Read Tzeltal Ezequiel 20 Bible Online

Ezequiel 20 - Tzeltal bible

Ezequiel 20

¹Ta slajunebal c'ahc'al yu'un te yo'ebal u ta shuquebal ha'bil, tal mamaletic yu'un Israel yu'un ay bin tal sjoc'obe Jehová, c'oht shuhcan sbahic ta jtojol.

²Tal ta jtojol te sc'op Jehová, hich la yal:

³Snich'anat winic, c'opona te mamaletic yu'un Israel, hich me xawalbe: Hich yaloj te Jehová te Ajwalil: ¿Ay bal bin tal ajoc'obonic? Ho'on cuxulon, ma ba ya jac'beyex, xchi te Jehová, te Ajwalil.

⁴¿Ya bal achahpanlan, ha'at? ¿Ya bal achahpanlan, snich'anat winic? A'beya sna'ic te bin ilobtic sba spasojic te sme'statique,

⁵hich xawalbe: Hich yaloj te Jehová, te Ajwalil: Te bin ora la jtsa te Israel, la jach jc'ab yu'un ay bin la jcal ta jamal ta stojol te sts'umbal te sna Jacob, te c'alal la jcac' jba ta na'el ta stojolic ta Egipto. La jach jc'ab, hich la jcal ta jamal ta stojolic: Ho'on Jehovahon, Dioson awu'unic.

⁶Te bin ora la jach jc'ab, te la jcal jba ta jamal te ya quic'ticlan loq'uel tal ta sq'uinal Egipto yu'un ya xbahtic ta q'uinal te tsahbil cu'un, ha te q'uinal banti ya x'oquin leche soc chab soc c'ax hich t'ujbil a te bin ut'il spisil q'uinaletic,

⁷ta hich ora hich la jcalbe: Ta jujutuhl ya me ach'ojic bahel te bintic ilobtic sba te ayic ta atojolic, soc ma me xabohlobtes abahic ta scuenta te loc'ombahetic yu'un Egipto. Ho'on Jehovahon, Dioson awu'unic, xchihon.

⁸Pero la stoy sbahic ta jtojol, ma ba la sc'an la ya'iybonic jc'op; ma ba la sch'ojic bahel te bintic ilobtic sba te ayic ta stojolic soc ma ba la yihquitayic hilel te loc'ombahetic yu'un Egipto. Ha yu'un la jcal te ya jmal cohel quilimba ta stojolic, hich ya sts'acay te sc'ahc'al co'tan ta stojolic ta sq'uinal Egipto.

⁹Pero ta scuenta yich'el ta muc' te jbihile, scuenta yu'un ma ba ya xbohlob sc'oblal te jbihil ta stojol te nacionetic te banti nahinemic ta yohlilic, te banti la jcac' jba ta na'ele, ay bin la jpas yu'un ya jloq'uesic tal ta sq'uinal Egipto.

¹⁰Hich la jloq'ues tal ta sq'uinal Egipto, la jquic'ticlan bahel ta jochol taquin q'uinal.

¹¹La jca'be te halbil mandariletic cu'un soc la jca'be sna'ic te leyetic cu'un, te ha ta scuentahic te ya xcuxajic te mach'atic ya sch'uhunique.

¹²Soc la jca'be te sc'ahc'alel cux-o'tan cu'un scuenta seña ya xc'oht ta jtojol soc ta stojolic, scuenta yu'un ya sna'ic te ho'on Jehovahon ya jch'ultesic.

¹³Pero la stoy sbahic ta jtojol ta jochol taquin q'uinal te sna Israel; ma ba la st'unic te mandariletic cu'un soc la sp'ajic te leyetic cu'un te ha ta scuentahic te ya xcuxajic te mach'atic ya sch'uhunique; soc jc'axel la sbohlobtesbonic sc'oblal te sc'ahc'alel cux-o'tan cu'une. Ha yu'un la jcal te ya jmal cohel quilimba ta stojolic ta jochol q'uinal yu'un ya jlajinlan.

¹⁴Pero ay bin la jpas ta scuenta yich'el ta cuenta te jbihile, scuenta yu'un ma ba ya xbohlob sc'oblal ta stojol te nacionetic te la yilic bin ut'il la jloq'uesic tal ta Egipto.

¹⁵Ha nix hich la jach jc'ab ta jochol taquin q'uinal, la jcalbe ta jamal te ma ba ya cac'ticlan ochel ta q'uinal te ca'beyejic, ha te q'uinal banti ya x'oquin leche soc chab soc c'ax hich t'ujbil a te bin ut'il spisil q'uinaletic,

¹⁶como la sp'ajic te mandariletic cu'un, ma ba la st'unic te chahpambil mandariletic cu'un, soc la sbohlobtesbonic sc'oblal te sc'ahc'alel cux-o'tan cu'un, como baht yo'tanic ta stojol te loc'ombahetic yu'unique.

¹⁷Pero la jna'be yo'bolil sbahic, ma ba la jmilticlan, ma ba la jlajinic ta jc'axel ta jochol taquin q'uinal.

¹⁸Hich la jcalbe te yal-snich'nabic ta jochol taquin q'uinal: Ma me xat'unic te halbil mandariletic yu'un te ame'atatic, ma me xach'uhunic spasel te leyetic yu'unic, soc ma me xabohlobtes abahic ta scuenta te loc'ombahetic yu'unique.

¹⁹Ho'on Jehovahon, Dioson awu'unic; t'unahic te halbil mandariletic cu'un, ch'uhunahic spasel te chapbil mandariletic cu'une.

²⁰Ch'ultesahic te sc'ahc'alel cux-o'tan cu'un, scuenta yu'un ha seña ya xc'oht ta jtojol soc ta atojolic, scuenta yu'un yac ana'ic te ho'on Jehovahon, Dioson awu'unic, xchihon.

²¹Pero te yal-snich'nabic la stoy sbahic ta jtojol; ma ba la st'unic te chahpambil mandariletic cu'un soc ma ba la sch'uhunic spasel te halbil mandariletic cu'un te ha ta scuentahic ya xcuxajic te mach'atic ya sch'uhunique; soc la sbohlobtesbe sc'oblal te sc'ahc'alel cux-o'tan. Ha yu'un la jnop ta co'tan te ya jmal cohel ta stojolic te quilimba, scuenta yu'un hich ya xlahmaj a te sc'ahc'al co'tan ta jochol taquin q'uinal.

²²Pero la jcom jc'ab ta scaj yich'el ta muc' te jbihile, scuenta yu'un ma ba ya xbohlob sc'oblal ta stojol te nacionetic te la yilic la jloq'uesic tal ta Egipto.

²³Soc la jach jc'ab ta jochol taquin q'uinal, la jcalbe ta jamal te ya jpucticlan bahel ta yohlil te nacionetic soc ta yohlil te q'uinaletic,

²⁴como ma ba la spasbonic te halbil mandariletic cu'un, la sp'ajic te chahpambil mandariletic cu'un soc la sbohlobtesbonic sc'oblal te sc'ahc'alel cux-o'tan cu'un, soc baht sitic ta stojol te loc'ombahetic yu'un te sme'statique.

²⁵Ha yu'un la jc'abe yantic mandariletic te ma lecuc soc halbil mandariletic te ma xhu' ya sta scuxlejalic yu'une.

²⁶La jbohlobtesbe sc'oblalic ta scuenta te mahtaniletic yu'unic, ha te c'alal la sc'asesic ta c'ahc' te ba-alaletic yu'unic, scuenta yu'un ya jnojesbe yo'tanic ta xiwel soc ya ca'be sna'ic te ho'on Jehovahon.

²⁷Ha yu'un, snich'anat winic, hich xawalbe te sna Israel: Hich yaloj te Jehová, te Ajwalil: Ha nix hich te ame'atatic la stahbon co'tan te c'alal ma junuc yo'tanic la yac' sbahic ta jtojol.

²⁸Como te c'alal la jcac' te ya x'ochic ta q'uinal te la jcal ta jamal te ya ca'beyic, la yilic toyol tsehletic o te'etic te ay bayel ya'binal, tey la yaq'uic a te milbil mahtaniletic yu'unic, tey la yaq'uic a mahtaniletic te la shahchbon quilimba; tey la yaq'uic a bintic sumet yic' soc tey la smalic a te malbil mahtaniletic yu'unique.

²⁹Hich la joc'obeyic: ¿Bin a te toyol awilal ini te banti ya xbahexe? xchihon. Hich a'bot sbihil Bama[6] c'alal ora.

³⁰Ha yu'un hich xawalbe te sna Israel: Hich yaloj te Jehová: ¿Ma bal hichuc yac abohlobtes abahic te bin ut'il ame'atatic soc yac awac' abahic ta antsinel ta stojol te bintic ilobtic sba yu'unique?

³¹Como te c'alal yac awac' te mahtaniletic awu'unic, ha te yac ac'ases ta c'ahc' te awal-anich'nabic, la abohlobtes abahic ta scuenta spisil te loc'ombahetic awu'unic c'alal ora. ¿Ya bal sc'an te ya jac'beyex ac'opic, ha'ex sna Israel? ¡Ho'on cuxulon, xchi te Jehová te Ajwalil, ma ba ya jac'beyex!

³²Ma ba ya xc'oht ta pasel te bin la anopic. Como hich yac awalic: Hich ya jc'antic te pajalotic soc te nacionetic, te pajalotic soc te yantic pueblohetic ta q'uinal, te ya sch'uhuntayic te' soc ton, xchihex.

³³Ho'on cuxulon, xchi te Jehová, te Ajwalil, ya jcuentahinex ta scuenta yip jc'ab soc te hachbil jc'ab, soc ta scuenta quilimba.

³⁴Ya jloq'uesex tal ta yohlil te pueblohetic soc ya jtsobex tal ta q'uinaletic te banti puhquemex bahel ta scuenta yip jc'ab soc te hachbil jc'ab soc ta scuenta sc'ahc'al te quilimba;

³⁵ya quiq'uex bahel ta jochol taquin q'uinal yu'un te pueblohetic, tey ya quich'ex ta c'op a c'alal ya jsitin jbahtic ta c'op.

³⁶Hich te bin ut'il la jquich' ta c'op te ame'atatic ta jochol taquin q'uinal yu'un Egipto, hich nix ya quich'ex ta c'op, xchi te Jehová, te Ajwalil.

³⁷Ya cac' te ya xc'axex ta ye'tal te bastón, soc ya cac' ya x'ochex ta chucojibal yu'un te chapbil-c'op cu'une;

³⁸ya jloq'uesbeyex ta awohlilic te jtoybahetic soc te mach'atic la stoy sbahic ta jtojol; ya jloq'ueslan ta q'uinal banti c'axel nax ayic, pero ma ba ya x'ochic bahel ta sq'uinal Israel. Ya me ana'ic te ho'on Jehovahon.

³⁹Soc te ha'ex, snahex Israel, hich yaloj te Jehová: ¡Jujutuhlex, t'unahic te loc'ombahetic awu'unic yu'un yac awac' abahic ta stojolic, teme ma xac'an yac ach'uhumbonic te jc'ope; pero ma me ba yac abohlobtesbeyiquix sc'oblal te jch'ul bihil ta scuenta te mahtaniletic soc te loc'ombahetic awu'unique!

⁴⁰Pero ta ch'ul wits cu'un, ta toyol wits yu'un Israel, xchi te Jehová, te Ajwalil, tey me ya yac' sbahic ta a'batinel cu'un te sna Israel, spisil te mach'atic ayic ta q'uinal; tey lec ya xc'ohtic ta jtojol a, soc tey ya jc'ambeyex a te mahtaniletic soc te sba sit te mahtaniletic awu'unic, soc spisil te bintic ch'ultesbil awu'unique.

⁴¹Lec ya xc'ohex ta jtojol hich te bin ut'il pom te sumet yic', te c'alal ya jloq'uesex tal ta yohlil te pueblohetic, te c'alal ya jtsobex tal ta q'uinaletic te banti puhquemex bahele; soc ya cac' ta ilel ta stojol te nacionetic te ho'on Ch'ul Dioson ta awohlilic.

⁴²Ya me ana'ic ta ho'on Jehovahon te c'alal ya caq'uex ochel ta sq'uinal Israel, te q'uinal te la jach jc'ab yu'un soc la jcal ta jamal te ya ca'be te ame'atatique.

⁴³Tey yac ana'ic a te behetic awu'unic soc spisil bintic la apasic te la abohlobtes abahic a; ya me ap'aj abahic ta scaj spisil amulic te la apasique.

⁴⁴Ya me ana'ic te ho'on Jehovahon, te c'alal ta scuenta yich'el ta muc' te jbihil ma ba hich ya jpasbeyex te bin ut'il ya sc'an te chopol behetic soc te chopol a'teliletic awu'unic, ha'ex snahex Israel, xchi te Jehová, te Ajwalil.

⁴⁵Tal ta jtojol te sc'op Jehová, hich la yal:

⁴⁶Snich'anat winic, ac'a asit awelaw ta stojol sur, c'opojan bahel ta stojol sur, hala sc'op-jalwanej ta scontrahinel te tohyem te'etic ta Neguev.

⁴⁷Hich xawalbe te tohyem te'etic ta Neguev: A'iya awa'iy te sc'op Jehová: Hich yaloj te Jehová, te Ajwalil: Ya jtsumbat ac'ahc'al te ya slajimbat spisil te yaxal te'etic soc taquin te'etic te ay ta awohlil. Ma ba ya xtup' te c'ahq'ue, ya me schic'be sit yelaw spisilic c'alal ta norte c'alal ta sur.

⁴⁸Spisil bintic cuxajtic ya me yilic te ho'on Jehovahon la jtsumbe sc'ahc'al, soc ma ba ya xtup', xchi.

⁴⁹Hich la jcal ¡Ay, Cajwal Jehová! hich ya yalbonic jc'oblal: ¿Ma bal ha'uc nax sloc'omba c'op yac ta yalel? xchihic.