Read Tzeltal Ezequiel 16 Bible Online

Ezequiel 16 - Tzeltal bible

Ezequiel 16

¹Tal ta jtojol te sc'op Jehová, hich la yal:

²Snich'anat winic, a'beya sna' te Jerusalén te bintic ilobtic sba yu'un,

³hich me xawalbe: Hich yaloj te Jehová, te Ajwalil, sc'oblal Jerusalén: Te banti hahchemat soc te banti ayinat, ha te sq'uinal Canaán; ha amorreo-winic te atat soc hitita-ants te anane.

⁴Te c'alal ayinat, ma ba la yich' set'el te amuxuc', soc ma ba la awich' atintesel, ma ba la awich' jaxulanel ta ats'am soc ma ba la awich' potsel ta pac'.

⁵Mayuc mach'a la sna'bat yo'bolil aba yu'un ya spasbat ini, yu'un ya sc'uxultayat; pero la awich' ch'ojel hilel ta aquiltic, yu'un la awich' ihlayel te bin ora ayinate.

⁶Ho'on c'axon ta banti ayat, la jquilat te yac anicticlambel awoc ac'ab ta ach'ich'el. Te c'alal ayat ta ach'ich'el a, hich la jcalbat: ¡Cuxajan! xchihon.

⁷La jcac' muc'ubat hich te bin ut'il ha'mal ta q'uinal. Muc'ubat, muc' c'ohat, t'ujbil ants c'ohat. Muc'ubic achu' soc nahtub stsotsel ajol; pero mero watalat, mayuc ac'u'.

⁸Cha'c'axon xan ta banti ayat, la jquilat, yorahilix te ya xc'anotat. La jlim bahel ta atojol te sti'il te jmuc'ul-c'u', la jmucbat aq'uexlal. La jcal jba ta jamal ta atojol soc la jchap jc'op soc ha'at, hich la jcu'untayat, xchi te Jehová, te Ajwalil.

⁹La jcatintesat, la jpocbat ach'ich'el soc la jmalbat ta aceite.

¹⁰La jca'bat alap t'ujbil ch'albil c'u'ul, la jca'bat alap nuhcul tepil, la jchucbat ach'uht ta lino soc la jca'bat alap seda.

¹¹La jch'alat ta ch'ahlelaletic, la jca'bat sch'ahlel snuc' ac'ab soc uhalil ta anuc'.

¹²La jca'bat sch'ocowil ani', staq'uinal achiquin soc buen t'ujbil corona ta ajol.

¹³Hich ch'albilat hilel ta oro soc ta plata, soc lequil lino soc seda te ch'albil ac'u' apac'. La awe' lequil trigo, chab soc aceite. C'ax t'ujbil c'ohat, hich c'ohat te bin ut'il ajwalil-ants.

¹⁴Puhc ta halel yutsil ac'oblal ta stojol te nacionetic ta scaj te t'ujbilat, te ha ts'acal c'ohat yu'un te utsilal te la jca'bat, xchi te Jehová, te Ajwalil.

¹⁵Pero ha la smuc'ulin awo'tan te at'ujbilale, la awac' aba ta antsinel ta scaj te muc' sc'oblal te abihile, la awac' aba ta antsinel ta stojol spisil te mach'atic c'axic bahele. ¡Ha la yu'untayat!

¹⁶La apas toyol awilaletic ta ac'u' apac' soc la awac' aba ta antsinel tey a. ¡Mayuc hich c'ohem ta pasel soc mayuc hich ya xc'oht xan ta pasel!

¹⁷Soc la awich' te t'ujbil ch'ahlelaletic pasticlambil ta oro soc ta plata te ho'on la jca'bate, la apasbe sloc'ombahil winiquetic a soc la awac' aba ta antsinel soc.

¹⁸La amucticlan ta t'ujbil ac'u' apac', soc la awa'be smahtanin te aceite soc te pom cu'une.

¹⁹Ha nix hich te we'elil te la jca'bat, te lequil harina, aceite soc chab te la jmac'linat a, la awac' ta stojolic scuenta sumet yic'; hich ay, xchi te Jehová, te Ajwalil.

²⁰Soc la awic'ticlan te aquerem-nich'nab soc awantsil-nich'nab te la awalataybon, la awa'be ta milbil smahtan scuenta swe'elic. Ma tic'uc la awa'iy a te la awac' aba ta antsinel,

²¹la amilbon te jnich'nab soc la awac'ticlambe te loc'ombahetic scuenta chic'bil mahtanil.

²²Ta spisil bintic ilobtic sba awu'un soc te la awac' aba ta antsinel, ma ba la ana'ix te c'alal alalat, te c'alal watalat soc te awa'tinej ach'ich'el a.

²³¡Ay me awocol! xchi te Jehová, te Ajwalil. Ma ha'uc nax la apas te bin chopol,

²⁴la apasticlan toyol awilaletic soc la apasticlan scajtajib ta chiq'uel mahtaniletic ta jujun plaza.

²⁵Ta jujun xuhc calle la apas toyol awilal soc la ac'atp'un ta bin ilobtic sba te at'ujbilale: la awac' aba ta stojol spisil mach'atic c'axic tey a, bayel p'ohlem te antsinel awu'une.

²⁶La awac' yantsinat te egipciohetic, ha te apat-axuhc te muc' sbaq'uetalic; la awac' ilinucon yu'un te p'ohl te antsinel awu'une.

²⁷Ha yu'un la jach jc'ab ta scontrahinelat soc la jtutubtesbat te bintic ay awu'un. La jcac' te ya spasbat te bin ya sc'an yo'tan te filisteohetic, la sp'ajat soc q'uexawic yu'un te schopolil te awa'tele.

²⁸Soc la awac' aba ta antsinel ta stojol te asiriahetic como ma xc'ax awo'tan yu'une; la awac' aba ta antsinel ta stojolic, pero ha nix hich ma ba c'ax awo'tan yu'un.

²⁹La awac' p'ohluc xan te antsinel awu'un soc te caldehotic, ha te slumal jchombajeletic; ha nix hich ma ba c'ax awo'tan yu'un.

³⁰¡Mero xyal xmo awo'tan! xchi te Jehová, te Ajwalil, te la apas spisil ini, ha te ya'tel j'antsinel-ants te ma xq'uexaw;

³¹la apasticlan toyol awilaletic ta jujun xuhc callehetic soc scajtajib ta chiq'uel mahtaniletic ta spisil te plazahetique. Pero ma hichuc ayat te bin ut'il j'antsinel-ants, como ma ba la ac'ambe stojol.

³²Hich c'ohemat te bin ut'il j'antsinel-ants te ma sc'an te smamalal, ya yic' tal yan winiquetic.

³³Spisil te j'antsinel-antsetic ya x'a'botic stojolic, pero te ha'ate, la awa'be smahtan ta spisil te mach'atic la smulanat. La awa'be mahtaniletic scuenta yu'un hich ya xtalic ta bayuc ta atojol yu'un ya yantsinat.

³⁴Te antsinel awu'un ma pajaluc soc te yantic j'antsinel-antsetic, como mayuc mach'a ya slehat yu'un ya yantsinat, ha'at yac atojticlan, ma ha'uc ya stojat. Ha yu'un te ma pajalucat soc te yantic antsetique.

³⁵Ha yu'un, j'antsinel-ants, a'iybeya awa'iy te sc'op Jehová:

³⁶Hich ya yal te Jehová, te Ajwalil: Te bin ut'il watal c'ohat yu'un te antsinel awu'un soc te chicnaj aq'uexlal ta stojol te mach'atic ya smulanat soc ta stojol te loc'ombahetic awu'un te ilobtic sbahic, soc te la awa'be sch'ich'el te awalataque,

³⁷ha yu'un ya me jtsob spisil te mach'atic la smulanat, te la amulan aba soc, spisil te mach'atic la amulan, soc spisil te mach'atic la ap'aj. Ya jtsob talel ta ajoyobal, soc ta scomon sitic ya jwahtambat abaq'uetal, ya me yilic te watalat.

³⁸Ya jchahpambat hich te bin ut'il ya sc'an j'antsinel-ants soc te mach'a ya smal ch'ich', ya jmalat ta ch'ich' yu'un quilimba soc yu'un xut'et co'tan.

³⁹Ya cac'at ta sc'abic, ya me slajinic te toyol awilaletic awu'un soc ya me sbusq'uinic cohel te scajtajib ta chiq'uel mahtaniletic awu'une. Ya me spojbat ac'u' apac', ya me yich'bat at'ujbil ch'ahlelaletic soc watal ya xhilat yu'unic.

⁴⁰Ya me yic'ticlanic tal tsobol ants-winiquetic te ya sch'ojat ta ton soc ya sesenat ta espada yu'unic.

⁴¹Ya me schic'bat te nahetic awu'un soc ya me yaq'uic castigo ta atojol ta scomon sitic bayel antsetic. Hich ya cac' te ma ba yac awaq'uix aba ta antsinel soc ma ba yac atojix te mach'atic ya smulanate.

⁴²Hich ya xlahmaj a te quilimba ta atojol, ya xloc' ta atojol te xut'et co'tan; ya xlahmaj co'tan, ma ba ya x'ilinonix.

⁴³Te bin ut'il ma ba la ana' te c'alal ach'ixat to a, te la awac' hahchuc quilimba yu'un spisil ini, ha yu'un ya cac' taluc ta atojol te bintic apasoj, xchi te Jehová, te Ajwalil; ni ha'uc la ana' spisil te bintic ilobtic sba awu'une.

⁴⁴Ilawil, spisil te mach'atic ya yalic tsahbil c'opetic, hich ya yalbat ac'oblal ta tsahbil c'op ini: Te bin ut'il ay te nanil, hich ay te yantsil-al, xchihic.

⁴⁵Ha'at yantsil-alat te anan te la sp'aj smamalal soc te yalatac; soc ha'at wixilat yu'un te ihts'inaletic awu'un te la sp'ajic te smamalalic soc te yalataquique. Ha hitita-ants te ananic soc amorreo-winic te atatique.

⁴⁶Te amuc'ul-wix, ha te Samaria soc te yalatac te nahinemic ta stojol norte awu'un; soc te awihts'in ha te Sodoma soc te yalatac te nahinemic ta stojol sur awu'unic.

⁴⁷Ma ha'uc nax at'unoj te behetic yu'unic soc apasoj te bintic ilobtic sba yu'unic, ma tic'uc la awa'iy a, ora nax c'ax hich chopol la apas a te bin ut'il la spas stuquelic.

⁴⁸Ho'on cuxulon, xchi te Jehová, te Ajwalil, te awihts'in Sodoma soc te yantsil-alatac ma hichuc la spasic te bin ut'il la apas ha'at soc te awantsil-alataque.

⁴⁹Te schopolil te awihts'in Sodoma soc te yantsil-alatac hich ay: ha toybahil, c'ax bayel we'elil, soc sch'ajilal yu'un te ay bayel bintic ay yu'unic; ma ba la scoltayic te pobrehetic soc te mach'atic mayuc bin ay yu'unique.

⁵⁰Nojel ta toybahil soc la spasic te bintic ilobtic sba ta jtojol; c'alal hich la jquil, la jloq'ueslan.

⁵¹Pero te smul te Samaria ma sta j'ohlil te mulil awu'une; c'ax hich p'ohl awu'un te bintic ilobtic sba te bin ut'il te Samaria, soc ta scaj spisil te bintic ilobtic sba apasoj, hich yilel te ha toj yo'tanic te awihts'inabe.

⁵²Ha'at te la awich'o-c'opin awihts'inab, ich'a te q'uexlal awu'un yu'un te muliletic apasoj, te c'ax hich ilobtic sba a te bin ut'il te yu'une. ¡C'ax toj xan ayic a te bin ut'ilat! Ha yu'un hich nix te ha'ate, ac'a cuhchuc awu'un pehc'anel, como mayuc smul yilel awu'un te awihts'inabe.

⁵³Ya ca'be xan te yutsil slequil, ha te yutsil slequil te Sodoma soc te yantsil-alatac, soc te yutsil slequil te Samaria soc te yantsil-alatac, soc ha nix hich ya ca'bat xan te awutsil alequil,

⁵⁴scuenta yu'un ya xc'oht ta atojol pehc'anel soc te ya xq'uexawat yu'un spisil te bintic apasoj, te bin ut'il stahojic smuc'ul yo'tanic ta acuenta.

⁵⁵Te awihts'inab, ha te Sodoma soc te yantsil-alatac soc te Samaria soc te yantsil-alatac, ya xcha'c'ohtic xan te bin ut'il ayic ta nahil to. Ha nix hichat soc te awantsil-alatac hich ya xcha'c'ohex xan te bin ut'il ayex ta nahil to.

⁵⁶Ta yorahil te toybahil awu'un ni ma ba loc' ta awe' te sbihil te awihts'in Sodoma,

⁵⁷te c'alal ma to ba chicnajem a te achopolile. Yo'tic yac awich' tse'layel yu'un te yantsil-nich'nab Siria[4] soc spisil te yantsil-nich'nab te filisteohetic, spisil te mach'atic ay ta ajoyobal te ya sp'ajate.

⁵⁸Ya me xcuhch awu'un te castigo yu'un te bin chopol apasoj soc te bintic ilobtic sba awu'une, xchi te Jehová.

⁵⁹Pero ay yan bin yaloj te Jehová, te Ajwalil: Ya ca'bat te bin ya sc'an pasel ta atojol, como la ap'aj te bin halbil ta jamal, te bin ut'il la ajin te chapbil-c'ope.

⁶⁰Pero ya me jna' te chapbil-c'op te la jpas ta atojol te c'alal alalat to a, soc ya jpas chapbil-c'op soc ha'at te sbahtel q'uinal ay.

⁶¹Hich me yac ana' a bintic la apas soc ya me xq'uexawat c'alal ya ca'bat scuenta awantsil-alatac te awihts'inab soc awixiltac, pero ma ha'uc ta scuenta te chapbil-c'op awu'un,

⁶²ha ta scuenta te chapbil-c'op ya jchahp soc ha'at; hich me yac ana' a te ho'on Jehovahon,

⁶³scuenta yu'un ya xtal ta awo'tan soc ya xq'uexawat, soc mayuquix bin ora yac ajam awe ta scaj aq'uexlal, te c'alal ya jpasbat perdón yu'un spisil te bintic apasoj, xchi te Jehová, te Ajwalil.