Read Tzeltal Ezequiel 22 Bible Online

Ezequiel 22 - Tzeltal bible

Ezequiel 22

¹Tal ta jtojol te s'cop Jehová, hich la yal:

²Ha'at, snich'anat winic, ¿ma bal yacuc achahpan, ma bal yacuc achahpan te pueblo te smaloj ch'ich' soc yac awa'be spisil te bintic ilobtic sba spasoje?

³Hich me xawalbe: Hich yaloj te Jehová, te Ajwalil: ¡Ha pueblo te ya smal ch'ich' ta yohlil nix, te hich ya yac' taluc yorahil, soc ya sbohlobtes sba yu'un te ya spasticlan loc'ombahetic!

⁴La ata amul yu'un te ch'ich' amaloj soc la abohlobtes aba yu'un te loc'ambahetic te la apase; la awac' nohpojuc aworahil soc la awac' c'ohtuc yorahil te slajibal c'ahc'al awu'unique. Ha yu'un la jcac' te yac awich' bohlc'optayel yu'un te nacionetic, soc te yac awich' tse'layel yu'un spisil te q'uinaletique.

⁵Te mach'atic nopol ayic soc te mach'atic namal ayic ta atojol ya me stse'layat, ha'at te jimbil ac'oblal soc te ma xana' banti ya xbahat.

⁶Ilawil, te jcuentahinwanejetic yu'un Israel ya yo'tantayic smalel ch'ich', chican ban c'alal ay yipic ta spasel.

⁷P'ajbilic te me'iltatiletic ta awohlil; ya yuts'inic te jyanlumetic ta awohlil, soc ma ba toj bin ya spasbeyic te me'ba' alaletic soc me'ba' antsetique.

⁸La ap'ajic te bintic ch'ultesbil cu'un soc la abohlobtesbe sc'oblal te sc'ahc'alel cux-o'tan cu'une.

⁹Ay ta awohlil jle-muliletic te la smalic ch'ich'; ay ta awohlil te mach'atic we'ic ta ba witsetic soc te la spasic te bintic ilobtic sbahe.

¹⁰Ay ta awohlil mach'atic wayic soc yihnam stat, ay mach'atic la yuts'in antsetic te c'alal yac yilbel schamelic.

¹¹Ay mach'atic la spasic te bin ilobtic sba soc te yihnam spat-xuhc, ay mach'atic la yantsin yalib te mero q'uexlaltic sba, ay mach'a la yuts'in te yihts'in, ha te yantsil-nich'an te state.

¹²Tey ta awohlil ay mach'atic la yich'ic taq'uin yu'un smalel ch'ich'; la ac'ambe sjol ataq'uin soc ma stojiluc la awac' ta majanel taq'uin, la awuts'in ta elc'anel te apat-axuhque. ¡Ch'ayonix ta awo'tanic! xchi te Jehová, te Ajwalil.

¹³La jpac' jc'ab yu'un te bintic ay awu'un te ma stojiluc la ata soc yu'un te ch'ich' la amal ta awohlile.

¹⁴¿Ay bal yip awo'tan soc ay bal yip ac'ab te bin ora ya jcontrahinat? Ho'on Jehovahon, c'opojonix, ya me cac' c'ohtuc ta pasel.

¹⁵Ya jpuquex bahel ta yohlil te nacionetic, ya jpuquex bahel ta yantic q'uinaletic, soc ya jloq'ues ta awohlil te bohlobtesel awu'une.

¹⁶Ha'at nix ta acuenta te ya xbohlob ac'oblal ta stojol te nacionetique. Ya me ana'ic te ho'on Jehovahon, xchi.

¹⁷Tal ta jtojol te sc'op Jehová, hich la yal:

¹⁸Snich'anat winic, te sna Israel hich ay ta jtojol te bin ut'il ya'baquil taq'uin; spisilic pajal soc bronce, estaño, hierro soc plomo te hilem ta horno; ha ya'baquil plata c'ohemic.

¹⁹Ha yu'un, hich yaloj te Jehová, te Ajwalil: Te bin ut'il apisilic c'atp'ujemex ta tsahben, ya jtsobex ta yohlil Jerusalén.

²⁰Hich te bin ut'il ya yich' tsobel ta horno te plata, bronce, hierro, plomo soc estaño yu'un ya x'a'bot sc'ahc'al yu'un ya yich' uhltesel, hich nix ya jtsobex ta scuenta quilimba soc sc'ahc'al co'tan. Ya cotsesex tey a soc ya cultesex.

²¹Ya jtsobex soc ya ju'xiyex ta sc'ahc'al co'tan, tey ya x'uhlex a.

²²Hich te bin ut'il ya x'uhl plata ta horno, hich nix ya x'uhlex ta yohlil te pueblo. Hich me yac ana'ic a te ho'on Jehovahon la jmalix cohel quilimba ta atojolic, xchi.

²³Tal ta jtojol te sc'op Jehová, hich la yal:

²⁴Snich'an winic, halbeya te q'uinal: Ma lequil q'uinalucat soc ma ba liliha'taybilat ta ha'al ta sc'ahc'al ilinel.

²⁵Te jalwanejetic ta awohlil ya schapbe sc'oblal milel, hich te bin ut'il choj te xhihet ta stsaquel swe'el. La slajimbeyic scuxlejalic ants-winiquetic, la yich'ic c'ulejaliletic soc yantic bintic t'ujbilic; soc la yaq'uic p'ohluc me'ba' tey a.

²⁶Te sacerdotehetic yu'un la yuts'inic te Ley cu'un soc la sbohlobtesbonic te bintic ch'ultesbil cu'une; pajal c'ohem yu'unic te bin ch'ultesbil soc te bin ma ch'ultesbiluc, pajal c'ohem yu'unic te bin lec sc'oblal soc te bin bohloben sc'oblal. Mayuc sc'oblal c'oht ta stojolic te sc'ahc'alel cux-o'tan cu'un, soc bohlob jc'oblal ta yohlilic.

²⁷Te príncipaletic yu'unic hich c'ohemic te bin ut'il ha'mal ts'i'etic te ya stuch'ticlan swe'elic; ya smalic ch'ich' soc ya slajinic cuxlejaliletic scuenta yu'un ma stojiluc ay bin ya stahic a.

²⁸Te jalwanejetic yu'unic ya sbonic pahc' ta tan, ha te ya yalic sc'op-jalwanej te mayuc sc'oblal soc ya yalbeyic lotil jna'ojel, hich ya yalic: Hich yaloj te Jehová, te Ajwalil, xchihic, pero mayuc bin yaloj te Jehová.

²⁹Te swinquilel te q'uinal ya x'uts'inwanic soc ya x'elc'ajic; ya yuts'inic te mach'atic ay swocolic soc te mach'atic mayuc bin ay yu'unic, soc ya yuts'inic te jyanlumetic, ma stojiluc ya schahpanic.

³⁰La jle ta yohlilic mach'a ya spas ts'ahc soc te ya stehc'an sba ta jtojol te banti jamal te ts'ahc yu'un ya xc'opoj yu'un te q'uinal scuenta yu'un ma ba ya jlajin; pero mayuc mach'a la jta.

³¹Ha yu'un la jmal cohel quilimba ta stojolic. La jlajinlan ta scuenta sc'ahc'al quilimba, la jcac' suhtuc ta stojolic te bintic spasojic, xchi te Jehová, te Ajwalil.