Read Tzeltal Ezequiel 17 Bible Online

Ezequiel 17 - Tzeltal bible

Ezequiel 17

¹Tal ta jtojol te sc'op Jehová, hich la yal:

²Snich'anat winic, hala te c'op te wocol ta jaq'uel, halbeya sloc'ombahil c'op te sna Israel.

³Hich xawalbe: Hich yaloj te Jehová: Ay jcoht muc'ul jxic, te muc' xic' soc naht sc'uc'umal, bayel sch'ahlel te sc'uc'umal, c'oht ta Líbano, la stsacbe sni' tehc' cedro.

⁴La stuch'be te spuhl ta sni'il, la yich' bahel ta sq'uinal jchombajeletic, la yac' ta jun pueblo yu'un jchombajeletic.

⁵Soc la yich' sbac' ts'unubil te ay ta lum, la sts'un ta lequil lum. La sts'un ta banti ay bayel ha', hich te bin ut'il sauce-te'.

⁶Puhlin, ha sch'oxal ts'usub c'oht te ay bayel sc'abc'ab pero ma ba tohy mohel ta lec; te sc'abc'ab la yac' bahel ta stojol te jxic, c'uhb bahel te slohp' ta ye'tal. Hich muc'ul ts'usubil c'oht, p'ohl spuhl soc la yac' bayel ya'binal.

⁷Ay yan muc'ul jxic, te muc' xic' soc bayel sc'uc'umal. Ilawil, te ts'usubil la yac' bahel slohp' ta stojol, la slim bahel sc'abc'ab ta stojol, tey nix ta banti ts'umbil, scuenta yu'un ya x'a'bot ya'lel yu'un.

⁸Ts'umbil ta lequil lum ta banti ay bayel ha', yu'un ya yac' bayel sc'abc'ab soc bayel sit, scuenta yu'un t'ujbil ts'usubil ya xc'oht.

⁹Hich me xawalbe: Hich yaloj te Jehová: ¿Lec bal ya xc'oht? ¿Ma bal yacuc sbulbe loq'uel slohp' soc yacuc sjimbe te sit te hich ya xtaquij? Spisil te yuhninal spuhl ya xtaquij; ma sc'an bayel yip o tsobol winiquetic yu'un ya yich' bulel ta slohp'.

¹⁰Ilawil, ts'umbilix: ¿Lec bal ya xc'oht? ¿Ma bal spisiluc ya xtaquij c'alal ya xmajot ta ic' te ya xtal ta stojol sloq'uib c'ahc'al? ¡Tey nix ta banti ts'umbil ya xtaquij! xchi.

¹¹Tal ta jtojol te sc'op Jehová, hich la yal:

¹²Halbeya te toyba pueblo: ¿Ma bal la ana'beyic scuentahil te c'op ini? xchihat. Hich xawalbe: Te ajwalil yu'un Babilonia tal ta Jerusalén, la yic'ticlan bahel ta Babilonia te ajwalil awu'un soc te smohloltac ta a'tel.

¹³Soc la yic' jtuhl te sts'umbal ajwalil, la schap sc'op soc, la yac' te ya yal ta jamal. La yic' bahel te winiquetic te toyol ya'telic ta q'uinal,

¹⁴scuenta yu'un ya xpehc'aj te ban c'alal scuentahinej soc ma xhu' ya xcha'hahchix xan, te ha to teq'uel ya xhil teme ya sch'uhun spasel te chapbil-c'ope.

¹⁵Pero te ajwalil la stoy sba ta stojol, la sticonlan bahel jal c'opetic ta Egipto yu'un ya x'a'bot cawuhetic soc bayel soldadohetic. ¿Lec bal ya xc'oht? ¿Ya bal xhu' ya scoltay sba te mach'a hich ya spase? Te mach'a la sjin te chapbil-c'op ¿ya bal xhu' ya xcol?

¹⁶Ho'on cuxulon, xchi te Jehová te Ajwalil, ya me xcham ta Babilonia, tey ta banti nahinem te ajwalil te otsesot ta ajwalil yu'un, te ha la sp'aj te bin yaloj ta jamal soc te la sjin te chapbil-c'op te la schap soque.

¹⁷Ma ba ya xcoltayot ta guerra yu'un faraón soc te bayel soldadohetic soc bayel winiquetic yu'un, te c'alal ya yich' busanel mohel lum ta ts'ahc soc toyol mohibaletic scuenta yu'un ya yich' milel bayel ants-winiquetic.

¹⁸Te bin ut'il la sp'aj te bin halbil ta jamal soc te la sjin te chapbil-c'op, te bin ut'il la yac' sba ta stojol, pero la spas spisil ini, ma xcol yu'un.

¹⁹Ha yu'un hich yaloj te Jehová te Ajwalil: Ho'on cuxulon, ya cac' c'ohtuc ta sjol te bin la yal ta jamal ta jtojol te la sp'aj, soc te chapbil-c'op cu'un te la sjine.

²⁰Ya jlim bahel ta stojol te yaquil cu'un, tsacbil ya xc'oht yu'un. Ya quic' bahel ta Babilonia, tey ya xc'oht ca'be stoj a te bin ut'il ma junuc yo'tan ta jtojol.

²¹Spisil te mach'atic loq'uic ta ahnel soc spisil te soldadohetic yu'un, ya me xlajic ta espada, soc te mach'atic cuxul ya xhilic ya me yich'ic pucticlanel bahel ta ic'. Ya me ana'ic te ho'on Jehovahon c'opojonix.

²²Hich yaloj te Jehová, te Ajwalil: Ho'on ya jtsacbe spuhl te sni'il te cedro, soc ya jts'un; ya jwac'be te yuhnin puhl ta mero sni'il, ya jts'un ta mero toyol wits.

²³Ya jts'un ta toyol wits yu'un Israel. Ya me yac' sc'abc'ab soc ya me yac' sit, buen t'ujbil cedro ya xc'oht. Spisil ta chahp mutetic ya xnahinic ta ye'tal, ya xnahinic ta yaxinal te sc'abc'abe.

²⁴Spisil te te'etic ta q'uinal ya me sna'ic te ho'on Jehovahon, ya jpehc'an te toyol te' soc ya cac' muc'ubuc te comil te'; ya cac' taquijuc te yaxal te' soc ya cac' cha'yaxubuc te taquin te', xchi.