Read Tzeltal Ezequiel 26 Bible Online

Ezequiel 26 - Tzeltal bible

Ezequiel 26

¹Ta shahchibal c'ahc'al te u, ta sbuluchebal (11) ha'bil, tal ta jtojol te sc'op Jehová, hich la yal:

²Snich'anat winic, te bin ut'il hich la yalbe sc'oblal Jerusalén te Tiro: ¡Lec ay, jihnemix te ochibal yu'un te nacionetique! ¡Yo'tic, c'ohtix ta jcuenta: ho'on nojel ya xhilon, ha jimbil ya xhil stuquel! te xchihe.

³Ha yu'un hich yaloj te Jehová, te Ajwalil: Ilawil, ho'on jcontrahinejat, Tiro, ya cac' te ya xtal bayel nacionetic te ya scontrahinat, hich te bin ut'il te mar ya shach tulan tseletel.

⁴Ya me sjimbeyic cohel te ts'ahquetic yu'un soc ya me shemts'unic cohel te ilo-q'uinaletic yu'une. Ya jmes loq'uel ts'ubil lum, hich ya xhil cu'un te bin ut'il ch'ulul ton.

⁵Yawil staquijtesel tsaco-chay ya xc'oht ta yohlil te mar, como hich caloj, xchi te Jehová, te Ajwalil. Ya me yich' pojbeyel sbiluc yu'un te nacionetique;

⁶te tut pueblohetic yu'un te ayic ta sq'uinal, ya me xlajic ta espada. Hich me ya sna'ic te ho'on Jehovahon.

⁷Como hich yaloj Jehová, te Ajwalil: Ya cac' taluc ta norte te Nabucodonosor, ajwalil yu'un Babilonia, te ajwalil yu'un ajwaliletic, te ya scontrahin te Tiro soc cawuhetic, carretahetic, soc jmoheletic ta cawu soc bayel soldadohetic.

⁸Ya me smilbat ta espada te tut pueblohetic awu'un te ayic ta aq'uinal; ya schahpan toyol mohibaletic yu'un guerra, ya sbusambat lum scuenta smohibal te ts'ahc awu'une; soc ya scontrahinat soc bayel mahquilaletic yu'un guerra.

⁹Ya scontrahimbat te ts'ahc awu'un ta swuyojibal, soc ya slajimbat ta echej te ilo-q'uinaletic awu'une.

¹⁰Ya smucat ta ts'u'lum ta scaj te bayel cawuhetic yu'un; ya xnihc te ts'ahquetic awu'un yu'un te xnilet te cawuhetic soc carretahetic yu'un, te c'alal ya x'och bahel ta ochibaletic awu'un hich te bin ut'il ya x'ochic bahel ta pueblo te jambilix te sts'ahcule.

¹¹Ya stehc'ticlan ta yoc cawuhetic yu'un spisil te callehetic awu'un. Ya smilbat ta espada te alumale, soc ya xyahl cohel ta lum te tulan bahlal oyetic awu'une.

¹²Ya spojbat ac'ulejal soc ya yelc'ambat te bintic yac achon; ya sjinticlambat te ts'ahquetic awu'un, ya sjimbat te t'ujbil nahetic awu'un. Ya sch'ojticlan ta mar te tonetic, te'etic soc te bintic jimbilic awu'une.

¹³Ya cac' ya xlaj te sc'op c'ayojetic awu'un, soc ma ba ya xchicnajix sc'op te arpahetic awu'une.

¹⁴Ya cac' te ch'ulul ton ya xc'ohat, soc yawil staquijtesel tsaco-chay; mayuquix bin ora yac awich' xan pasel, como c'opojonix, ho'on Jehovahon, xchi te Jehová, te Ajwalil.

¹⁵Te Jehová, te Ajwalil, hich la yalbe te Tiro: ¿Ma bal yacuc xnihc' te mach'atic ayic ta ti'mar yu'un te xnilet yu'un ajihnele, c'alal ya x'awonic te mach'atic ehchenajemic, c'alal ya x'ayin miltamba ta awohlil?

¹⁶Hich spisil te ajwaliletic te ayic ta ti'ti'mar ya xcohic ta shuctajibic, ya sloq'uesic te snahtil-c'u'ic soc ya sloq'uesic te sc'u'ic te bayel sch'ahlele. Ya slapic xiwel, ya shuhcan sbahic ta lum, spisil ora ya xnihquic yu'un xiwel, soc xcham yo'tanic yu'un ta atojol.

¹⁷Ya sc'ayojtaybat ta atojol c'ayoj scuenta lajel, hich ya yalbat: Ilawil bin ut'il jimbilat, jun pueblo te talemic ta mar te swinquilel, jun pueblo te halbot yutsil sc'oblale, te ay yip ta mar ta nahilal, te la yac' tulan xiwel soc swinquilel ta stojol spisil mach'atic ayic ta sjoyobal.

¹⁸Yo'tic ya xnihquic te ti'ti'mar ta yorahil te jinel awu'un; te q'uinaletic te ayic ta yohlil ha' ya xnihc yo'tanic ta scaj alajibal.

¹⁹Hich yaloj te Jehová, te Ajwalil: Ya cac' te jochol pueblo ya xhilat, hich te bin ut'il pueblohetic te mayuc mach'a nahinemic tey a; ya cac' ta atojol te sc'ubulil ya'lel mar, ya smucat bayel ha'etic.

²⁰Ya cac' te pajal ya xcohat bahel soc te mach'atic ya xcohic bahel ta muquenal, ha te mach'atic c'axic ta namey; ya cac' x'ayinat ta sc'ubulil te lumq'uinal, hich te bin ut'il q'uinal te nameyix jimbil, soc te mach'atic ya xcohic bayel ta muquenal, scuenta yu'un mayuquix bin ora ay mach'a ya xnahin ta awohlil. Soc ya cac' utsilal ta q'uinal yu'un mach'atic cuxulic.

²¹Ya jc'atp'unat ta bin xiweltic sba, jc'axel ya xch'ayat ta q'uinal; ya xlehotat, pero mayuquix bin ora ya xtahotat, xchi te Jehová, te Ajwalil.