Read Tzeltal Ezequiel 23 Bible Online

Ezequiel 23 - Tzeltal bible

Ezequiel 23

¹Tal ta jtojol te sc'op Jehová, hich la yal:

²Snich'anat winic, ay cheb antsetic, junax snanic;

³la yac' sbahic ta antsinel ta Egipto; c'alal ach'ix to a la yac' sbahic ta antsinel. Tey la yich' tsacbeyel schu'ic a, tey la yich' jaxulambeyel ta mulambeyel schu'ic yach'ixlel.

⁴Te wixile Ahola[8] sbihil, te ihts'inale Aholiba[9] sbihil. Cu'un c'oht ta schebalic, soc la yac'ticlan yalatac queremetic soc ach'ixetic. Te Aloha, ha te Samaria; te Aholiba, ha te Jerusalén.

⁵Te Ahola la yac' sba ta antsinel c'alal ay to ta jcuenta. Baht yo'tan ta stojol te mach'atic mulanot yu'un, ha te asiriahetic, te spat-xuhc,

⁶te slapojic chi'in-yaxal sc'u'ic, ha jcuentahinwanejetic soc capitanetic, spisilic jcolel winiquetic te mulantic sba, ha jmoheletic ta cawu.

⁷La yac' sba ta antsinel ta stojol spisil te tsahbil yal-snich'nab te asiriahetic soc spisil mach'atic mulanot yu'unic; la sbohlobtesbe sc'oblal ta scuenta te loc'ombahetic yu'unique.

⁸Ma ba la yihquitay hilel te antsinel yu'un ta Egipto, ta yach'ixlel to tsobol mach'atic wayic soc; la sjaxulambeyic ta mulambeyel schu' ta yach'ixlel soc bayel u'untaybot yo'tanic ta spasel mulil soc.

⁹Ha yu'un la jca'be ta sc'ab te mach'atic mulanot yu'unic, ta sc'ab te asiriahetic te mulanotic yu'une.

¹⁰Ha'ic la swahtanic, la yic'beyic te squerem-alatac soc te yantsil-alatac, soc la smilic ta espada te antse. Puhc sc'oblal ta stojol te antsetic ta scaj te castigo a'bote.

¹¹Te Aholiba te yihts'in la yil bin c'oht ta pasel, pero c'ax hich u'untaybot yo'tan ta spasel mulil a te bin ut'il te swixe; c'ax hich la yac' sba ta antsinel a.

¹²Ha nix hich la smulan te asiriahetic, ha te spat-xuhc, te ha jcuentahinwanejetic soc capitanetic, slapojic t'ujbil sc'u'ic yu'un soldadohetic, ha jmoheletic ta cawu, spisilic jcolel winiquetic te mulantic sbahe.

¹³La jquil te bohlobenix sc'oblal, te junax be st'unojic schebalic.

¹⁴Bayel to xan la yac' sba ta antsinel a; te c'alal la yil winiquetic lop'taybilic ta bonel ta pahc', ha sloc'ombahil caldeohetic te bombilic,

¹⁵te ay schuhquil ta sch'uhtic soc t'ujbil spohtsil sjolic, spisilic hich yilel te bin ut'il capitanetic, hich te bin ut'il winiquetic yu'un Babilonia te talemic ta Caldea,

¹⁶la smulan ta ora soc la sticombe bahel jal c'opetic ta sq'uinal te caldeohetique.

¹⁷Hich te winiquetic yu'un Babilonia talic ta swayib yu'un smulanel sbahic, la sbohlobtesbeyic sc'oblal. Soc ha nix te ants la sbohlobtes sba soc, patil la sp'ajticlan.

¹⁸Hich la yac' chicnajuc te antsinel yu'un soc te la swahtan sba, ha yu'un la jp'aj ho'on, hich te bin ut'il la jp'ajbe te swixe.

¹⁹Pero p'ohl te antsinel yu'une c'alal la sna' te bin ora ach'ix to a, te c'alal la yac' sba ta antsinel ta sq'uinal Egipto.

²⁰Bayel la smulan te mach'atic mulanot yu'unic tey a, te hich ay te schijubelic te bin ut'il schijubel te burrohetic, soc te ya'lel hich ay te bin ut'il te ya'lel cawuhetic.

²¹Hich la ana' xan te bin chopol la amulan ta awach'ixlel, te c'alal te egipciohetic la sjaxunlambat ta mulanel te achu', te achu' scuenta awach'ixlel.

²²Ha yu'un, Aholiba, hich yaloj te Jehová, te Ajwalil: Ya cac' scontrahinat te mach'atic la smulanat, te mach'atic la ap'aj, ya cac' te ya xtal scontrahinat ta ajoyobal:

²³ha te babiloniahetic, spisil te caldeohetic, te mach'atic talemic ta Pecod, Soa, Coa, soc spisil te asiriahetic, ha jcolel winiquetic te mulantic sba, jcuentahinwanejetic soc capitanetic, te mach'atic tulan ya'telic soc te ich'bilic ta muc', spisilic mohemic ta cawu.

²⁴Ya xtal scontrahinat soc chahpalchahp carretahetic, soc bayel winiquetic; ya xtal sjoytayat ta bayuc soc muc' soc tut mahquilaletic soc smahquil jolaletic. Ho'on ya ca'be ta scuentahic te ya schahpanat, ta scuenta te leyetic yu'unic ya schahpanat.

²⁵Ya cac' scontrahinat te xut'et co'tan, soc sc'ahc'al yilimbahic ya me scontrahinat. Ya me sloq'uesbat ani' soc achiquin, soc te mach'atic awu'un te cuxul ya xhilic ya me xlajic ta espada. Ya me yic'bat te awal-anich'nab queremetic soc ach'ixetic, soc te jayeb xan ya xhilic awu'un ya me xlajic ta c'ahc'.

²⁶Ya me spojbat ac'u' apac' soc ya me yich'bat te t'ujbil ch'ahlelaletic awu'une.

²⁷Hich ya cac' te ya xlaj te bin chopol la amulan soc te antsinel awu'un ta stojol Egipto; ma ba yac atoyix mohel asit ta stojolic soc mayuquix bin ora yac ana' xan te Egipto.

²⁸Como hich yaloj te Jehová, te Ajwalil: Ya cac'at ta sc'ab te mach'atic la ap'aj, ta sc'ab te mach'atic la awihlay.

²⁹Ya me yil-o'tantayat soc ya me yich'bat spisil te sit awa'tel; ya me swahtanat hilel, soc ya me xchicnaj te sbohlil te antsinel awu'un, te bin chopol la amulan soc te la awac' aba ta antsinele.

³⁰Hich ya xc'oht ta pasel ta atojol yu'un la awac' aba ta antsinel ta stojol te nacionetic soc la abohlobtes aba ta scuenta te loc'ombahetic yu'unique.

³¹La at'umbe sbe te awixe. Ha yu'un ya cac' ta ac'ab te vaso yu'une.

³²Hich yaloj te Jehová, te Ajwalil: Ya me awuch' te vaso yu'un awix, te bayel ya x'och a; ya stse'layat te nacionetic soc ya slabanat.

³³Ya xnojat ta yacubel soc wocol yu'un te vaso yu'un jinel soc lajinel, ha te vaso yu'un te awix Samaria.

³⁴Ya me alajin yuch'el spisil, ya me awuyticlan te yawil soc ya me ajot'ticlan achu'. Ho'on c'opojonix, xchi te Jehová, te Ajwalil.

³⁵Ha yu'un hich yaloj te Jehová, te Ajwalil: Te bin ut'il la ach'ayon ta awo'tan soc la awalac'patiyon, ha yu'un ya me awil awocol yu'un te castigo yu'un te bin chopol la amulan soc te la awac' aba ta antsinel, xchi.

³⁶Hich la yalbon te Jehová: Snich'anat winic, ¿ya bal achahpan te Ahola soc te Aholiba? A'beya sna'ic te bintic ilobtic sba spasojique.

³⁷Como la yac' sbahic ta antsinel soc ay ch'ich' ta sc'abic. La yac' sbahic ta antsinel soc te loc'ombahetic yu'unic, soc la yaq'uic c'axuc ta c'ahc' ta chiq'uel te yal-snich'nabic te la yalatayic ta jcuenta.

³⁸Soc ay to yan bin la spasbonic: ta hich ora la sbohlobtesbonic sc'oblal te ch'ul awilal cu'un soc la sbohlobtesbonic sc'oblal te sc'ahc'alel cux-o'tan cu'une.

³⁹Te c'alal la yaq'uic ta milbil mahtaniletic te yal-snich'nabic ta stojol te loc'ombahetic yu'unic, ha nix yorahil a ochic talel ta ch'ul awilal cu'un, hich la sbohlobtesbeyic sc'oblal. ¡Hich la spasic ta jna!

⁴⁰Soc la sticonic bahel a'batetic yu'unic ta iq'uel tal winiquetic ta namal, hich talic. Ha ta scuentahic te atinat, la abon asit soc la ach'al aba ta ch'ahlelaletic;

⁴¹la ahuhcan aba ta buen t'ujbil wayibal, chapalix mesa ta stojolic, soc tey la awac' a te pom soc te aceite cu'une.

⁴²Chicnaj aw yu'un bayel ants-winiquetic ta stojol; soc ic'otic tal sabeohetic te talemic ta jochol taquin q'uinal soc yantic winiquetic; la sch'albeyic sc'abic te antsetic soc la ya'beyic t'ujbil coronahetic ta sjolic.

⁴³Hich la jcalbe sc'oblal te ants te lajemix yip yu'un yantsinel: ¿Ya to bal yantsinic xan, soc ya to bal yac' sba ta antsinel yu'unic?

⁴⁴Como wayic soc hich te bin ut'il mach'a ya xway soc j'antsinel-ants. Ya xwayic soc Ahola soc Aholiba, te bohloben antsetic, xchihon.

⁴⁵Ha yu'un winiquetic te toj yo'tanic ya me ya'beyic castigo te ya sc'an pasbeyel antsetic te ya yac' sbahic ta antsinel soc te ya smalic ch'ich'; como ha j'antsinel-antsetic soc ay ch'ich' ta sc'abic.

⁴⁶Ha yu'un hich yaloj te Jehová, te Ajwalil: Ya cac' taluc tsobolic te ya scontrahinic, ya cac' c'ohtuc ta stojol xiwel soc te ya xpojbotic sbiluquic.

⁴⁷Te yipal ants-winiquetic ya me sch'ojic ta ton soc ya me smilic ta espada; ya smilticlambeyic te ach'ix-querem yu'unic soc ya schic'beyic snahic.

⁴⁸Hich ya cac' lajuc ta q'uinal te bin chopol ta mulanel, scuenta yu'un spisil te antsetic ya yich' sq'uelic a, hich ma ba ya spasic te bin chopol, hich te bin ut'il te ha'exe.

⁴⁹Ya me yaq'uic c'ohtuc ta atojolic te castigo yu'un te chopol awa'telic soc ya me atoj amulic yu'un sch'uhunel loc'ombahetic. Ya me ana'ic te ho'on Jehovahon, te Ajwalil, xchi te Jehová.