Read Tzeltal Ezequiel 24 Bible Online

Ezequiel 24 - Tzeltal bible

Ezequiel 24

¹Ta slajunebal c'ahc'al ta slajunebal u ta baluneb ha'bil tal ta jtojol te sc'op Jehová, hich la yal:

²Snich'anat winic, ts'ihbaya ta hun te bin c'ahc'alel ini, como te ajwalil yu'un Babilonia la sjoytay te Jerusalén ta c'ahc'alel ini.

³Halbeya sloc'ombahil c'op te jtoyba pueblo ini, hich xawalbe: Hich yaloj te Jehová, te Ajwalil: Otsesa ta c'ahc' jun oxom, otsesbeya ya'lel.

⁴Otsesa sesembil ti'bal tey a, spisil bintic lec, ha te ya' soc slomo, soc nojesa ta tsahbil sbaquel.

⁵Tsaca jcohtuc tsahbil tuminchij, a'beya si'il[10] ta ye'tal, ac'a buhlanuc, ta'ajtesa ta lec te sbaquele.

⁶Como hich yaloj te Jehová, te Ajwalil: ¡Ay me swocol te pueblo te ya smal ch'ich', te oxom te ay ya'baquil, te oxom te ma ba loq'uem te ya'baquile! Loq'uesa ta jujun nohl te ti'bale, ma ha'uc ta scuenta spasel seña ta na'el.

⁷Como te ch'ich' te la smal ay ta yohlil te pueblo, malbil ta sba ch'ulul ton; ma ba la smal ta lum yu'un ya xmucot ta ts'ubil lum.

⁸Scuenta yu'un ya xtohy xan ilinel, scuenta yu'un yaq'uel spacol, ya cac' ta sba ch'ulul ton te sch'ich'ele, scuenta yu'un ma ba ya yich' muquel a.

⁹Ha yu'un hich yaloj te Jehová, te Ajwalil: ¡Ay me swocol te jmilawal pueblo! Ha nix hich ho'on ya jbusan bayel si'.

¹⁰Busambeya bayel si'il, tsuna te c'ahq'ue, ta'ajtesa ta lec te ti'bal soc otsesbeya spoxil we'elil, ac'a c'ahc'uc te sbaquele.

¹¹Otsesa ta tsajuben ac'al te jochol oxom, yu'un ya xc'ahc'ub, ya xtsajub yu'un c'ahc' te bronce, yu'un ya x'uhl te ya'baquil soc ya xc'ahc' te schuxubenale.

¹²Tojol ay luhbel, ma ba loc' te bayel schuxubenal, ha nax ya xloc' ta c'ahc'.

¹³Te abohlil ha te bin chopol yac amulan. La jc'an la jpocat pero ma ba pocbil c'ohat yu'un abohlil; ma ba pocbil ya xc'ohat ha to c'alal ya xc'ax co'tan te quilimba ta atojol.

¹⁴Ho'on Jehovahon, calojix; ya me xtal, ho'on ya cac' c'ohtuc ta pasel. Ma ba ya suhton ta jpat, ma ba ya jna'bat yo'bolil aba, ma ba ya jsuht jc'op. Ha chican te behetic awu'un soc te awa'telic, hich yac awich' chahpanel a, xchi te Jehová, te Ajwalil.

¹⁵Tal ta jtojol te sc'op Jehová, hich la yal:

¹⁶Snich'anat winic, ya jloq'uesbat ta ora nax te mach'a mero mulambil awu'un; pero ma me xamel awo'tan, ma me x'oc'at, ma me x'oquin ya'lel asit.

¹⁷Ahcanajan ta muquen, ma me x'oc'at yu'un te mach'a chamene. Chuca spohtsil ajol, lapa atep, ma me xamac awelaw soc ma me xawe' te pan yu'un mel-o'tan, xchi.

¹⁸Ta sahb c'opojon soc te ants-winiquetic, ta tibiltic cham te quihname. Ta sacubel q'uinal la jpas te bin la spason ta mandar.

¹⁹Hich la yalbonic te ants-winiquetic: ¿Ma bal yacuc awa'botic jna'cotic bin scuentahil ta jtojolcotic te hich yac apase? xchihic.

²⁰Hich la jcalbeyic: Tal ta jtojol te sc'op Jehová, hich la yal:

²¹Halbeya te sna Israel te hich yaloj te Jehová: Ya jbohlobtesbe sc'oblal te ch'ul awilal cu'un, te yutsilal te bin awipinejic, te bin ya smulan asitic soc te bin c'ux ta awo'tanique. Te ach'ix-queremetic awu'unic te la awihquitayic hilel, ya me xlajic ta espada.

²²Hich yac apasic te bin ut'il la jpas ho'on: ma ba yac amuc awelawic soc ma ba yac awe'ic pan yu'un mel-o'tan;

²³ay me ta ajolic te spohtsil ajolic soc alapoj atepic; ma ba yac amel awo'tanic soc ma ba ya x'oq'uex, pero ya xlajex ta scaj te achopolilic soc talel c'axel ya x'ahcanajex.

²⁴Ha me seña ya xc'oht ta atojolic te Ezequiel. Spisil te bintic la spas, hich me yac apasic. Te c'alal hich ya xc'oht ta pasel, ya me ana'ic te ho'on Jehovahon, te Ajwalilon, xchi.

²⁵Soc ha'at, snich'anat winic, te bin ora ya jloq'uesbe te tulan ahnibal yu'unic, ha te bin tse'el yo'tanic yu'un soc utsilal yu'unic, te bin ya smulanic te sitic soc te bayel sc'anojic, soc te ya jloq'uesbe te ach'ix-queremetic yu'unic,

²⁶ta hich ora ya xtal ta atojol te mach'a ahn loq'uel tal te ya yalbat te bin c'ohtix ta pasele.

²⁷Ta hich ora ya xjahm awe, ya xc'opojat soc te mach'a loc' ta ahnel, ya xc'opojat, ma ba uma' ya xhilatix. Hich seña ya xc'ohat ta stojolic, soc ya me sna'ic te ho'on Jehovahon, xchi.