Read Tzeltal Ezequiel 21 Bible Online

Ezequiel 21 - Tzeltal bible

Ezequiel 21

¹Tal ta jtojol te sc'op Jehová, hich la yal:

²Snich'an winic, ac'a asit awelaw ta stojol Jerusalén, c'opojan ta stojol te ch'ul awilal soc hala sc'op-jalwanej ta scontrahinel te sq'uinal Israel.

³Hich xawalbe te sq'uinal Israel: Hich yaloj te Jehová: Ilawil, ho'on ya jcontrahinat, ya jloq'ues te espada cu'un ta sna, ya jboj loq'uel ta awohlil te mach'a toj yo'tan soc te mach'a chopol yo'tan.

⁴Te bin ut'il ya sc'an te ya jboj loq'uel ta awohlil te mach'a toj yo'tan soc te mach'a chopol yo'tan, ha yu'un ya xloc' ta sna te espada cu'un, ya scontrahin spisil bintic cuxajtic c'alal ta sur c'alal ta norte.

⁵Spisil bintic cuxajtic ya me sna'ic te ho'on Jehovahon la jloq'ues te espada cu'un ta sna; ma ba ya cotsesix xan, xchihat.

⁶Ha'at, snich'anat winic, ahcanajan soc sc'uxul wocol soc pich'il awo'tan ta stojolic.

⁷Te c'alal hich ya sjoc'obat: ¿Bin yu'un ya x'ahcanajat? te xchihique, hich yac awal: Ta scaj te c'op te ya xtale. C'alal ya xtal ya xlaj yip spisil yo'tanic soc ya xlaj yip spisil sc'abic, spisil ya me smel yo'tanic yu'un soc ya xlaj yip sjol yacanic hich te bin ut'il ha'. Ya xtalix, ya xc'ohtix ta pasel, xchi te Jehová, te Ajwalil.

⁸Tal ta jtojol te sc'op Jehová, hich la yal:

⁹Snich'anat winic, hala sc'op-jalwanej, hich yac awal: Hich yaloj te Jehová, te Ajwalil: ¡Te espada, te espada huxbilix ye, soc ch'ulbilix!

¹⁰Huxbilix yu'un ya ya'iy milaw, ch'ulbilix yu'un ya xtihl. ¿Ya bal sc'an te ay stse'elil co'tantic, te c'alal mayuc scuentahil c'oht te sbastón te jnich'an hich te bin ut'il biluc te'il?

¹¹Te espada ac'bil ta ch'ulel yu'un ya yich' tsaquel; huxbilix te espada soc ch'ulbilix yu'un ya yich' a'beyel ta sc'ab te jmilawe.

¹²Snich'anat winic, awonan soc oc'an, como ha sc'oblal te pueblo cu'un, ha sc'oblal spisil te jcuentahinwanejetic yu'un Israel: pajal ya xyahlic ta espada soc te pueblo cu'une. ¡Majulana awa' yu'un!

¹³Como ha tsajel; pero ¿bin ut'il ay a teme ya sp'aj te bastón te espadahe? Mayuquix bastón abi, xchi te Jehová te Ajwalil.[7]

¹⁴Ha'at, snich'anat winic, hala sc'op-jalwanej soc pac'a ac'ab. Ac'a yac' ehchen cheb buelta, oxeb buelta te espada yu'un milel; ha espada yu'un miltamba, te ya slowilan ta bayuc,

¹⁵scuenta yu'un ya xlaj yip yo'tan soc ya xlaj bayelic. Ta spisil te ochibaletic yu'unic cac'oj xiwel yu'un te espada. ¡Ah! chapalix yu'un ya xtihl soc chapalix yu'un ya xmilawan.

¹⁶¡Boja ta wa'el, ehchentesa ta q'uexam, bayuc ya xbahat!

¹⁷Ha nix hichon ya jpac' jc'ab, ya cac' lahmajuc te quilimba. Ho'on, Jehovahon, calojix, xchi.

¹⁸Tal ta jtojol te sc'op Jehová, hich la yal:

¹⁹Ha'at, snich'anat winic, pasa seña cheb be te banti ya xtal te espada yu'un te ajwalil yu'un Babilonia; tey ya xloc' schebal ta junax q'uinal. Soc pasbeya seña ta shahchibal te jujuch'ix be te ya yac' ta na'el te pueblo banti ya xbahte.

²⁰Ya me apasbe seña te be te banti ya xtal te espada ta stojol Rabá yu'un te amonetic, soc ta stojol Judá, ta scontrahinel Jerusalén, te pueblo te ay sts'ahcule.

²¹Como te ajwalil yu'un Babilonia ya stehc'an sba ta jet-be, ta shahchibal te cheb be, yu'un ya stuhun jna'ojel; la slihlin te a'tejibaletic yu'un t'ihmalte', la sjoc'obe te loc'ombahetic yu'une, soc la yilbe sehcub chambahlam.

²²Te jna'ojel la yac' ta na'el te swa'el-c'ab, ha te Jerusalén, yu'un ya yal mandar te ya me xhahch ya'be guerra, yu'un ya xhahch te miltamba, yu'un ya xtohy aw yu'un guerra, yu'un ya schahpan a'tejibaletic yu'un sjinel te ochibaletic, yu'un ya spas mohel but'bil lum soc smohibaletic te sts'ahcule.

²³Pero te mach'atic ayic ta Jerusalén ya me scuyic ta lotil jna'ojel, como schapoj sc'opic soc te ajwalil; pero ha ya ya'be sna'ic te schopolilic, yu'un hich ya schucticlan.

²⁴Ha yu'un hich yaloj te Jehová, te Ajwalil: Te bin ut'il la ana'ic te bintic chopol awu'unic, te la awaq'uic ta ilel te c'axun-mandar awu'unic, te chicnaj amulic ta spisil awa'telique; te bin ut'il hich la apasic, ya x'ac'otex ta sc'ab.

²⁵Ha'at ajwalilat yu'un Israel te chopolat soc bohloben ac'oblal, te la stahix aworahil te yac awich' te castigo scuenta slajibal,

²⁶hich yaloj te Jehová, te Ajwalil: ¡Loq'uesbeya te spohtsil sjol, loq'uesa te corona! ¡Ma hichuc ya xc'oht te bin ut'il ay ta nahil to! Te mach'a peq'uel, ya xtohybot sc'oblal, soc te mach'a toyol, ya xpehc'ambot sc'oblal.

²⁷¡Jimbilix, jimbilix, jimbilix ya xc'oht cu'un, ma hichuc ya xc'oht ta pasel ha to c'alal ya xtal te mach'a ha nix ay ta scuenta, ho'on ya ca'be ta sc'ab! xchi.

²⁸Ha'at, snich'anat winic, hich me xawal ta sc'op-jalwanej: Hich yaloj te Jehová, te Ajwalil, sc'oblal te amonetic soc te ixta'c'optayel yu'unique; hich yac awal: ¡Te espada, te espada te loq'uemix ta sna, ch'ulbilix yu'un ts'ayts'on a ya xmilawan!

²⁹Ya yalbat sc'op-jalwanej te ma meleluc, ya yalbat lotil jna'ojel, pero te espada ya xc'oht ta snuc' te mach'atic chopolic te ya x'ac'otic ta lajel, te c'ohtix yorahil te castigo scuenta slajibal.

³⁰Cha'otsesa te espada ta sna. Ta banti la awich' pastayel, ta q'uinal banti hahchemat talel, tey ya jchahpanat a

³¹soc ya jmal cohel quilimba ta atojol; ya cac' tihluc ta atojol te sc'ahc'al te quilimba soc ya cac'at ta sc'ab j'uts'inwanejetic, te ya sna'ic ta lec jinaw.

³²Ac ya xc'ohat yu'un c'ahc', ya x'oquin ach'ich'el ta lum; ma xna'botatix, como c'opojonix, ho'on Jehovahon, xchi.