Read Tzeltal Ezequiel 19 Bible Online

Ezequiel 19 - Tzeltal bible

Ezequiel 19

¹Hacha c'ayoj scuenta oq'uel ta stojol te príncipaletic yu'un Israel.

²Hich me xawal: ¡Mero muc' c'oht te anan, ha te me' choj, ta yohlil te chojetic! La smehtsan sba ta yohlil te bic'tal chojetic, la scoltes te yalataque.

³Ay jcoht te la scoltes, ha jcolel choj c'oht, la snop stsaquel swe'el soc sti'el winiquetic.

⁴Te nacionetic la ya'iybe sc'oblal; tsacot ta yaquil yu'unic, chucbil ta gancho a la yiq'uic bahel ta sq'uinal Egipto.

⁵C'alal la yil te me' choj te c'ax bayel la smahliy, te ch'ay te bin yac smahliybel, la yic' tal yan yal, la yac' te jcolel choj ya xc'oht.

⁶Ha behen ta yohlil te chojetic; jcolel choj c'oht, la snop stsaquel swe'el, la sti' winiquetic.

⁷La sjinticlan cohel te ahnibal ts'ahquetic soc la sjinticlan te pueblohetic yu'unique. Te q'uinal soc te bintic ay tey a bayel xiwic yu'un te yaw.

⁸Te nacionetic ta jsehp q'uinaletic ta sjoyobal hahch scontrahinic; la slimbeyic syacol, la yich' tsaquel ta hotbil lum yu'unic.

⁹Ta ganchohetic la yotsesic ta smacojibal, la yiq'uic bahel ta stojol te ajwalil yu'un Babilonia. Chucul a la yiq'uic bahel, scuenta yu'un ma x'a'iybotic yaw ta witsiltic yu'un Israel.

¹⁰Te anan pajal soc ts'usubil te ts'umbil ta yohlil ts'usubil ta ti' ha', la yac' sit soc ay bayel sc'abc'ab ta scaj te bayel ha'.

¹¹Ay tulan ste'el te tuhun yu'un bastón yu'un ajwaliletic; toyol c'oht ta sba te sc'abc'ab, chican ta scaj te toyol ay soc te ay bayel sc'abc'ab.

¹²Pero la yich' bulel ta scuenta ilimba, la yich' ch'ojel ta lum. Taquijtesot yu'un te ic' ta stojol banti ya xloc' tal c'ahc'al, la yich' wac'ticlanel te tulan sc'abc'ab, taquijic soc laj ta c'ahq'uel.

¹³Ta ora ini ts'umbilix ta jochol taquin q'uinal, ta mero taquin q'uinal.

¹⁴Loc' c'ahc' ta sch'oxal te sc'abc'ab te la slajimbe te site; mayuquix hil tulan ste'el te ya xtuhun yu'un sbastón ajwalil, xchi. (Ha c'ayoj scuenta oq'uel ini, ya xtuhun scuenta c'ayoj yu'un oq'uel.)