Read Tzeltal Ezequiel 18 Bible Online

Ezequiel 18 - Tzeltal bible

Ezequiel 18

¹Tal ta jtojol te sc'op Jehová, hich la yal:

²¿Bin ay ta awo'tanic, ha'ex te ayex ta sq'uinal Israel te yac awalic te tsahbil c'op ini: Ya slo'ic pajal ts'usub te me'iltatiletic, te yal-snich'nabic ya sijub yehic yu'un, te xchihe?

³Ho'on cuxulon, xchi te Jehová te Ajwalil, mayuquix bin ora te ya yich'ix xan halel ta Israel te tsahbil c'op ini.

⁴Ho'on cu'un spisil ch'uhlelal: te scuxlejal te me'iltatil soc te scuxlejal te al-nich'anil. Te mach'a ya sta smul, ha me ya xlaj.

⁵Te winic te toj yo'tan, te ya spas te bin stojil,

⁶te ma ba ya xwe' ta witsiltic o ma ba ya stoy mohel sit ta stojol te loc'ombahetic yu'un te sna Israel; te ma ba ya sbohlobtesbe sc'oblal te yihnam te spat-xuhc o ma ba ya sjoquin sba soc ants te c'alal yac ta yilel schamel a;

⁷te mayuc mach'a ya x'uts'inwan, ya sutbe te bin yich'beyej; ma ba ya ya'iy elec', ya ya'be swe'el te mach'a ay swi'nal soc ya ya'be sc'u' te mach'a mayuc sc'u';

⁸ma ba ya sc'ambe sjol te staq'uin te ya yac' ta majanel; ya scom sba ta spasel bin chopol, soc stojil ya schahpan te mach'atic ya stsal sbahic;

⁹ya st'un te mandariletic cu'un, soc ya sch'uhun spasel te halbil mandariletic cu'un scuenta yu'un toj bin ya spas; te winic ini ha toj yo'tan soc ha ya xcuxaj stuquel, xchi te Jehová, te Ajwalil.

¹⁰Pero teme ay snich'an te ya x'elc'aj soc ya smal ch'ich', te ay hich ya spas bin chopole,

¹¹(aunque ma hichuc ya spas stuquel te state), te ya xwe' ta ba witsiltic, ya sbohlobtesbe sc'oblal te yihnam te spat-xuhc,

¹²ya yuts'in te pobre soc te mach'a mayuc bin ay yu'un, ya ya'iy elec' soc ma ba ya sutbe te bin yich'beyej, ya stoy mohel sit ta stojol te loc'ombahetic soc ya spas te bintic ilobtic sba,

¹³ya sc'ambe sjol te staq'uin ya yac' ta majanel; ¿ya bal xcuxaj te winic ini? ¡Ma ba ya xcuxaj! La spasticlan spisil te bintic ilobtic sba ini, ya me xcham; ha nix ta scuenta ya xc'oht te sch'ich'ele.

¹⁴Pero teme ay snich'an te winic ini te ya yil spisil te smul la spas te stat, pero ma hichuc ya spas, aunque la yil,

¹⁵ma ba ya xwe' ta ba witsiltic o ma ba ya stoy mohel sit ta stojol te loc'ombahetic yu'un te sna Israel, ma ba ya sbohlobtesbe sc'oblal te yihnam te spat-xuhc,

¹⁶mayuc mach'a ya x'uts'inwan, ya sutbe te bin yich'beyej, ma ba ya ya'iy elec', ya ya'be swe'el te mach'a ay swi'nal soc ya ya'be sc'u' te mach'a mayuc sc'u',

¹⁷ma ba ya yac' sc'ab ta stojol te pobre,[5] ma ba ya sc'ambe sjol te staq'uin te ya yac' ta majanel, ya sch'uhun spasel te halbil mandariletic cu'un soc ya st'un te leyetic cu'une, te winic ini ma ba ya xcham yu'un te smul te stat, cuxul me ya xhil.

¹⁸Pero te stat, te bin ut'il la ya'iy uts'inwanej, la yelc'ambe sbiluc te yermano soc la spas te bintic ma lecuc ta yohlil te slumale, ha ya xcham yu'un te smule.

¹⁹Teme hich yac ajoc'oyic: ¿Bin yu'un te nich'anil ma ba ya smulimbe smul te stat? teme xchihexe. Melel te nich'anil la spas te bin yich'oj scuentahil soc te bin stojil, la sch'uhun spasel spisil te mandariletic cu'un, ha me ya xcuxaj.

²⁰Te mach'a ya sle smul, ha me ya xcham. Te nich'anil ma ba ya smulimbe smul stat, soc te tatil ma ba ya smulimbe smul te snich'ane; te bin stojil ya spas te mach'a toj yo'tan, ay ta stojol, soc te bin chopol ya spas te jmulawil, ay ta stojol.

²¹Teme ya yihquitay hilel spisil te mulil spasoj te mach'a chopol, teme ya sch'uhun spasel spisil te halbil mandariletic cu'un soc teme ya spas te bin yich'oj scuentahil soc te bin stojil ta pasele, ya me xcuxaj, ma ba ya xcham.

²²Ta spisil te bintic la sc'axuntay ma ba ya xna'otix; ha ya xcuxaj ta scuenta te bin stojil la spas.

²³¿Ya bal jc'an te ya xlaj te mach'a chopol yo'tan? xchi te Jehová, te Ajwalil. ¿Ma bal yacuc jc'an te ya yihquitay hilel te chopol behetic yu'un, te hich ya xcuxaj?

²⁴Pero te mach'a toj yo'tan teme ya yihquitay hilel te bin stojil ya spas, teme ya spas te bin chopol soc ya spas te bintic ilobtic sba te ya spas te mach'a chopol yo'tane, ¿ya bal xcuxaj? ¡Mayuc junuc te bintic stojil spasoj te ya x'ich'bot ta cuenta! Ta scaj te ma junuc yo'tan, ta scaj te mulil spasoj, ya me xlaj yu'un.

²⁵Teme hich yac awalic: Ma stojiluc te be yu'un te Cajwaltic, teme xchihexe, a'iya awa'iy, sna Israel: ¿Ma bal stojiluc te be cu'une? ¿Ma bal ha'uc te ma tojuc te behetic awu'unique?

²⁶Teme ya yihquitay hilel te bin lec ta pasel te mach'a toj yo'tan, teme ya spas te bintic chopole, ya me xlaj yu'un; ya me xlaj yu'un te bin chopol la spase.

²⁷Pero teme ya yihquitay hilel te bin chopol la spas te mach'a chopol yo'tan, teme ya spas te bintic yich'oj scuentahil soc te bin stojil ta pasele, ya me yac' te ya xcuxaj.

²⁸Como la yil soc la yihquitay hilel spisil te bintic la sc'axuntay, ya me xcuxaj, ma ba ya xlaj.

²⁹Teme ya to yalic te sna Israel: Ma stojiluc te be yu'un te Cajwaltic, teme xchihique, ¿ma bal stojiluc te behetic cu'un, sna Israel? ¡Ma stojiluc te behetic awu'unic te ha'axe!

³⁰Ha yu'un, snahex Israel, ya jchahpanex ta tuhlultuhl, ha chican te behetic awu'unic, xchi te Jehová, te Ajwalil. Suhtesa awo'tanic, ihquitayahic hilel spisil te c'axuntayel mandar awu'unic, scuenta yu'un ma ba ya sjinex te bin chopole.

³¹Ch'oja bahel spisil te bintic ac'axuntayejic te la atahic mulil yu'une, pasahic ta yach'il te awo'tanic soc yach'il espíritu awu'unic. ¿Bin yu'un ya xlajat, pueblo Israel?

³²Como ma jc'an te ay mach'a ya xlaj. Suhtesa awo'tanic, hich ya xcuxajex, xchi te Jehová, te Ajwalil.