Read Tzeltal Ezequiel 25 Bible Online

Ezequiel 25 - Tzeltal bible

Ezequiel 25

¹Tal ta jtojol te sc'op Jehová, hich la yal:

²Snich'anat winic, ac'a asit awelaw ta stojol te amonetic, halbeya sc'op-jalwanej ta scontrahinel.

³Hich me xawalbe te amonetic: A'iya awa'iyic te bin ya yal te Jehová, te Ajwalil: Te bin ut'il hich yac awal: ¡Lec ay! xchihat, te c'alal bohlob sc'oblal te ch'ul awilal cu'un, soc te c'alal jochol hil te sq'uinal Israel soc te chucot bahel te sna Judá;

⁴ha yu'un ya cac' yu'untayat te mach'atic ayic ta stojol sloq'uib c'ahc'al. Ya me spasticlan scampamento soc ya me schahpanic te nahilpac' yu'unic ta awohlilic; ya me swe'beyex te sit awal-ts'unubil awu'unic soc ya me yuch'beyex te leche awu'unique.

⁵Te Rabá ya me jc'atp'un ta aquiltic yu'un camellohetic, soc te Amón ha yawil tuminchijetic ya xc'oht. Ya me ana'ic te ho'on Jehovahon.

⁶Como hich yaloj te Jehová, te Ajwalil: Te bin ut'il la apac' ac'ab soc la amaj ta awoc soc te tse'el awo'tan ta spisil te p'ajel awu'un ta stojol te sq'uinal Israel,

⁷ya jach jc'ab ta acontra soc ya cac'at ta sc'ab nacionetic yu'un ya spojbat abiluc. Ya jloq'uesat ta yohlil te pueblohetic soc ya jlajinat ta yohlil te q'uinaletique. Jc'axel ya jlajinat; ya me ana'ic te ho'on Jehovahon, xchi.

⁸Hich yaloj Jehová, te Ajwalil: Te bin ut'il hich la yal te Moab soc Seir: Ilawil, te sna Judá pajal soc spisil te nacionetic, te xchihique,

⁹ya jambe bahel te sts'ehl Moab, ya xhahch ta sti'il c'alal ta yan sti'il, te pueblohetic te mulantic sba, ha te Bet-jesimot, Baal-meón soc Quiriataim.

¹⁰Te mach'atic ayic ta stojol banti ya xloc' tal c'ahc'al ya ca'be yich'ic te Moab soc te amonetic, scuenta yu'un ma xna'otix a te amonetic ta yohlil te nacionetique.

¹¹Ha nix hich ya ca'be castigo te Moab, hich me ya sna'ic te ho'on Jehovahon, xchi.

¹²Hich yaloj te Jehová, te Ajwalil: Te Edom, te bin ut'il la sutbe spacol ta stojol te sna Judá, te hich la sta bayel smul a,

¹³ha yu'un hich yaloj te Jehová, te Ajwalil: Ya me jach jc'ab ta stojol Edom, ya jlajimbe te winiquetic soc te chambahlametic yu'une, jochol ya xhil cu'un; c'alal Temán c'alal ta Dedán ya me xlajic ta espada.

¹⁴Ya jsutbe spacol ta stojol Edom ta scuenta te pueblo Israel cu'un, hich me ya spasbeyic te Edom te bin ut'il ay quilimba soc sc'ahc'al co'tan. Ya me sna'ic te spacol cu'un, xchi te Jehová, te Ajwalil.

¹⁵Hich yaloj Jehová, te Ajwalil: Te filisteohetic, te bin ut'il la spac' sc'abalic, te la spasic soc xut'et slab yo'tanic, te la sjinticlanic ta scuenta te namey scontrahinej sbahique;

¹⁶ha yu'un hich yaloj te Jehová: Ya jach jc'ab ta scontrahinel te filisteohetic, ya jlajinlan ta jc'axel te cereteohetic soc ya jlajinlan te mach'atic ya xhilic ta sti'il mar.

¹⁷Ya ca'be tulan spacol soc ya ca'be castigo soc quilimba; ya me sna'ic te ho'on Jehovahon te c'alal ya jpac jc'abal ta stojolic, xchi te Jehová.