc Job, ha nax ya xcolic ta libre ta yoxebalic te hichuque, ta scuenta te toj bin ya spasic, xchi te Jehová, te Ajwalil.

¹⁵Teme ya jticon bahel ti'awal chambahlametic ta sq'uinal yu'un ya smilticlambe te swinquilel, te hich ya xc'atp'uj ta jochol taquin q'uinal, te mayuc mach'a ya xc'ax tey a ta scaj te ti'awal chambahlametic,

¹⁶te teyuc ay ta yohlilic a te oxtuhl winiquetique, ho'on cuxulon, xchi te Jehová te Ajwalil, ma ba ya xhu' ya yaq'uic ta libre ni te squerem-nich'nabic o te yantsil-nich'nabique. Ha'ic nax ya xcolic stuquelic, yan te q'uinal ya xc'atp'uj ta jochol taquin q'uinal.

¹⁷O teme ya cac' taluc espada ta stojol te q'uinal, teme hich ya cal: ¡Espada, c'axan bahel ta q'uinal! teme xchihone, soc teme ya cac' lajuc ants-winiquetic soc chambahlametic tey a,

¹⁸soc te teyuc ayic ta yohlilic a te oxtuhl winiquetique, ho'on cuxulon, xchi te Jehová te Ajwalil, ma ba ya xhu' ya yaq'uic ta libre ni te squerem-nich'nabic o te yantsil-nich'nabique. Ha'ic nax ya xcolic stuquelic.

¹⁹O teme ya jticon jmilawal-chamel ta stojol te q'uinal soc teme ya jmal cohel te quilimba ta stojol capal soc ch'ich', yu'un ya slajin ants-winiquetic soc chambahlametic,

²⁰te teyuc ay a te Noé, Danel soc Job, ho'on cuxulon, xchi te Jehová te Ajwalil, ma ba ya xhu' ya yaq'uic ta libre ni te squerem-nich'nabic o te yantsil-nich'nabique. Ha nax ya xcolic stuquelic ta scuenta te toj bin ya spasique.

²¹Ha yu'un hich yaloj te Jehová, te Ajwalil: ¡C'ax to xan hich a te c'alal ya jticon bahel ta stojol Jerusalén te chaneb castigo te xiweltic sbahic, ha te espada, wi'nal, ti'awal chambahlametic soc jmilawal-chamel, yu'un ya slajinlanic ants-winiquetic soc chambahlametic tey a!

²²Pero ay mach'atic te cuxul ya xhilic tey a, ha al-nich'aniletic te ya yich'ic loq'uesel tey a. Ya me xtalic ta atojolic, ya me awilic te stalelic soc te ya'telique, hich ya xmuc'ub q'uinal yac awa'iyic yu'un te bin chopol la jcac' taluc ta stojol Jerusalén, spisil te bintic la jcac' taluc ta stojol.

²³Ya me yaq'uic te ya xmuc'ub q'uinal awa'iyic te c'alal yac awilic te stalelic soc te ya'telique; hich me yac ana'ic a te ma tojoluc spisil te bintic la jcac' taluc ta stojol, xchi te Jehová, te Ajwalil.